Psalm 22 in Sunwar

1 कुम्‍सो पपाइक्‍ब कली सुनी ङा किश्‍श आ लायो ङा दाऊद आ कुम्‍सो। यसैया ५३:-; मत्ती २७:३५-४६ आं परमप्रभु, आं परमप्रभु, गे मारदे आं कली प्रोंइयीनी? मारदे गे आं कली वारच मप‍थु, ङोन बाक्‍नीनी। मारदे आं थोशो मनेंनीनी। मत्ती २७:४६

2 आं परमप्रभु, गो इन कली नाक्‍त ब्रेङङानु, गे लोव़ मलेत्‍तीनी। गो नाक्‍दो ब्रेङङानु यो, आं थुं नाइक्‍चा मतङ।

3 मिनु इस्राएलीपुकीम इन कली ठेयब सेल्‍तीक कुम्‍सो पामेनु, गे का ला मेको आन तार बाक्‍नीनी।

4 आंइ किकी पिपीम इन कली थमा सुइक्‍ना सुइक्‍न बाक्‍शो बाक्‍मा बाक्‍त। गे मेको आन कली आन जोरी सत्रु रे प्रोंइशो बाक्‍तीनी।

5 इन कली पुंइशा ब्रेश्‍शा, ब्रोंइचा तशो बाक्‍तेक्‍म। इन कली जिम्‍मा गेंसीशा, थमा सुइश्‍शा, मुने मदोक्‍म। भजन संग्रह २५:२-३

6 गो चहिं मुर मदुम्‍‍थु, लुस्‍पु खोदेंशो दुम्‍ती। मुरपुकीम आं कली शुक्‍शी पा ग्रांग्रा दित्‍नीम। अय्‍युब २५:६; यसैया ४१:१४

7 आं कली ताइब नेल्‍लेमी आं पर्बम रिश्‍शा, ठेयब लेश्‍शो लोव़ पशा, आन पिया हिम्‍नीम। अय्‍युब १६:१०

8 मिनु मेकोपुकीमी “परमप्रभु यावे कली थमा सुइक्‍ब, परमप्रभु यावेमी इन कली श्‍येत रे प्रोनल। मारदे हना परमप्रभुमी इन कली दाक्‍ब” दे शुक्‍शी पाइनीम। मत्ती २७:४३

9 गो मोदेंब दुम्‍ती हना यो, गे आं कली जरमेपपाइक्‍तीनी। गो आं ममा आ दूध तूङु रे आं कली कोव़तीनी।

10 ङोंइती रे गो इन के दुम्‍ती। आं ममामी थियी रे गे आं परमप्रभु बाक्‍नीनी।

11 गे आं रे ङोन मबाक्‍कीन। मारदे हना गो श्‍येत जचा चिक्‍शो बाक्‍नुङ। वारच पाइब सुइ मबाक्‍नी‍म।

12 ठेयब सांढेपुकीमी पुम्‍ताक्‍यीमी। बाशान रागी ङा हिंचा ङा सांढेपुकीमी यो पुम्‍ताक्‍यीमी।

13 शोव़लु बेक्‍शा ग्रीशो गुप्‍स खोदेंशो पा आन शोव़ पाक्‍शा, ग्राम्‍चा चिक्‍ताक्‍यीमी।

14 गो लुक्‍शो ब्‍वाक्‍कु खोदेंशो दुम्‍ती। आं रुश नेल्‍ल गलाक गुलुक दुम्‍तेक्‍म। आं लुङगीर मयीन खोदेंशो दुम्‍शा, यशो बाक्‍ब।

15 आं सक्ति ग्‍युम्‍त। ब्रोल्‍शो खप के गर खोदेंशो दुम्‍त। आं शोव़ सोव़त। मिनु गे आं कली साइक्‍चा ठीक पाइतीनी। यूहन्‍ना १९:२८

