Proverbs 24 in Sunwar

1 मरिम्‍शो पाइब मुर आन मार मार तशा, गेहे मपने। मिनु मेको नु मबाक्‍कीन।

2 मारदे हना मेको आन थुंमी हुश ख्राक्‍श पोक्‍चा ला मिम्‍नीम। मिनु मेकोपुकीमी मरिम्‍शो आ पर्बम ला लोव़ पाइनीम।

3 तुइक्‍‍तीकेमी खिं सेल्‍सीब। रु‍प्‍ब मुरुमी आ खिं सेल्‍शा रिम्‍शो पा बाक्‍ब।

4 जोक्‍तीकेमी मेको खिं ङा कोठापुकी शुश क्‍येट लाइब नु रिम्‍शो थोव़कीमी प्रिंब। हितोपदेस ३१:१०-३१

5 बोल्‍यो लडाइ पाइब आन क्‍येङा जोक्‍ब तुइक्‍ब लडाइ पाइब रिम्‍शो बाक्‍नीम। मिनु बोल पाइश्‍शो मुर आन क्‍येङा जोक्‍ब तुइक्‍ब मुरुमी अधिकार ताइब।

6 मारदे हना रिम्‍शो लां कोंइब बाक्‍त हना, लडाइ पने चाप्‍नीनी। अर्ती गेब शुश बाक्‍तेक्‍म हना, लडाइ ग्रा‍नीनी। हितोपदेस २०:२८; हितोपदेस ११:१४

7 मूर्खपुकीमी तुइक्‍तीके रुप्‍ने मचाप्‍नीम। मेकोपुकीमी ठेयब लाप्‍चो ङा ग्रुम्‍तीकेमी लोव़ पने मचाप्‍नीम।

8 सुमी काइ मरिम्‍शो पचा मिम्‍बा, मेको कली मरिम्‍शो पाइब देंनीम।

9 मूर्खे गेय पाप बाक्‍ब। मिनु शुक्‍शी पाइब कली तशा मुर नेल्‍ल ग्रांग्रा दीनीम।

10 श्‍येत नाक्‍ती गोल्‍चा चिक्‍ताक्‍वी हना, इ बोल दोशो बाक्‍म ङा?

11 मुर कली साइक्‍चा, दे कीशा लाइश्‍शो ताप्‍तीवी हना, मेको आन कली प्रोंइथ लावो। मिनु साइक्‍चा पुंइसीचा चिक्‍शो कली वारच पावो। भजन संग्रह ८२:४

12 मिनु गे “गो मेको मतुइक्‍तु” देंते हना, थुं नाक्‍‍बम इ मरिम्‍शो पशो तुइक्‍ब। इ कली कोव़बमी नेल्‍ल तुइक्‍ब। मेकोमी मुर आ मरिम्‍शो पशो ङा क्‍येक्‍क लेप्‍ब।

13 आं तौ, खुदो जावो। मारदे हना मेको रिम्‍शो बाक्‍ब। चाका रे याप्‍शो खुदो जीजी पा ब्रोव़ब।

14 मार मिम्‍चा माल्‍नेवे देंशा हना, जोक्‍तीक तुइक्‍तीक इ थुं कली खुदो खोदेंशो जिज बाक्‍ब। मेको ताप्‍तीवी हना, इ कली नोले सम्‍म रिम्‍शो दुम्‍ब। इ मिम्‍शो जाक्‍दीप्‍ब।

15 गे परमप्रभु यावे आ अरेशो मटीब ठीक पाइब आन खिं खतम पोक्‍चा कली बाप्‍शा मबाक्‍को। मेको ठीक पाइब आ बाक्‍तीकेमी हुश ख्राक्‍श मपोक्‍को।

16 ठीक पाइब मुरपुकी ७ खेयप गोल्‍तेक्‍म हना यो, लेंशा बोक्‍नीम। तन्‍न परमप्रभु यावे आ अरेशो मटीबपुकी मबोक्‍चा ङा पा गोल्‍नीम। भजन संग्रह ३७:२४

