Revelation 10 in Sunwar

1 मिनु नोले गोमी सक्ति पाइश्‍शो परमप्रभु यावे आ स्‍वर्ग ङा गेय पाइब का गोस्‍सुमी गिल्‍सीशा, रागीमी यिशो ताता। मेको आ पियामी वाक्‍श दाप्‍शो बाक्‍त। मिनु मेको आ कुल नां खोदेंशो नु आ खोइली हुरुर पा ब्रशो मी के थाम खोदेंशो तांइसाक्‍व।

2 आ गुइमी इम्‍चीली प्राक्‍शो किताब शेशो बाक्‍त। मेको आ ग्‍युरा खोइली समुन्‍द्र तार नु आ पेरा खोइली चहिं रागी तार थेक्‍शा राप्‍त।

3 मेकोमी गुप्‍स खोदेंशो पा ठेयब सेंदामी ग्रीत। मोपा ग्रीमेनु, ७ ओटा बुंबुमी रेयके पाम्‍तेक्‍म। भजन संग्रह २९:३-९

4 मेको ७ ओटा बुंबु आ लोव़ ब्रेक्‍चाङानु, सरीङ रे सेंदा कामी “मेको ७ ओटा बुंबु आन लोव़ मब्रेक्‍तो, मुर आन कली मशेंदो” देंशो नेंता। दानीएल १२:४,९

5 मिनु ङोंइती तशो परमप्रभु यावे आ स्‍वर्ग ङा गेय पाइब ठेयब समुन्‍द्र नु रागीम खोइली थेक्‍बमी कसम जचा कली आ ग्‍युरा गुइ सरीङ गे पोक्‍तु।

6 मिनु मेकोमी दोपा कसम जाप्‍तु देंशा हना, गेना हना यो ब्रोंइशा बाक्‍ब, सरीङ नु सरीङम बाक्‍ब नेल्‍ल सेल्‍ब, रागी नु रागीम बाक्‍ब नेल्‍ल सेल्‍ब, समुन्‍द्र नु समुन्‍द्रम बाक्‍ब नेल्‍ल सेल्‍ब, परमप्रभु यावे आ नेंमी “मुल देश मपचा” दे कसम जाप्‍तु। दानीएल १२:७

7 मिनु मेको आ कसम जशो लोव़ मार बाक्‍त देंशा हना “नेल्‍ल क्‍येङा नोले ङा परमप्रभु यावे आ स्‍वर्ग ङा गेय पाइबमी तुराही तबानु, परमप्रभु यावेमी आ लोव़ पाइब आन कली ‘मुल रिम्‍ची ना नुप्‍त’ दे ङोंइती रे मशेंशो परमप्रभु यावे आ ख्रुइश्‍शो लोव़ मुल दुम्‍चाप्‍तु” दे कसम जाप्‍तु। प्रकाश ११:१५; प्रेरित ३:२१

8 मिनु मेको आं नेंशो स्‍वर्ग ङा सेंदामी आं कली लेंशा “लावो, मेको रागी नु समुन्‍द्र तार राप्‍शो परमप्रभु यावे आ स्‍वर्ग ङा गेय पाइब आ गुइमी बाक्‍शो किताब ताक्‍को” देंशो नेंता।

9 मिनु गो मेको परमप्रभु यावे आ स्‍वर्ग ङा गेय पाइब आ नेक्‍था लती। मिनु गोमी मेको कली “मेको इम्‍चीली किताब गेयीनी” देंती। मेकोमी “ताक्‍को। मिनु जावो। इ शोव़मी खुदो खोदेंशो पा ब्रोव़ब। मिनु इ कोव़जमी चहिं काइब” दे माइक्‍ती। इजीकीएल ३:१-३

10 मिनु गो मेको इम्‍चीली किताब परमप्रभु यावे आ स्‍वर्ग ङा गेय पाइब आ गुइ रे ताक्‍शा ङा मिन जाता। आं शोव़मी खुदो खोदेंशो जिज दुम्‍त। दाक्‍गुनु चहिं आं कोव़ज कत।

11 मिनु लोव़ पाइब कामी आं कली “गे लेंशा शुश मुरपुकी, शुश रागी, शुश लोव़ ङा मुर नु शुश पिप आन ङोंइती परमप्रभु यावे आ लोव़ नेंपाइक्‍चा माल्‍नेवे” देंशो नेंता। येरमीया १:९-१०