Proverbs 8 in Sunwar
1 तुइक्तीकेमी लोव़ मपाइबा ङा? रुप्तीकेमी ठेयब सेंदा पा मब्रेप्बा ङा? हितोपदेस १:२०-२३
2 मेको लां आ नेक्था ङा डांडा तारी नु ब्रालाम दोक राप्ब।
3 ठेयब लाप्चो आ नेक्था सहर आ ङोंइती, मेको आ ओव़तीकेमी ठेयब सेंदामी ग्रीब।
4 मार देंशा ग्रीब देंशा हना, मुरपुकी, गो इन कली लोव़ पाइनुङ। मुर नेल्ल आन कली लोव़ पाइनुङ।
5 मारेइ मजोक्बपुकी होस पतीके शेंसीन। निप्स मपाइश्शो बाक्तीनी हना, निप्स पाइश्शो दुमीन।
6 नेनीन, गो रिम्शो लोव़ पाइनुङ। आं लोव़ ठीक बाक्ब।
7 गो थमा लोव़ ला पाइनुङ। परमप्रभु यावे आ अरेशो मटितीके तशा, गो ग्रांग्रा दीनुङ।
8 गो ठीक लोव़ ला पाइनुङ। दूली नु हेंथे लोव़ मपाइनुङ।
9 मिनु मेको आं लोव़ रुप्ब आन कली मख्रुइश्शो लोव़ बाक्ब। जोक्ब आन कली ठीक लोव़ बाक्ब।
10 चांदी आ पा ङा आं अर्ती खुप्तीन। क्येख सुन आ पा ङा जोक्ब थुं मालीन। हितोपदेस ३:१४
11 मारदे हना हीरा क्येङा तुइक्तीके रिम्शो बाक्ब। इ माल्शो मारेइ मारेइ नेल्ल मेको क्येङा आइक्च बाक्नीम।
12 गो तुइक्तीके नङ। गो होस पतीक नु बाक्नुङ। गो जोक्ब नु मिम्ब दुम्नुङ।
13 परमप्रभु यावे कली मान पा हिंचा, मरिम्शो पचा कली काइ मदाक्चा बाक्ब। फुरती कोंइचा, ठेयब लेश्शो दुम्चा, मरिम्शो थुं ङा गेय पचा नु दूली लोव़ पचा काइ मदाक्नुङ।
14 अर्ती नु ठीक पा तुइक्तीक गो नु बाक्नीस। गो नु जोक्तीक तुइक्तीक नु बोल यो बाक्नीम।
15 गो रे पा पिपपुकीमी सासन पाइनीम। हुकुम पाइबपुकीमी ठीक पा अरेतीक लोव़ पाइनीम। हितोपदेस १६:१२
16 आं पतीकेमी रागी रागी ङा हुकुम पाइबमी हुकुम पाइनीम।
17 सुमी आ कली दाक्नीमी, गो यो मेको आन कली दाक्नुङ। सुम आं कली शुश माल्नीमी, मेकोमी आं कली थित्नीम।
18 शोंप नु मान गो नु बाक्नीस। मिनु मनुप्ब शोंप नु सोशा बोशा ग्येत्थ लतीक गो नु बाक्नीस।
19 सुन नु क्येख सुन क्येङा आं गेशो फल रिम्शो बाक्ब। आं रे पा ग्रूशो मारेइ मारेइ चांदी क्येङा रिम्शो बाक्नीम।
20 गो ठीक पतीक लां गाक्नुङ। ठीक निसाफ पाइनुङ।
21 आं कली दाक्ब आन कली गो शुश शोंप गेनुङ। गो मेको आन मार मार वोइक्तीक नेल्ल प्रिंशा गेनुङ।
22 मिनु मेकोमी “परमप्रभु यावेमी नेल्ल सेल्चा क्येङा ङोंइती आं कली सेल्ती। अय्युब २८:२३-२८
23 नेल्ल क्येङा ङोंइती ङा गो नङ। रागी क्येङा ङोंइती यो गो नङ।
24 समुन्द्र दुम्चा क्येङा ङोंइती गो नङ। ब्वाक्कु बुक्चा क्येङा ङोंइती गो बाक्ती।
25 डांडापुकी दुम्चा क्येङा ङोंइती नु पहाड दुम्चा क्येङा ङोंइती गो नङ।
26 मेकोमी रू नु रागी सेल्चा क्येङा ङोंइती गो नङ। खप सेल्चा क्येङा ङोंइती गो नङ।
27 मेकोमी सरीङ प्राक्शा वोइक्ची ना गो नङ।
28 गोस्स कली सरीङमी वोइक्ची ना नु खप आगा ङा ब्वाक्कु बुक्तीके कली ठीक पा वोइक्चा ना,
29 ठेयब समुन्द्र आ शुंइच वोइक्ची ना नु रागी आ जग वोइक्ची ना गो नङ। भजन संग्रह १०४:९
30 मेना गो परमप्रभु यावे आ नेक्था जोक्ब तुइक्ब गेय पाइब खोदेंशो पा बाक्शो नङ। मेकोमी नाक्त किंत किंत आं कली तशा ग्येरसाक्व। गो यो मेको नु ग्येरसीशा बाक्ती।
31 मिनु आ मुरपुकीम ब्रीशो रागी तशा ग्येरसाक्यी। गो मुर आन कली तशा ग्येरसाक्यी।
32 आं तौपुकी, मुल आं लोव़ नेनीन। आं कोंइशो लां गाक्बपुकी ग्येरसीशो मुर दुम्नीम।
33 आं अर्ती नेंशा जोक्ब तुइक्ब मुर दुमीन। मेको कली मप्रोनीन।
34 सुम आं लोव़ नेंबा, मेको ग्येरसीशो मुर दुम्ब। मेको मुरुम नाक्त किंत किंत आं लाप्चो कोव़शा आं कली रिम्ब।
35 सुम आं कली थिप्बा, मेको ब्रोंइचा ताइब। मिनु परमप्रभु यावेमी मेको कली दाक्ब।
36 आं कली मथिप्बपुकी चहिं आंम कली खतम सेल्नीम। आं कली काइ मदाक्ब नेल्ले बेक्चा दाक्नीम” देंत।