Revelation 1 in Sunwar

1 परमप्रभु यावेमी येसु ख्रीस्‍त कली “मार मार दुम्‍चा चिक्‍ता, आ रागी ङा वाइलीम वाइलपुकीमी तुइक्‍तमेक्‍ल” दे कोंइताक्‍व। मिनु येसु ख्रीस्‍तमी आ स्‍वर्ग ङा गेय पाइब कली आ वाइल यूहन्‍ना आ बाक्‍तीके सोइक्‍ताक्‍व। मारदे सोइक्‍ताक्‍व देंशा हना, मेको दुम्‍चशो लोव़ शेंथ सोइक्‍ताक्‍व।

2 मिनु गो, यूहन्‍नामी, परमप्रभु यावे आ लोव़ नेंता, येसु ख्रीस्‍त आ पशो ताता। मिनु मेको नेल्‍ल आन सांकछी दुम्‍ती।

3 मिनु सु सुमी परमप्रभु यावेमी तुइक्‍पाइश्‍शो एको किताब ङा लोव़ पढेनीमी, नेंनीमी नु टीनीमी, मेको आसीक रशो नु ग्‍येरसीशो मुर दुम्‍नीम। मारदे हना मेको लोव़ दुम्‍चशो बाक्‍त। १यूहन्‍ना १:१-२; यूहन्‍ना २१:२४; प्रकाश २२:१०

4 गो यूहन्‍नामी एसीया ङा येसु ख्रीस्‍त कली थमा सुइक्‍ब ७ ओटा सहर ङा थमा सुइक्‍ब आन ग्रुम्‍तीके ङा शेंब आन कली चिठी ब्रेक्‍ताक्‍ङ। मिनु मुल बाक्‍ब, ङोंइती बाक्‍शो, नोले यो जाक्‍बमी नु परमप्रभु यावे आ ठेयब नित्‍तीके आ ङोंइती बाक्‍ब ७ ओटा ठाउं ङा परमप्रभु यावे आ सोक्‍तीमी इन कली “शिशी तशा नु थुं नाइश्‍शा बाक्‍चा तामेक्‍ल” देंताक्‍स। प्रस्‍थान ३:१४-१५; प्रकाश ३:१; प्रकाश ५:६

5 मिनु येसु ख्रीस्‍तमी यो मो देंत। मिनु मेको सु बाक्‍ब देंशा हना, परमप्रभु यावे आ देंशो थमा पाइब सांकछी नु नेल्‍ल क्‍येङा ङोंइती बेक्‍शो रे सेंसीशो नु रागी ङा पिप आन कली सासन पाइब बाक्‍ब। येसु ख्रीस्‍तमी इं कली दाक्‍शा, आ हुशेमी इं पाप रे प्रोंइतु। प्रकाश ३:१४; यूहन्‍ना १८:३७; १तिमोथी ६:१३

6 इं कली परमप्रभु यावे, आ आफ आ राज्‍य ङा मुर सेल्‍शा, परमप्रभु यावे आ ङोंइती राप्‍ब सेल्‍तु। मोपतीके आ छेङछेङ नु सक्ति गेना हना यो बाक्‍ल, आमेन। प्रकाश ५:१०; प्रस्‍थान १९:६; १पत्रुस २:५,९

7 मिनु येसु ख्रीस्‍त लेश्‍शा, दोपा यीबा देंशा हना, सरीङ रे गोस्‍सुमी गिल्‍सीशा यीब। मिनु मुर नेल्‍लेमी मेको कली यिन यिन पशो ताइनीम। मेको कली साइक्‍पाइक्‍बपुकीमी यो ताइनीम। मिनु थर थर ङा मुरपुकीम मेको कली तशा, रोंका पा ङाक्‍नीम। एको थमा लोव़ बाक्‍ब। आमेन। मत्ती २४:३०; जकरिया १२:१०; यूहन्‍ना १९:३७

8 परमप्रभु यावे मुल बाक्‍ब, ङोंइती यो बाक्‍शो बाक्‍त। मिनु नोले यो जाक्‍ब। नेल्‍ल सक्ति पाइश्‍शो परमप्रभु यावेमी “गो आल्‍फा नु ओमेगा नङ” देंत। आल्‍फा नु ओमेगा माइश्‍शो ग्रीक लोव़मी ङोंइती नु नोले ङा अच्‍छेर बाक्‍नीस।प्रकाश २१:६; यसैया ४१:४; प्रकाश ४:८