16 कुचुमपुकीमी आं कली पुम्‍ताक्‍यीमी। काइ मरिम्‍शो पाइब आन हुल आं एर ओंथ बाक्‍नीम। आं गुइ खोइली ख्रित्‍ताक्‍यीमी। यूहन्‍ना २०:२५,२७

17 गो आं रुश का का पा हिक्‍ने चाप्‍नुङ। मेकोपुकीमी आं कली शुक्‍शी पा कोव़स ङा कोव़स बाक्‍नीम।

18 आं वासी योक्‍सीशा, आं फेक्‍शो वा आ पर्बम “सुम ताइबा” दे फेन्‍टे ग्‍यारनीम। यूहन्‍ना १९:२४

19 परमप्रभु यावे, गे आं क्‍येङा ङोन मबाक्‍कीन। गे आं कली सक्ति गेब बाक्‍नीनी। गे रीब पा आं कली वारच पाइय्‍यीनी।

20 आं कली तरवार नु कुचुम रे प्रोंइयीनी।

21 गुप्‍स आ शोव़ नु ब्‍वाकी ङा सांढे आन ग्रोव़ रे प्रोंइयीनी। दानीएल ६:२३

22 गो “इन नें ठेयब बाक्‍ब” दे आं लोक्‍ब आन कली शेंनुङमी। मिनु थमा सुइक्‍ब आन ग्रुम्‍तीकेमी इन नें ठेयब सेल्‍नुङ। भजन संग्रह २६:१२; हिब्रू २:१२

23 गे परमप्रभु यावे कली मान पा हिंबपुकीमी, मेको कली ठेयब सेलीन। याकूब आ चच युइ, मेको कली “गे नेल्‍ल क्‍येङा ठेयब बाक्‍नीनी” देनीन। इस्राएल आ चच युइ नेल्‍ल मेको कली मान पा हिनीन।

24 मारदे हना मेकोमी श्‍येत जाइब आन श्‍येत तशा, आ कुल मख्रुइक्‍थु, आं ब्रेश्‍शो नेंतु। हिब्रू १५:७

25 ठेयब ग्रुम्‍तीकेमी आं इन कली ठेयब सेल्‍तीक कुम्‍सो इन लां रे जाक्‍ब। आं कसम जशो इन कली मान पा हिंब आन ङोंइती खाप्‍नुङ।

26 प्रुङग मुरपुकी जशा रूनीम। मिनु परमप्रभु यावे कली माल्‍बपुकीमी “परमप्रभु यावे ठेयब बाक्‍ब” देंनीम। गेपुकी गेना हना यो ब्रोंइशा बाक्‍चा ताइनीनी। भजन संग्रह ६९:३३

27 रागी रागी ङा मुरपुकीमी आं कली मिम्‍शा, परमप्रभु यावे गे लाइनीम। मिनु रागी ङा खिं खिं ङा मुरपुकी परमप्रभु आ ङोंइती बाप्‍नीम।

28 मारदे हना मेको राज्‍य परमप्रभु यावे केन बाक्‍ब। मिनु मेकोमी रागी रागी ङा मुर आन कली सासन पाइब।

29 रागी रागी ङा जाइब तूब, शुश क्‍येट थीबपुकी परमप्रभु आ ङोंइती बाप्‍नीम। मिनु बेक्‍शा, फुरक दुम्‍ब नेल्‍ले मेको आ ङोंइती बाप्‍नीम।

30 मिनु मेको आन चच युइपुकीमी मेको कली सेवा पाइनीम। मिनु आन नोले ङा पाला ङा मुर परमप्रभु यावे आ पर्बम शेंचा पुंइसीनीम।

31 मेकोपुकीम नोले जरमेशो मुर आन कली परमप्रभु आ ठीक पतीके आ पर्बम शेंनीम। मेकोमी प्रोंइतु, दे नेल्‍ल आन कली तुइक्‍पाइक्‍नीम।