Psalm 28 in Sunwar
1 दाऊद आ कुम्सो। परमप्रभु यावे, गो इन कली लोव़ पाइनुङ। गे आं सेरथे फुल्लु बाक्नीनी। आं कली लोव़ मलेत्थु, आं क्येङा ङोन मलने। मो पाइतीनी हना, गो बेक्शो मुर खोदेंशो दुम्नुङ।
2 आं पुंइशो लोव़ नेनीन। गो इन योव़शो बाक्तीके रे आं गुइ पोक्शा “वारच पाइय्यीनी” दे आं ब्रेश्शो लोव़ नेनीन।
3 आं कली इन अरेशो मटीब नु मरिम्शो पाइब मुर नु मक्याम्दीन। मेको आन नेक्था ङा मुर नु गारशो लोव़ पाइनीम। तन्न आन थुं मरिम्शो पतीकेमी ब्रीशो बाक्नीम। २सामुएल २०:९-१०
4 मेको आन पशो नु थाम्पा मरिम्शो पशो आ पर्बम क्येक्क लेत्तीन। दोदेंशो पा पामे, मोदेंशो पा क्येक्क लेत्तीन।
5 मेकोपुकीमी परमप्रभु यावे आ पशो नु आ गुइमी सेल्शो मारेइ ममिम्नीम। परमप्रभुमी मेको आन कली गेनायो मबोक्चा ङा पा क्याम्शा, लेंशा मसेल्ब। यसैया ५:१२-१३
6 गो परमप्रभु यावे कली ठेयब सेल्नुङ। मारदे हना “आं कली वारच पाइय्यीनी” दे आं पुंइशो नेंतु।
7 परमप्रभु यावे आं सक्ति नु आं तेक्तीके बाक्ब। गो मेको कली थमा सुइक्ता। मोपा आं कली वारच पाइक्ती। मोपतीके गो थाम्पा ग्येरसीशो बाक्नुङ। गो आं कुम्सोमी मेको कली ठेयब सेल्नुङ।
8 परमप्रभु यावे आ मुर आन सक्ति बाक्ब। आ तेल लुक्शो पिप कली प्रोंइब बाक्ब।
9 इन मुर आन कली प्रोनीन। इन रागी कली आसीक गेने। मिनु मेको आन कली गेना हना यो गोठला खोदेंशो पा योव़शा, गुप्शा, कुरशा पने।