Psalm 45 in Sunwar

1 कुम्‍सो पपाइक्‍ब कली लिली फू ङा कुम्‍सो आ लायो। शेंतीक कुम्‍सो। कोराह आ तौ आन कुम्‍सो। ग्‍युंबे ङा कुम्‍सो। आं थुं रिम्‍शो लोव़मी ब्रीतीके गो पिप कली कुम्‍सो पाइक्‍नुङ। आं लें थाम्‍पा ब्रेक्‍स जोक्‍ब मुर आन कलम खोदेंशो दुम्‍शो बाक्‍ब।

2 गे वोंइश मुर आन दातेमी नेल्‍ल क्‍येङा रिम्‍शो बाक्‍नीनी। इन लोव़ यो शुश रिम्‍शो बाक्‍ब। मारदे हना परमप्रभुमी इन कली गेना हना यो लीब आसीक गेशो बाक्‍ब।

3 गे बोल्‍यो मुर, इन किप्‍शुर किप्‍शा इन तरवार पिम्‍सीन। मिनु इन दारस नु इन मान ततीके कोंइदीन।

4 इन मान ततीकेमी, थमा पतीके, ब्रेम्‍शो थुं दुम्‍तीके नु इन ठीक पतीकेमी गाक्‍शा, इन सक्तिमी छक लाक्‍चा ङा गेय कोंइदीन।

5 गे इन हेश्‍शो ब्रामी इन जोरी सत्रु आन लुङगीरमी देत्‍नीम। जात जात ङा मुर इन ङोंइती साइक्‍चा पुंइसीनीम।

6 परमप्रभु, इन ठेयब नित्‍तीके गेना हना यो लीब। इन ठीक पतीके इन राज दन्‍ड खोदेंशो बाक्‍ब। हिब्रू १:८-९हिब्रू १:८,९

7 गे ठीक पतीके दाक्‍नीनी। इन अरेशो मटीब आन कली चहिं काइ मदाक्‍नीनी। मोपतीके परमप्रभु, इन परमप्रभुमी इन वारच नेल्‍ल आन क्‍येङा इन कली दाक्‍शा, इन कली तेल लुक्‍शो खोदेंशो पा ग्‍येरपाइक्‍तु।

8 इन वा नेल्‍ल एलोव़, मूरे नु ब्रोव़शो रिना पाइश्‍शो बाक्‍नीम। हात्ती आ दारामी दारपाइश्‍शो दरवारम बाक्‍शा, तार पाइश्‍शो ताप्‍तीके ताप्‍शा इन कली ग्‍येरपाइक्‍ब।

9 इन कली मान पाइब आन दातेमी पिप आन तमी यो बाक्‍नीम। इन ग्‍युरा गे ओफीर ङा सुनम ग्‍योम्‍सीशो पिपीम राप्‍ब।

10 आं तमी, नोफा दाइश्‍शा, नेनो। इ रागी नु इ खिं ङा मुर आन कली प्रेंदो।

11 पिपमी इ दारस तशा, इ कली दाक्‍शो बाक्‍ब। मेको कली जिम्‍मा गेंसीशा मान पावो। मारदे हना मेको इ प्रभु बाक्‍ब।

12 टायर सहर ङा मीश आलपुकी कोसेली चाक्‍शा, जाक्‍नीम। रागी रागी ङा शुश क्‍येट थीब मुरपुकीम इन शिशी माल्‍नीम।

13 पिप आ तमी थम दारशो नु सुन के श्‍येलेम प्रोव़शो वा फेक्‍शा, आ बाक्‍तीकेम बाक्‍ब।

14 मिनु बुटा आप्‍शो वा फेक्‍पाइश्‍शा, मेको कली पिप आ बाक्‍तीके चाक्‍नीम। मेको आ गेय पाइब मीश आल आ नोले खोइक्‍पाइश्‍शा, पिप आ बाक्‍तीकेमी जाक्‍नीम।

15 मिनु मुरपुकीमी मेको आन कली ग्‍येरशो कुम्‍सो पा लां कोंइनीम। मिनु पिप आ खिं ओंइनीम।

16 मिनु इन आफ आ पा ङा इन तौपुकी दुम्‍नीम। गे मेको आन कली रागी ङा सासन पाइब सेल्‍नीनी।

17 गो इन नें इन चच युइ आन पाला नेल्‍ल मिम्‍पाइक्‍नुङ। मोपतीके जात जात ङा मुरपुकीमी इन कली गेना हना यो ठेयब सेल्‍नीम।