Obadiah 1 in Sunwar

1 परमप्रभु यावेमी ओबदिया कली कोंइशो लोव़ मार बाक्‍त देंशा हना, परमप्रभु, परमप्रभु यावेमी एदोम आ पर्बम लोव़ पाप्‍तु। गोपुकीमी परमप्रभु यावे रे लोव़ का नेंतक। मेकोम रागी रागीम लोव़ कुरब मुर का सोइक्‍ताक्‍व। मेकोमी “बोक्‍कीन। गो मेको नु लडाइ पथ लय।

2 गो इ कली रागी रागी ङा मुर आन दातेम नेल्‍ल क्‍येङा आइक्‍च सेल्‍नुङ। मिनु गे महिक्‍सीशो दुम्‍नेवे।

3 इ थुं ङा ठेयब लेत्‍तीकेमी इ कली जोल पाइश्‍शो बाक्‍ब। इ सहर ठेयब फुल्‍लु तार सेल्‍शो बाक्‍ब। गे डांडा तार बाक्‍नेवे। गे इ थुंमी ‘आं कली सुम उइ तोक्‍ने चाप्‍बा ङा?’ दे मिम्‍नेवे। गन्‍ती २४:२१

4 तन्‍न गे ककाकुली खोदेंशो पा इर सरीङ मेर बेरते हना यो, सोरुल आन दातेम इ ग्‍योव़ सेल्‍तीवी हना यो, गो इ कली मेक रे तोक्‍नन” दे परमप्रभु यावेम देंत।

5 मिनु खुइपुकी इ बाक्‍तीक जाक्‍तेक्‍म हना, नाक्‍दो रोइक्‍बपुकी इ बाक्‍तीक जाक्‍‍तेक्‍म हना, गे दोदेंशो पा खतम दुम्‍नेवे? मेकोपुकीम आन कली माल्‍शो खोइ ला रोइश्‍शा मलाइक्‍नीमी ङा? अङगुर सेक्‍बपुकी इ बाक्‍तीक जाक्‍शा सेक्‍तेक्‍म हना, मेकोपुकीमी इच्‍कका अङगुर मप्रोंइनीमी ङा?

6 तन्‍न एसाव आ शोंप दोपा रोंइ‍सीबा? मेको आ ख्रुइश्‍शा वोइश्‍शो शोंप दोपा माल्‍शा ग्रुंइ‍नीमी?

7 इ नेक्‍था ङा रागी ङा मुरपुकीमी इ कली जोल पाम्‍तेक्‍म। मेकोपुकीम इ कली खेदा पा खेरशा इ सांद सम्‍म चाक्‍तेक्‍म। इ वारचपुकीमी इ कली दिप्‍शा श्‍येत गेनीम। इ थुल्‍शो मुरपुकीमी इ कली ब्‍वारद दाइक्‍नीम। तन्‍न गे मारेइ मतुइक्‍नेवे।

8 परमप्रभु यावेमी “गो मेको नाक्‍त एदोम ङा जोक्‍ब तुइक्‍ब मुर आन कली खतम सेल्‍नुङ। एसाव आ डांडाम बाक्‍ब रुप्‍ब मुर आन कली साइक्‍नुङमी।

9 गे तेमान, इ लडाइ पाइबपुकी फ्राचा पुंइसीनीम। एसाव आ डांडाम बाक्‍ब मुर नेल्‍ल क्‍योरशा साइक्‍चा पुंइसी‍नीम। आमोस १:१२

10 गे इ लोक्‍ब याकूब कली हुश ख्राक्‍श पोक्‍शो आ पर्बम इ कली मुनेम सुम्‍ब। मिनु गे गेना हना यो कली जाम्‍शा लाइनेवे। योएल ४:१९

11 मेको नाक्‍त गे ङोन राप्‍शा बाक्‍ते। मेको नाक्‍त अर्को रागी ङा मुरपुकीमी मेको आ शोंप नेल्‍ल रोइश्‍शा लाइक्‍तेक्‍म। अर्को रागी ङा मुर मेको आ लाप्‍चो रे ओव़तेक्‍म। मिनु यरूसलेम आ पर्बम फेन्‍टे आप्‍तेक्‍म। गे यो मेकोपुकी खोदेंशो का बाक्‍ते। भजन संग्रह १३७:७

