Numbers 4 in Sunwar
1 परमप्रभु यावेमी मोसा नु हारून आस कली
2 “लेवी आ मुर आन दाते ङा कोहाथी आन कली आन खिं खिं ङा मुर पा हिक्कीस।
3 गे ३० बर्स रे ५० बर्स सम्म ङा वोंइश मुर आन कली हिक्कीस। मेकोपुकी ला ग्रुम्तीक ताम्बु ङा गेय पने चाप्नीम। गन्ती ८:२४-२५; १इतिहास २३:२४
4 मेको कोहाथी आन पचा माल्शो गेय ग्रुम्तीक ताम्बु ङा नेल्ल क्येङा चोव़खो थोव़क नु बाक्ब।
5 मिनु ग्रुम्तीक ताम्बु याक्तमेनु, हारून नु आ तौ ग्रुम्तीक ताम्बु ओव़शा, फारशो वा शोल्शा, मेको वामी कबल पशो सन्दोस सुम्चा माल्नीम।
6 मिनु नोले मेकोपुकीमी मेको आ तार रिम्शो कोक्तेमी सुम्चा माल्नीम। मेको आ तारी नीलो रङ ङा वामी सुम्चा माल्नीम। मिनु मेको आ कुरतीक कोक्के शुइक्चा माल्नीम।
7 मिनु मेकोपुकीमी कोंइतीक शोब्ले वोइक्तीक टेबल तार नीलो वा का ब्रशा, मेको आ तारी थालपुकी, थनौरोपुकी, बोसपुकी नु तूचा थोव़क चढ़ेचा कली कचौरा वोइक्चा माल्नीम। मिनु नाक्त किंत किंत ङा कोंइतीक शोब्ले यो मेको तार बाक्चा माल्ब।
8 मिनु नोले मेको आ तार लल रङ ङा वा ब्रशा, मेको आ तार रिम्शो कोक्तेम सुम्चा माल्नीम। मिनु मेको आ कुरतीक कोक्के शुइक्चा माल्नीम।
9 मेकोपुकीमी बत्ती दातीके नीलो वाम सुम्चा माल्नीम। मेको आ बत्ती, आ थनारो, आ थाल नु तेल वोइक्तीके नेल्ल सुम्चा माल्नीम। प्रस्थान २५:३१
10 मिनु मेको नेल्ल कली रिम्शो कोक्तेमी वोइश्शा, कुरतीक तारी वोइक्चा माल्नीम।
11 मेकोपुकीमी सुन के चढ़ेतीक तारी नीलो वा ब्रशा, रिम्शो कोक्तेम सुम्चा माल्नीम। मिनु मेको आ कुरतीक कोक्के शुइक्चा माल्नीम। प्रस्थान ४०:२६-२७
12 मिनु ग्रुम्तीक ताम्बुम माल्शो मारेइ मारेइ खुप्शा, नीलो वाम कुम्लो पचा माल्नीम। मिनु मेको कली रिम्शो कोक्तेम सुम्चा माल्नीम। मिनु कुरतीक तारी वोइक्चा माल्नीम।
13 मेकोपुकीमी चढ़ेतीक रे पुलु शोल्शा, मेको आ तार प्याजी रङ ङा वा ब्रचा माल्नीम।
14 मिनु मेकोपुकीमी चढ़ेतीकेम माल्शो मारेइ मारेइ थोव़की मेको आ तारी वोइक्चा माल्नीम। मी वोइक्तीके, श्ये ग्रुंइतीके, बेल्चापुकी, ब्वाक्कु वोइक्तीक ग्योंबपुकी नु चढ़ेतीक ङा मारेइ मारेइ वोइश्शा, मेको तार रिम्शो कोक्तेम सुम्चा माल्नीम। मेको आ कुरतीक कोक्के शुइक्चा माल्नीम।