17 इ जोरी सत्रु जाम्‍शा लाम्‍तेक्‍म हना, मग्‍येरसो। मेकोपुकी दाइल पा थिस्‍साक्‍म हना, मरिस्‍सो। अय्‍युब ३१:२९

18 गे मेको तशा ग्‍येरसाक्‍वे हना, परमप्रभु यावेमी इ पशो मदाक्‍ब। मिनु इ जोरी सत्रु आन पर्बम गाइश्‍शो नाइश्‍‍शा मेको आन कली वारच पाइब।

19 काइ मरिम्‍शो पाइब आन पर्बम मगाइक्‍तो। परमप्रभु यावे आ अरेशो मटीब आन पर्बम गेहे मपावो। भजन संग्रह ३७:१

20 मारदे हना काइ मरिम्‍शो पाइब शुश नाक्‍त मलीनीम। मिनु परमप्रभु यावे आ अरेशो मटीब आन बत्ती काप्‍शा लाइब। हितोपदेस १३:९

21 आं तौ, परमप्रभु यावे नु पिप कली मान पा हिनो। मेको आस कली मटीब नु मगाक्‍को। १ पत्रुस २:१७

22 मारदे हना मेको आस पतीके रे गे मतुइक्‍थु श्‍येत ज‍ने चाप्‍नेवे। मिनु मेको आस खतम पोक्‍तीक सुम तुइक्‍बा?

23 एको लोव़ जोक्‍ब तुइक्‍ब मुर आन देंशो बाक्‍ब। निसाफ पतीकेमी कुल कोव़मुचा मरिम्‍शो बाक्‍‍ब। लेवी १९:१५

24 सुमी पाप पाइब कली “गे ठीक पाइब बाक्‍नीनी” देंबा, जात जात ङा मुरपुकीमी मेको कली सराप पाइनीम। रागी रागी ङा मुरपुकी मेको आ पर्बम ग्रांग्रा दीनीम।

25 तन्‍न सुमी मरिम्‍शो पाइब कली अरे‍बा, मेको ग्‍येरसीनीम। मिनु मेको शुश आसीक ताइनीम।

26 थमा लोव़ लेत्‍चा, मुर कली पुक्‍पु पशो खोदेंशो बाक्‍ब। हितोपदेस १५:२३

27 ङोंइती इ लाङगा ङा गेय थुमो। इ रूमी मार मार शोक्‍को। मिनु नोले इ खिं सेलो।

28 गे इ नेक्‍था ङा मुरुम मारेइ मपथु, मेको आ पर्बम सांकछी मबाक्‍को। गे जोल मपावो। प्रस्‍थान २०:१६

29 गे “मेकोम आं कली मार पवा, मेको कली यो मोदेंशोन पाइनुङ। गो मेको कली क्‍येक्‍क लेत्‍नुङ” मदेनो। हितोपदेस २०:२२

30 गो अल्‍से मुर का आ रू रे पा लती। निप्‍स मपाइश्शो मुर आ अङगुर रू रे पा कोव़ना कोव़न लती।

31 मिनु गो मार ताता देंशा हना, मेको रू नेल्‍ल चूम सुम्‍शो बाक्‍त। खप नेल्‍ल चूले वाशो बाक्‍तेक्‍म। मिनु रू एर ओंथ ङा गारो यो ब्रेश्‍शो बाक्‍त।

32 मिनु गो नेल्‍ल कोव़शा, मिम्‍ताक्‍ङ। मिनु शेंतीक लोव़ का रुप्‍ता। मार रुप्‍ता देंशा हना,

33 याम का ङा इप्‍चा। याम का ङा निन्‍द्रा पचा। याम का गुइ फिम्‍ला पा बाक्‍चामी हितोपदेस ६:९-११

34 प्रुङग दुम्‍तीके नु श्‍येत जतीके या कुरब मुर खोदेंशो पा रीब पा मेको मुर तारी जाक्‍ब, दे रुप्‍ता।