12 तन्‍न गे इ लोक्‍ब श्‍येत जवानु, मेको कली मदिप्‍चा माल्‍शो नवे। यहूदा ङा मुर खतम दुम्‍मा नाक्‍त गे मग्‍येरसीचा माल्‍शो नवे। मेकोपुकी श्‍येत जामे नाक्‍ती गे ठेयब लेश्‍शो लोव़ मपचा माल्‍शो नवे।

13 आं मुर हिंचा ङा श्‍येत जामे नाक्‍त, गे मेको आन लाप्‍चो रे मओव़चा माल्‍शो नवे। यहूदा ङा मुर खतम दुम्‍मा नाक्‍ती, गे मेको मरिम्‍शो पाइबपुकी नु मगारचा माल्‍शो नवे। मेको हिंचा ङा श्‍येत जामे नाक्‍ती गे मेको आन शोंप रोइश्‍शा मलाइक्‍चा माल्‍शो नवे।

14 मेको आ प्रोक्‍शा लशो मुर आन कली साइक्‍चा कली लां ग्रुम्‍तीकेमी बाप्‍शा बाक्‍चा मदुम्‍शो नवे। मेको ब्रोंइशा प्रोक्‍शो आन कली मग्‍याइक्‍चा माल्‍शो नवे।

15 परमप्रभु यावे आ निसाफ पतीक नाक्‍त रागी रागी ङा मुर नेल्‍ल आन नेक्‍था जाक्‍शो बाक्‍ब। गे दोदेंशो पशो नवे, इ कली मोदेंशोन पांइसीब। इ पशो गेय नेल्‍ल इ पियामीन मोंइसीब। योएल १:१५; येरमीया ५०:१५,२९

16 गे दोपा आं डांडाम तूङी, मोपा इ एर ओंथ बाक्‍ब रागी रागी ङा मुरुम गेना हना यो तूनीम। मिनु गेनायो मबाक्‍‍शो खोदेंशो दुम्‍नीम। येरमीया २५:१५

17 तन्‍न सियोन डांडाम चहिं प्रोक्‍शो मुरपुकी जाक्‍नीम। मेको परमप्रभु यावे आ डांडा बाक्‍ब। मिनु याकूब आ खिंमी ङोंइती आंम कली अधिकार पाइब आन कली अधिकार पाइनीम। योएल ३:५; योएल ४:१७

18 याकूब आ खिं मी दुम्‍ब। योसेफ आ खिं ब्रशो मी दुम्‍ब। एसाव आ खिं चहिं नल खोदेंशो दुम्‍ब। मेकोपुकीमी मेको कली मीम हुम्‍शा, खतम पोक्‍नीम। मिनु एसाव आ खिं ङा मुर सुइ मब्रोंइनीम” दे परमप्रभु यावेमी देंत। जकरिया १२:६

19 नेगेब ङा मुरपुकीमी एसाव आ डांडा आन के सेल्‍नीम। शेफेलाह ङा मुरपुकीम पलिस्‍ती आन रागी आन के सेल्‍नीम। मेकोपुकीमी एफ्राइम नु सामरीया ङा रू आन के सेल्‍नीम। मिनु बेन्‍यामीनम चहिं गिलाद आंम के सेल्‍ब। १राजा १६:२४

20 मिनु ग्‍याइश्‍शा लाइक्‍चा पुंइसीशो हालाहम बाक्‍शो इस्राएलीपुकीमी फोनीचीआ रे चारेफाथ सम्‍म ङा रागी आन के सेल्‍नीम। मिनु यरूसलेम रे ग्‍याइश्‍शा लाइक्‍चा पुंइसीशो सेफाराद सहरम बाक्‍शो मुरपुकीम नेगेब ङा सहर आन के सेल्‍नीम।

21 ब्रोंइशोपुकी सियोन डांडा ङोइश्‍शा कुइ‍नीम। मिनु एसाव आ डांडा कली सासन पाइनीम। मिनु मेको राज्‍य परमप्रभु यावे के दुम्‍ब।