15 मिनु हारून नु आ तौपुकीमी मेको ग्रुम्तीक ताम्बु ङा मारेइ मारेइ सुम्ने थुम्मे नोले कोहाथीपुकी मेको कुरथ जाक्चा माल्नीम। तन्न मेकोपुकीमी परमप्रभु यावे आ मार मार थोव़क थिचा मदुम्नीम। मेकोपुकीम थिम्तेक्म हना, बेक्नीम। कोहाथीपुकीमी ग्रुम्तीक ताम्बु ङा कुरचा माल्शो थोव़क मेकोन बाक्नीम। गन्ती ७:९; २सामुएल ६:६-७
16 चढ़ेब हारून आ तौ एलाजर बत्ती दाशो तेल, ब्रोव़शो रिना पाइक्ब धूप, नाक्त किंत किंत ङा चढ़ेतीक अन्न नु लुक्तीक तेल कली कोव़ब बाक्ब। मेको ग्रुम्तीक ताम्बु नु मेकेर ङा मारेइ मारेइ कोव़ब बाक्ब” देंत।
17 मिनु नोले परमप्रभु यावेमी मोसा नु हारून आस कली
18 “गे लेवी आन दाते ङा कोहाथी आन खिं खिं ङा मुर आन कली खतम दुम्चा मगेस।
19 गे, कोहाथी मबेक्थु, ब्रोंइमल दे नेल्ल क्येङा चोव़खो थोव़क आ नेक्था जाक्मानु, मार पचा माल्नीनी देंशा हना, हारून नु आ तौपुकी आगा ओव़शा, मेको आन कली आन आन गेय नु मार मार कुरचा माल्नीनी, मेको योक्शा गेचा माल्नीमी।
20 तन्न कोहाथीपुकीम मेको नेल्ल क्येङा चोव़खो थोव़क आन कली कोव़चा मदुम्ब। कोव़तेक्म हना, बेक्नीम” देंत। १सामुएल ६:१९
21 मिनु परमप्रभु यावेमी मोसा कली
22 “गेरशोनी आन कली यो आन खिं खिं पा हिक्मी।
23 गे ३० बर्स रे ५० बर्स सम्म ङा वोंइश मुर आन कली हिक्को। मेकोपुकी ला ग्रुम्तीक ताम्बु ङा गेय पने चाप्नीम।
24 मिनु गेरशोन आ मुर आन पतीके मार बाक्त देंशा हना, गेय पचा नु मार मार कुरचा माल्नीम।
25 ग्रुम्तीक ताम्बु ङा फारशो वा, ग्रुम्तीक ताम्बु आ सुम्तीके नु मेको तार बाक्शो रिम्शो कोक्ते नु ग्रुम्तीक ताम्बु आ ओव़तीक ङा फारशो वा कुरचा माल्नीम।
26 मिनु लाङगा ङा एर ओंथ फारशो वा, ओव़तीक ङा फारशो वा, ग्रुम्तीक ताम्बु नु चढ़ेतीक आ एर ओंथ ङा वा नु आ डोरी नु मेको आ गेय कली माल्शो नेल्ल पचा माल्नीम।
27 गेरशोन आ मुरपुकीमी हारून नु आ तौपुकीमी अरेशो खोदेंशो पा ला आन कुरतीक नु अरु गेय पने चाप्नीम। हारून नु आ तौपुकीमी मेको आन कुरचा माल्शो नु पतीक गेय नेल्ल अरेचा माल्नीम। प्रस्थान ३८:२१
28 मिनु गेरशोनीमी ग्रुम्तीक ताम्बुम पचा माल्शो गेय एकोन बाक्ब। मिनु हारून आ तौ इथामार मेको आन कली अरेब बाक्ब।
29 गे मेरारी आ मुर आन कली आन खिं खिं ङा मुर पा हिक्शा, ब्रेक्तो।
30 गे ३० बर्स रे ५० बर्स सम्म ङा वोंइश मुर आन कली हिक्को। मेकोपुकी ला ग्रुम्तीक ताम्बु ङा गेय पने चाप्नीम।
