Psalm 81 in Sunwar
1 कुम्सो पपाइक्ब कली गित्तीथ ताप्शा पतीके, आसाफ आ कुम्सो। आंइ कली सक्ति गेब परमप्रभु कली कुम्सो पने। ग्येरशा सोम्शा ठेयब सेंदा पा याकूब आ परमप्रभु कली कुम्सो पने।
2 खैजडी ताप्शा, कुम्सो पने। रिम्शो बीना नु तार पाइश्शो ठेयब ताप्तीक ताप्शा कुम्सो का पने।
3 औंसी, पूर्ने नु इं ठेयब चाड नाक्त तुराही तापीन। लेवी २३:२४
4 मारदे हना मोदेंशो चाड मानेचा इस्राएल ङा गेना हना यो पतीके बाक्ब। मेको याकूब आ परमप्रभु आ अरेशो बाक्ब।
5 मेको लोव़ परमप्रभुमी इजीप्त रे ग्रुंइशो योसेफ आ मुर आन कली अरेशो लोव़ बाक्ब। गो मतुइश्शो सेंदा का नेंतक।
6 मेको सेंदामी “गो इन बला रे भारी शोल्ता। गे भारी कुरचा ममाल्नीनी। प्रस्थान ६:६; यसैया ९:३
7 गे श्येत जनीनु, आं कली ब्रेत्ताक्नी। मिनु गो इन कली प्रोंइतन्नी। गो इन कली बुंबु रे लोव़ लेत्ताक्न्नी। गो मेरीबा ङा ब्वाक्कुमी इन कली थुं थाम्शा कोव़तन्नी।ठेयब सेंदा पा।प्रस्थान १९:१६; प्रस्थान १७:२-७; गन्ती २०:१३
8 आं मुरपुकी, आं अरेशो नेनीन। इस्राएलीपुकी, गे आं लोव़ नेंशो ननी हना, रिम्शो दुम वा।
9 इन दातेमी देवी देवता आन कली बाक्चा मगेने। अर्को रागी ङा देवी देवता आन ङोंइती बाप्शा, सेउ मपने। प्रस्थान २०:२-३
10 गो परमप्रभु यावे, इन परमप्रभु नङ। गो इन कली इजीप्त रे ग्रुंइशा एक चाक्तन्नी। इन शोव़ पाक्कीन, मिनु गो प्रिंनन्नी।
11 तन्न आं मुरपुकीमी आं लोव़ मनेनेम। इस्राएल आ मुरपुकीम आं कली मदाक्थु, आं देंशो मबिस्सम।
12 मोपतीके गो ‘आन दाक्स पामेक्ल’ दे आन दला दाक्स पचा गेतामी।
13 आं मुरपुकीमी आं लोव़ नेंशो नम हना, इस्राएल ङा मुर आं लांम गाक्शो नम हना,
14 गो मेको आन कली रीब पा आन जोरी सत्रु रे प्रोनुमी वा। मेको आन जोरी सत्रु आन कली खतम पोक्गुमी वा।
15 परमप्रभु यावे कली काइ मदाक्बपुकी हिंशा आं ङोंइती बांबा पा गाक्म वा। मिनु मोदेंशो गेना हना यो दुम वा।
16 मिनु गो इस्राएल ङा मुर, इन कली नेल्ल क्येङा रिम्शो चेरब जचा गेन्नी वा। मिनु रोका खुदोमी रूपाइक्न्नी वा” दे परमप्रभुमी देंत। ब्यवस्था ३२:१३