Psalm 144 in Sunwar
1 दाऊद आ कुम्सो। परमप्रभु यावे, आं सेरथे फुल्लु, ठेयब बाक्ब। मेकोमी आं कली लडाइ पचा शेंब।
2 गो आं कली दाक्ब, आं दरवार, आं ख्रुइश्शा ब्रोंइशा बाक्तीके, आं कली श्येत रे प्रोंइब नु आं तेक्तीक बाक्नीनी। गो इन बाक्तीकेमी ख्रुइश्शा बाक्नुङ। गे आं कली मुर आन कली सासन पाइब सेल्नीनी। भजन संग्रह १८:३
3 परमप्रभु यावे, मुर आइक्च बाक्तेक्म हना यो, गे मेको आन कली कोव़नीनी। बेक्शा लाइब मुर मार नमी ङा? तन्न गे मेको आन कली मिम्नीनी।
4 मुर कीशो सोक्त खोदेंशो बाक्नीम। मेको आन ब्रोंइतीक नाक्ती जाम्शा लाइब वांकु खोदेंशो बाक्नीम। अय्युब १४:२
5 परमप्रभु यावे, इन सरीङ रे तोइश्शा यिने। डांडा आन कली थिशा, कुन ग्रूपतीन। भजन संग्रह १८:१०-१७
6 चिला दाप्पाइश्शा, मेको एर ओंथ ब्रपतीन। इन ब्रा आप्शा मेको आन कली खेदा पने।
7 इर रे इन गुइ दिंदीन। मिनु आं कली बारशो खोला नु अर्को रागी ङा मुर आन गुइ रे प्रोंइयीनी।
8 मेकोपुकीमी जोल नु मरिम्शो ला पाइनीम।
9 परमप्रभु, गो इन कली नक कुम्सो का पाइनुङ। १० ओटा तार पाइश्शो ताप्तीक ताप्शा, इन कली कुम्सो पाइनुङ। भजन संग्रह ३३:३
10 गे पिप आन कली ग्रापाइक्नीनी। गे इन गेय पाइब दाऊद कली बेक्चा रे प्रोंइतीनी।
11 आं कली मुर साइक्ब तरवार रे प्रोंइयीनी। अर्को रागी ङा मुर आन गुइ रे प्रोंइयीनी। मेकोपुकीमी जोल नु मरिम्शो ला पाइनीम।
12 मिनु आंइ तौपुकी कोल्मानु, रवा खोदेंशो दुम्मल। आंइ तमीपुकी दरवारम बाक्शो मुशो थाम खोदेंशो दुम्मल।
13 आंइ अन्न वोइक्तीके शुश खाल ङा अन्नमी ब्रीमल। आंइ भेडा हजार हजार दुम्मल। आंइ भेडा आंइ रूम लाख लाख दुम्मल।
14 आंइ बीपुकी गिक्ब दुम्मल। आंइ गारो मब्रेल्ल। आंइ कली सुइमी ग्याइश्शा मलदमेक्ल। मिनु आंइ लांमी सुइ ङाक्शो मनेंसीब।
15 मोदेंशो आसीक ताइब मुर ग्येरसीशो बाक्नीम। सु मुर आन परमप्रभु, परमप्रभु यावे बाक्बा, मेको ग्येरसीशो मुर बाक्नीम। ब्यवस्था ३३:२९