Psalm 92 in Sunwar

1 नाइक्‍तीक नाक्‍त पतीक कुम्‍सो। परमप्रभु यावे कली “गे रिम्‍शो पाइब बाक्‍नीनी” देंचा रिम्‍शो बाक्‍ब। मिनु “इन नें नेल्‍ल क्‍येङा ठेयब बाक्‍ब” दे कुम्‍सो पचा रिम्‍शो बाक्‍ब। भजन संग्रह १४७:१

2 सुनी इन गेना हना यो दाक्‍तीके नु नाक्‍दो इन दाक्‍शा मप्रोंइतीके आ पर्बम लोव़ पचा रिम्‍शो बाक्‍ब।

3 बेन्‍जो नु तार पाइश्‍शो ठेयब ताप्‍तीक ताप्‍शा, बीना आ लायोमी मोदेंशो कुम्‍सो पचा रिम्‍शो बाक्‍ब।

4 मिनु गो “परमप्रभु यावे, इन पशोमी आं कली ग्‍येरपाइक्‍तीनी” दे इन पशो तशा, ग्‍येरशा कुम्‍सो पाइनुङ।

5 परमप्रभु यावे, इन गेय थम ठेयब बाक्‍नीम। इन मिम्‍तीके यो थम ठेयब बाक्‍ब। भजन संग्रह १०४:२४; यसैया ५५:९

6 निप्‍स मपाइश्‍शो मुरपुकीमी मेको तुइक्‍ने मचाप्‍नीम। मूर्खपुकीमी मेको रुप्‍ने मचाप्‍नीम।

7 मिनु परमप्रभु आ अरेशो मटीबपुकी घांस खोदेंशो पा बारनीम। मरिम्‍शो पाइबपुकी फू खोदेंशो पा बोइक्‍नीम। नोले मेकोपुकी गेनायो मलीचा ङा पा क्‍याम्‍चा पुंइसीनीम।

8 तन्‍न परमप्रभु यावे, गे गेना हना यो ठेयब सेल्‍चा पुंइसीनीनी।

9 परमप्रभु यावे, इन जोरी सत्रु क्‍याम्‍चा पुंइसीनीम। मरिम्‍शो पाइब नेल्‍ल एर ओंथ ब्राइनीम।

10 गे आं कली ब्‍वाकी ङा ब्‍यफ खोदेंशो पा सक्ति गेतीनी। आं कली नेल्‍ल क्‍येङा रिम्‍शो तेल लुक्‍ताक्‍यीनी। भजन संग्रह २३:५

11 गो आं जोरी सत्रु ब्रुशो तशा ग्‍येरसीनुङ। आं कली मरिम्‍शो पाइबपुकी खतम दुम्‍शो लोव़ नेंशा, ग्‍येरसीनुङ।

12 ठीक पाइबपुकी चहिं खजूर रवा खोदेंशो पा बारनीम। मेकोपुकी लेबानोन ङा लाइश्‍शो रवा खोदेंशो पा लाइक्‍नीम। भजन संग्रह १:३; भजन संग्रह ५२:१०

13 मेकोपुकी आंइ परमप्रभु यावे आ खिंमी ख्रुम्‍शो दुम्‍शा, आंइ परमप्रभु आ लाङगाम बोइक्‍नीम।

14 मिनु मेकोपुकी शुश बर्स दुम्‍मानु यो, फल सित्‍नीम। मेकोपुकी गिग नु नक ङा नक लीनीम।

15 मिनु गो “परमप्रभु यावे गेना हना यो ठीक पाइब बाक्‍ब। मेको आं सेरथे फुल्‍लु बाक्‍ब। मेको नु मारेइ मरिम्‍शो मबाक्‍ब” देंनुङ। ब्‍यवस्‍था ४२:४