Proverbs 16 in Sunwar
1 मुर आन थुंमी मिम्ना मिम्न बाक्नीम। तन्न लोव़ लेत्तीक परमप्रभु यावे रे जाक्ब।
2 आंमा पशो गेय आंमा कली ठीक मिम्सीब। तन्न परमप्रभु यावेमी मुर आन थुं नाक्ब।
3 इन पशो नेल्ल परमप्रभु यावे कली जिम्मा गेन। मिनु इन मिम्शो जाक्दीप्ब। भजन संग्रह ३७:३
4 परमप्रभु यावेमी मारेइ मारेइ नेल्ल गेय पचा कली सेल्तु। आ अरेशो मटीब कली यो नोले ङा श्येत नाक्त कली सेल्तु। रोमी ९:२२
5 परमप्रभु यावे ठेयब लेश्शो आन कली तशा ग्रांग्रा दीब। मेकोपुकी सजाइ मतथु मब्रोंइनीम।
6 दाक्शा गेनायो मप्रोंइतीकेमी मरिम्शो पतीक क्याम्सीब। मिनु सु परमप्रभु यावे कली मान पा हिंबा, मेको मरिम्शो रे ङोन लाइब।
7 परमप्रभु यावेमी मुर आन पशो तशा ग्येरसाक्व हना, मेको कली आ जोरी सत्रु नु यो गारपाइश्शा वोइक्ब। उत्पत्ती ३१:२४; उत्पत्ती ३३:४
8 मरिम्शो पा चेम्शो शुश क्येट क्येङा रिम्शो पा चेम्शो इच्का खोइ क्येट ठीक बाक्ब। हितोपदेस १५:१६
9 मुरुमी आंम आ लां आंमान मिम्नीम। तन्न परमप्रभु यावेमी मेको आन गाक्तीक लां कोंइब। हितोपदेस १९:२१; येरमीया १०२३
10 परमप्रभु यावेमी पिप कली ब्वाक्पाइक्ब। मेकोमी निसाफ पशोनु, दूली निसाफ मपाइब।
11 ठीक पा नाक्तीक नु पुक्तीक परमप्रभु यावे केन बाक्ब। झोलाम बाक्शो नाक्तीक फुल्लु नेल्ल आ सेल्शो बाक्नीम। हितोपदेस ११:१
12 पिपमी मरिम्शो पाइब आन कली तशा ग्रांग्रा दीब। मारदे हना ठीक पतीकेमी आ राज्य बोल्यो सेल्ब।
13 पिपमी ठीक लोव़ पाइब आन कली तशा ग्येरसीब। थमा लोव़ पाइब आन कली दाक्ब।
14 पिप गाइक्ताक्व हना, मुर साइक्ने चाप्ब। रुप्ब मुरुमी आ गाइक्चा नाइक्पाइक्ने चाप्ब। हितोपदेस १९:१२; हितोपदेस २०:२
15 पिप आ कुल हाक्शो बाक्त हना, ब्रोंइचा गेब। मेको आ दाक्शो सोव़शो रू कली रेउ खोदेंशो बाक्ब।
16 क्येख सुन तचा क्येङा तुइक्तीक तचा रिम्शो बाक्ब। चांदी तचा क्येङा रुप्तीक तचा रिम्शो बाक्ब।
17 रिम्शो थुं पाइश्शो मुर मरिम्शो लां रे ङोन बाक्ब। मिनु मरिम्शो मपथु, होस पा बाक्ब ब्रोंइचा ताइनीम।
18 मुर खतम दुम्चा क्येङा ङोंइती ठेयब लेत्नीम। नुप्चा क्येङा ङोंइती मुर बोरनीम। हितोपदेस १८:१२
19 ठेयब लेश्शो आन रोइश्शो थोव़क योक्सीचा क्येङा ब्रेम्शो दुम्शा, श्येत जशो आइक्च मुरपुकी नु बाक्चा रिम्शो बाक्ब।
20 सुम शेंशो लोव़ नोफा दाइश्शा नेंबा, मेको मुर सोशा बोशा ग्येत्थ लाइब। सु परमप्रभु यावे कली थमा सुइक्बा, मेको ग्येरसीशो बाक्ब।
21 जोक्ब तुइक्ब थुं पाइश्शो मुर कली रुप्ब मुर देंनीम। ब्रोव़शो लोव़म शेंतीक कली बारपाइक्ब।
22 सु नु तुइक्तीके बाक्बा, मेको ब्रोंइचा गेब ब्वाक्कु बुक्तीके खोदेंशो बाक्ब। तन्न मूर्ख आन मूर्ख पतीकेमी सजाइ ताइनीम।
23 जोक्ब तुइक्ब मुरुमी लोव़ पचा क्येङा ङोंइती मिम्नीम। मोपा आन जोक्तीक बारना बारन लाइब।
24 ब्रोव़शो लोव़ खुदो खोदेंशो बाक्ब। मेकोमी थुं कली ब्रोव़शो नु रां कली बोल्यो सेल्ब। हितोपदेस १२:२५
25 मुरुमी का निक्शी लां रिम्शो बाक्ब, दे मिम्नीम। तन्न नोले मेको लां बेक्तीक लां बाक्ब।
26 गेय पाइब आन कोव़जमी मेको कली गेय पपाइक्ब। मेको आ शोव़लुमी गेय पतीक थुं गेब।
27 हिंचा ङा पा मरिम्शो पाइब मुरुमी मरिम्शो ला मिम्ब। मेको आ लोव़ मी खोदेंशो पा ब्रशो बाक्ब।
28 दूली मुरुमी जिचा पोक्ब। मिनु नोफा मुइक्बमी गारशो वारच आन कली फ्राब।
29 हुश ख्राक्श पोक्ब मुरुमी आ नेक्था ङा मुर आन कली यो हेंथे पपाइक्ब। मिनु मेको आन कली मरिम्शो लां खोइक्पाइक्ब।
30 मिक्च रिक्बमी दूली गेय पचा मिम्शो बाक्नीम। मोदेंशो मिम्शा सिक्सी पा बाक्बमी मरिम्शो पचा चिक्शो बाक्ब।
31 बोइश्शो चां मान ततीक सिरपेच खोदेंशो बाक्ब। मेको ठीक पाइब मुर आन लांम ला थीसीब। हितोपदेस २०:२९
32 लडाइ पाइब बोल्यो मुर दुम्चा क्येङा फाल्ब मुर दुम्चा रिम्शो बाक्ब। मिनु सहर कली ग्राब क्येङा आंम गाइक्चा कली तेक्ब रिम्शो बाक्ब। हितोपदेस १४:२९
33 मुरुम फेन्टे आप्शा, परमप्रभु यावे कली हिल्लो पाइनीम। मिनु परमप्रभु यावेमी लोव़ लेप्ब।