31 मिनु मेकोपुकीमी ग्रुम्तीक ताम्बु ङा मार कुरचा माल्नीम देंशा हना, ग्रुम्तीक ताम्बु ङा फलेकपुकी, मेको आन ग्याइक्तीक कोक्केपुकी, थामपुकी नु राप्पाइक्तीकपुकी कुरचा माल्नीम।
32 मिनु लाङगा ङा थाम नेल्ले, आन राप्पाइक्तीकपुकी, किलापुकी, डोरीपुकी नु मार मार अरु बाक्मा मेको कोव़चा नु कुरचा माल्नीम।
33 मेको मेरारी आ मुरपुकीम आन ग्रुम्तीक ताम्बु कली पचा माल्शो गेय बाक्ब। मिनु चढ़ेब हारून आ तौ इथामार मेको आन कली अरेब बाक्ब” देंत।
34 मोसा, हारून नु थर थर ङा मुर आन ठेयब मुरपुकीमी कोहाथी आन खिं खिं ङा मुर आन कली हिक्शा ब्रेक्ताक्म।
35 मिनु ३० बर्स रे ५० बर्स सम्म ङा मुर ला ग्रुम्तीक ताम्बुमी गेय पने चाप्बाक्तेक्म।
36 मिनु मेको आन खिं खिं ङा मुर हिक्शोनु, हजार निक्शी ७ सहे ५० जना बाक्तेक्म।
37 मेको ग्रुम्तीक ताम्बु ङा गेय पाइब कोहाथीपुकी बाक्नीम। मिनु मोसा नु हारूनमी परमप्रभु यावेमी अरेशो खोदेंशो पा मेको आन कली हिक्शा ब्रेक्शो बाक्ताक्स।
38 मिनु गेरशोनी आन खिं खिं ङा मुर आन कली हिक्शा ब्रेक्ताक्म।
39 मिनु ३० बर्स रे ५० बर्स सम्म ङा मुर ला ग्रुम्तीक ताम्बुमी गेय पने चाप्बाक्तेक्म।
40 मिनु मेको आन खिं खिं ङा मुर हिक्शोनु, हजार निक्शी ६ सहे ३० जना बाक्तेक्म।
41 मेको ग्रुम्तीक ताम्बु ङा गेय पाइब गेरशोनी बाक्नीम। मिनु मोसा नु हारूनमी परमप्रभु यावेमी अरेशो खोदेंशो पा मेको आन कली हिक्शा ब्रेक्ताक्स।
42 मिनु मेरारी आ मुर आन खिं खिं ङा मुर आन कली हिक्तेक्म।
43 मेको ३० बर्स रे ५० बर्स सम्म ङा मुर ला ग्रुम्तीक ताम्बुमी गेय पने चाप्बाक्तेक्म।
44 मिनु मेको आन खिं खिं ङा मुर हिक्शोनु, हजार सां सहे निक्शी बाक्तेक्म।
45 मेको ग्रुम्तीक ताम्बु ङा गेय पाइब मेरारी आ मुर बाक्नीम। मिनु मोसा नु हारूनमी परमप्रभु यावेमी अरेशो खोदेंशो पा मेको आन कली हिक्शा ब्रेक्ताक्स।
46 मिनु मोसा, हारून नु इस्राएल आ थर ङा मुर आन ठेयब मुरपुकीमी लेवी आ मुर नेल्ल आन खिं खिं ङा मुर हिक्शा ब्रेक्ताक्म।
47 मिनु ३० बर्स रे ५० बर्स सम्म ङा मुर ला ग्रुम्तीक ताम्बुमी गेय पने नु मार मार कुरने चाप्बाक्तेक्म।
48 मिनु मेको आन खिं खिं ङा मुर हिक्शोनु ८ हजार ५ सहे ८० जना बाक्तेक्म।
49 मिनु परमप्रभु यावेमी अरेशो खोदेंशो पा मोसामी मेको आन कली हिक्शा, मार गेय पचा माल्नीमी, मार कुरचा माल्नीमी, मेको अरेम्तीमी। मिनु परमप्रभु यावेमी मोसा कली अरेशो खोदेंशो पा मेको आन कली हिक्शो बाक्त।