9 मिनु गो इन लोक्‍ब यूहन्‍ना, येसु ख्रीस्‍त कली थमा सुइक्‍ब नङ। गो इन बुदी श्‍येत जशो परमप्रभु यावे आ राज्‍य ङा मुर यो नङ। मोपतीके श्‍येत जशा, इन खोदेंशो पा येसु ख्रीस्‍त कली रिम्‍शा बाक्‍नुङ। गो येसु आ सांकछी दुम्‍ती। मिनु परमप्रभु यावे आ लोव़ शेंताक्‍ङ। मोपतीके मुरुमी आं कली पात्‍मोस माइश्‍शो टापुमी लाइश्‍शा प्रोंइ‍तीमी।

10 मिनु गो परमप्रभु यावे आ नाक्‍त परमप्रभु यावे आ सोक्‍तीम बाक्‍ती। मिनु आं नोले तुराही ताप्‍शो खोदेंशो ठेयब सेंदा नेंता।

11 मेको सेंदामी आं कली “मार मार ताइनेवे, मेको नेल्‍ल कागजम ब्रेक्‍तो। मिनु ब्रेक्‍शा ङा मिन, एसीया ङा ७ ओटा सहर ङा येसु ख्रीस्‍त कली थमा सुइक्‍ब आन ग्रुम्‍तीके ङा मुर आन कली सोइक्‍तो। मेको ७ ओटा सहर चहिं एफिसस, स्‍मिरना पेरगामोम, थिआटीरा, सारडीस, फिलाडेल्‍फीया नु लाओडीसीया नम” देंत।

12 मिनु गो नु लोव़ पाइब कली कोव़ङु, दे बिर लेत्‍ती। लेश्‍शा कोव़ङुनु, ७ ओटा सुन के दियारीम बत्ती ब्रशो ताता।

13 मेको ७ ओटा दियारी आन दातेमी मुर का बाक्‍शो खोदेंशो ताता। मेको मुर दोदेंशो तांइसाक्‍व देंशा हना, खोइली सम्‍म लाइश्‍शो वा फेक्‍शो नु सुन के किप्‍तीके कुचुमी किप्‍शो बाक्‍त। प्रकाश २:१; दानीएल ७:१३

14 मेको आ पिया नु आ चां बुश ऊन नु फुं खोदेंशो बुश तांइसाक्‍व। आ मिक्‍च हुरुर पा ब्रशो मी खोदेंशो तांइसाक्‍व। प्रकाश २:१८; प्रकाश १९:१२

15 आ खोइली याप्‍पाइश्‍शा टल्‍केशो कांसा खोदेंशो तांइसाक्‍व। मिनु आ सेंदा ठेयब खोला आन रेयके खोदेंशो नेंसाक्‍व।

16 मिनु मेको आ ग्‍युरा गुइमी ७ ओटा सोरुल शेशो बाक्‍त। मिनु निम्‍फा गे क्‍योरतीक पाइश्‍शो हेश्‍शो तरवार का आ शोव़ रे ग्रूत। मिनु आ कुल नाक्‍त ङा नां खोदेंशो पा कोव़ने मचाप्‍चा ङा तांइसाक्‍व।

17 मिनु गोमी मेको मोदेंशो तङानु, बेक्‍शो मुर खोदेंब पा मेको आ खोइलीम गोल्‍ती। मिनु मेकोमी चहिं आ ग्‍युरा गुइ आं तारी वोइश्‍शा “महिनो, गो नेल्‍ल क्‍येङा ङोंइती नु नेल्‍ल क्‍येङा नोले ङा नङ। दानीएल ८:१८

18 ब्रोंइशा बाक्‍ब नङ। गो बेक्‍शा यो, लेंशा मबेक्‍चा ङा पा ब्रोंइती। मिनु नरक नु बेक्‍शा लशो मुर आन बाक्‍तीक ङा रोक्‍तीक सांचो गो नु बाक्‍ब।

19 गे मार मार तवी, मेको ब्रेक्‍तो। गे मार ब्रेक्‍चा माल्‍नेवे देंशा हना, मुल मार बाक्‍बा, नोले मार दुम्‍बा, मेको नेल्‍ल ब्रेक्‍तो।

20 मिनु आं ग्‍युरा गुइमी बाक्‍शो ७ ओटा सोरुल नु ७ ओटा खपीम बाक्‍शो सुन के दियारी आ ख्रुइश्‍शो अर्थ मार बाक्‍ब देंशा हना, मेको आं गुइमी तशो ७ ओटा सोरुलपुकी मेको एसीया ङा ७ ओटा सहर ङा थमा सुइक्‍ब आन ग्रुम्‍तीके ङा शेंब नम। मेको ७ ओटा दियारी चहिं मेको एसीया ङा ७ ओटा सहर ङा थमा सुइक्‍ब आन ग्रुम्‍तीके ङा मुर नम” दे माइक्‍ती।