Psalm 41 in Sunwar

1 कुम्‍सो पपाइक्‍ब कली दाऊद आ कुम्‍सो। सु सुमी प्रुङग मुर आन पर्बम सुर्ता पा, वारच पाइनीमी, मेको आन कली परमप्रभु यावेमी आन श्‍येत रे प्रोंइब। हितोपदेस १४:२१; मत्ती ५:७

2 परमप्रभु यावेमी मेको आन कली कोव़शा, खाल पा प्रोंइब। मेको रागीम बाक्‍मानु, ग्‍येरसमल। गे मेको आन कली आन जोरी सत्रु आन गुइम मगेनीनी।

3 मेकोपुकी रोइ पा गोल्‍शा बाक्‍मानु, परमप्रभु यावेमी मेको आन रोइ सापाइक्‍ब।

4 गो “परमप्रभु यावे आं कली शिशी पा सापाइय्‍यीनी। मारदे हना गो इन कली मरिम्‍शो पाता” देंती।

5 आं जोरी सत्रुमी “मेको गेना बेक्‍बा ङा, आ नें क्‍याम्‍सीबा?” देंनीम।

6 मिनु आं कली सु सुम कोव़थ जाक्‍नीमी, मेकोमी आं कली रिम्‍शो लोव़ पखु पाइनीम। मिनु नोले आं पर्बम “मार, मरिम्‍शो लोव़ पङ” दे मिम्‍शा, मरिम्‍शो लोव़ ब्रपाइक्‍नीम।

7 आं कली ग्रांग्रा दिप्‍ब नेल्‍ल ग्रुम्‍शा, आं पर्बम “मार मरिम्‍शो पाइक्‍चा” दे नोफा मुइक्‍मुइक्‍नीम।

8 मेकोपुकीमी “मेको कली बेक्‍तीक रोइमी ग्‍याइश्‍शो बाक्‍ब, आ गोल्‍तीक रे मबोक्‍ब” देंनीम।

9 गो आं नेक्‍था ङा वारच, आं शोब्‍ले जाइबमी यो, आं कली ताइक्‍चा कली आ खोइल क्‍युक्‍तु।

10 परमप्रभु यावे, गे आं कली शिशी पाइश्‍शा, पोक्‍यीनी। मिनु गो मेको आन कली क्‍येक्‍क लेन्‍ने चबुल। भजन संग्रह ५५:१३-१५; यूहन्‍ना १३:१८; प्रेरित १:१६

11 मोदेंशो पाइतीनी हना, गे आं कली दाक्‍नीनी, दे तुइक्‍नुङ। मारदे हना आं जोरी सत्रु आं पर्बम ग्‍येरचा मताइनीम।

12 आं रिम्‍शो थुं आ पर्बम गे आं कली ग्‍योम्‍ताक्‍यीनी। मिनु गे आं कली गेना हना यो इन ङोंइती राप्‍पाइक्‍तीनी।

13 परमप्रभु यावे, इस्राएली आन परमप्रभु कली “गे गेना हना यो ठेयब बाक्‍नीनी। मेको थमा बाक्‍ब” देंमल। आमेन आमेन। भजन संग्रह ७२:१८; भजन संग्रह ८९:५३; भजन संग्रह १०६:४८; भजन संग्रह १५०:६