Proverbs 17 in Sunwar
1 जिना जिन ब्रोव़शो जचा क्येङा सिक्सी पा थुं नाइश्शा पोकतो खमे जचा रिम्शो बाक्ब। हितोपदेस १५:१७
2 जोक्ब तुइक्ब वाइलमी आ होव़प आ मरिम्शो पाइब तौ कली अरेब। मिनु मेको वाइलमी खिं ङा तौ खोदेंशो पा रू ताइब।
3 सुन चांदी यपाइश्शा नाक्चा कली ग्योंब नु मी माल्ब। तन्न परमप्रभु यावेमी मुर आन थुं नाक्ब भजन संग्रह ६६:१०
4 मरिम्शो पाइब मुरुमी परमप्रभु यावे आ अरेशो मटीब आ लोव़ नेंब। जोल पाइबमी खतम सेल्तीक लोव़ नेंचा कली नोफा दाइक्ब।
5 सुम प्रुङग आन कली शुक्शी पाइबा, मेकोमी आ कली सेल्ब, परमप्रभु यावे कली आइक्च सेल्ब। सु मुर आन कली श्येत जशो तशा ग्येरसीबा, मेको सजाइ मतथु मब्रोंइब। हितोपदेस १४:३१
6 खाल्पा खाल्पी आन सिरपेच आन चच युइ नमी। मिनु आल आन ग्योम्सीशो आन आम आफ बाक्नीम।
7 मूर्खपुकीमी रिम्शो लोव़ पचा मशिरनीम। मेको क्येङा ठेयब मुरपुकीमी जोल पचा मशिरब।
8 घूस गेबमी आ घूसमी मारेइ मारेइ पने चाप्ब, दे मिम्ब। मेको ते लत हना यो आ देंशो खाप्ब।
9 सुमी अरु आन मरिम्शो पशो सुम्बा, मेकोम वारच सेल्ब। तन्न मुर आन मरिम्शो पशो देंना देंन बाक्बमी वारच आन कली फ्राब।
10 मूर्ख मुर कली सहे खेयप तुप्चा क्येङा जोक्ब तुइक्ब मुर खेयप का देंशोनु रुप्ब।
11 मरिम्शो मुरपुकीमी गेना हना यो जिचा पोक्नीम। तन्न मेको कली सजाइ गेचा कली शिशी मपाइब मुर सोइश्शो बाक्ब।
12 मूर्ख मुरुमी मूर्ख पवा ना ग्रुम्चा क्येङा आ चाइक्ब रोंइसीशो वां कली ग्रुम्चा रिम्शो बाक्ब।
13 सुमी रिम्शो पाइब आन कली मरिम्शो पाइबा, मेको आ खिं रे मरिम्शो गेनायो मलाइब।
14 दोपा प्रोंइशो ब्वाक्कु बोल पा शाइक्बा, मोपा जिचा पोक्तीक बाक्ब। मोपतीके जिचा ठेयब दुम्चा क्येङा ङोंइती मेको कली तेक्कीन।
15 सुमी परमप्रभु यावे आ अरेशो मटीब आ पर्बम “ठीक पाइब बाक्ब” देंबा, मिनु ठीक पाइब आ पर्बम “ठीक पाइब मबाक्ब” देंबा, मेको निम्फा आस कली परमप्रभु यावेमी ग्रांग्रा दीब। यसैया ५:२३
16 मूर्ख आ गुइमी तुइक्तीक थुं ग्याप्चा कली क्येट मारदे माल्बा ङा?। मेको के शेंसीतीक थुं मबाक्ब।
17 वारचमी गेना हना यो दाक्ब। लोक्बपुकी चहिं श्येत जशो ना वारच पचा कली जरमेशो बाक्नीम।
18 सु आ नेक्था ङा मुर आ पर्बम जमानी बाक्चा कली सल्ला पाइबा, मेको मरुप्ब मुर बाक्ब। हितोपदेस ६:१-५
19 जिचा दाक्बमी पाप कली यो दाक्ब। लाइश्शो लाप्चो सेल्बमी मुर आन रुश जिक्पाइक्ब।
20 मरिम्शो थुं पाइश्शो मुर आन कली मारेइम मगाप्ब। दूली पा जोल पाइब मुर हिंचा ङा श्येत जाइब।
21 मूर्ख तौमी आ आम आफ आस कली सुर्ता पपाइक्ब। मूर्ख आ आफ गेनायो ग्येरचा मताइब।
22 ग्येरसीशो थुंमी रां कली सापाइक्ब। तन्न लुक्च लशो थुंमी मुर कली सोव़पाइक्ब। हितोपदेस १५:१३-१५
23 परमप्रभु यावे आ अरेशो मटीब मुरुमी निसाफ दूली सेल्चा कली ख्रुइश्शा घूस जाइब। प्रस्थान २३:८
24 रुप्ब मुरुम आ तुइक्तीके माल्ब। तन्न मूर्खमी रागी आ सुर सम्म कोव़शो बाक्ब। हितोपदेस ४:२५
25 मूर्ख तौमी आ आफ कली सुर्ता पपाइक्ब। आ आम कली गेना हना यो ङाक्पाइक्ब।
26 दोस मताइब मुर कली सजाइ गेचा क्येङा ठेयब मुर आन कली रिम्शो पचा कली तुप्चा मरिम्शो बाक्ब।
27 जोक्ब थुं पाइश्शो मुर शुश मब्वाक्नीम। रुप्ब मुर आन गेय पचा ङोंइती मिम्शा, बाक्नीम। हितोपदेस १०:१९; याकूब १:१९
28 मूर्ख ब्वालेइ पा बाक्त हना, मूर्ख मुर यो रुप्ब मुर खोदेंशो तांइसीब। लोव़ मपाम्तेक्म हना निप्स पाइश्शो खोदेंशो तांइसीनीम। अय्युब १३:५