Psalm 100 in Sunwar
1 परमप्रभु कली “गे रिम्शो पाइब बाक्नीनी” दे चढ़ेतीकेम पशो कुम्सो। रागी रागी ङा मुर नेल्ल परमप्रभु यावे कली ग्येरसीशा कुम्सो पने।
2 ग्येरसीशा परमप्रभु यावे कली ठेयब सेलीन। गे कुम्सो पना पन आ नेक्था लने।
3 परमप्रभु यावे का ला परमप्रभु बाक्ब, दे रुपीन। मेकोमी इं कली सेल्शो बाक्त, गो मेको आ मुर बाक्नय। गो मेको आ योव़तीक ङा भेडा बाक्नय। भजन संग्रह ९५:७
4 मिनु “गे रिम्शो पाइब बाक्नीनी” दे आ ठेयब लाप्चो रे ओव़ङीन। आ कली मान पा आ लाङगाम ठेयब सेल्तीक कुम्सो पने। मेको कली “गे रिम्शो पाइब बाक्नीनी” दे आ नें कली मान पा ठेयब सेलीने। भजन संग्रह १०६:१
5 मारदे हना परमप्रभु यावे रिम्शो पाइब बाक्ब। मिनु आ गेना हना यो दाक्तीके लीब। मिनु आ दाक्शा मप्रोंइतीके नेल्ल पाला सम्म बाक्ब।