Psalm 59 in Sunwar
1 कुम्सो पपाइक्ब कली खतम मसेलो देंशो कुम्सो आ लायो। दाऊद आ कुम्सो। सावलमी दाऊद आ खिंम बाक्म कों, मेको कली साइक्चा, दे क्यारी पथ सोइश्शो बाक्त। १सामुएल १९:११ आं परमप्रभु, आं जोरी सत्रु रे प्रोंइयीनी। आं कली मरिम्शो पाइब आन क्येङा प्रोंइयीनी।
2 आं कली मरिम्शो पाइब नु हुश ख्राक्श पोक्ब आन रे प्रोंइयीनी।
3 कोव़ङीन, मेकोपुकीमी आं कली साइक्चा कली बाप्शा बाक्शो बाक्नीम। परमप्रभु यावे, गो मारेइ मरिम्शो मपथु, मेको मुर साइक्बपुकीमी आं कली जिचा तोशो बाक्नीम।
4 गो मारेइ मरिम्शो मपथु, मेकोपुकीमी आं कली साइक्चा चिक्शो बाक्नीम। आं श्येत जशो कोव़ङीन। मिनु वारच पाइक्चा कली बोक्कीन।
5 परमप्रभु यावे, मुर नेल्ल आन परमप्रभु, इस्राएल आ परमप्रभु, रागी रागी आन कली सजाइ गेचा कली बोक्कीन। इन कली प्रोंइशा, मरिम्शो पाइब आन कली काइ शिशी मपने। ठेयब सेंदा पा।
6 नाक्दो कुस कुस मेकोपुकी सहर आ एर ओंथ कुचुम खोदेंशो पा ङरर ङरर पा हिरसीनीम।
7 मेकोपुकीमी आन शोव़ रे मार ग्रुंइबाक्मा? मेकोपुकीमी साइक्चा ङा लोव़ पाइनीम। मिनु मेकोपुकीमी “सुम नेंबा ङा” देंनीम।
8 तन्न परमप्रभु यावे, गे मेको आन पर्बम रित्नीनी। गे रागी रागी नेल्ल आन पर्बम रित्नीनी।
9 गे आं सक्ति बाक्नीनी। गो इन कली ठेयब सेल्शा कुम्सो पाइनुङ। परमप्रभु, गे आं बोल्यो दरवार बाक्नीनी। भजन संग्रह ९:१०-११
10 परमप्रभुम आं कली गेना हना यो दाक्तीकेम ग्रुम्ब। मिनु मेकोमी आं कली आं जोरी सत्रु आन कली ग्रापाइक्ब।
11 मेको आन कली मसतीन। मो पाइतीनी हना, आं मुरपुकीमी प्रेंनीमी। परमप्रभु, गे आंइ तेक्तीक बाक्नीनी। गे मेको आन कली इन सक्तिमी एर ओंथ ब्रपाइश्शा, आइक्च सेलीन।
12 मेको आन पशो लोव़मी, आन ठेयब लेश्शो कोंइनीमी। गे गाइश्शा मेको आन सराप पतीके नु जोल पतीके खतम पोक्कीन।
13 मेको आन कली इन गाइक्तीकेमी सतीन। गे मेको आन कली रागी रे क्याम्ताक्नी हना, मुर नेल्लेमी परमप्रभुमी याकूब कली सासन पाइब, दे तुइक्नीम। ठेयब सेंदा पा।
14 नाक्दो कुस कुस मेकोपुकी सहर आ एर ओंथ कुचुम खोदेंशो पा ङरर ङरर पा हिरसीनीम।
15 मेकोपुकी जचा थोव़क माल्थ गाक्नीम। मिनु मरूतेक्म हना, ग्रीनीम।
16 तन्न गो चहिं इन सक्ति आ पर्बम कुम्सो पाइनुङ। सुनी कना गो इन गेना हना यो दाक्शो आ पर्बम कुम्सो पाइनुङ। मारदे हना गे आं ब्रोंइशा बाक्तीक बोल्यो दरवार बाक्नीनी। मिनु श्येत जङानु, आं ख्रुइक्तीक बाक्नीनी।
17 गे, आं सक्ति बाक्नीनी, गो इन कली ठेयब सेल्तीक कुम्सो पाइनुङ। गे आं बोल्यो दरवार नु आं कली गेना हना यो दाक्ब परमप्रभु बाक्नीनी।