Numbers 36 in Sunwar
1 योसेफ आ युइ, मनस्से आ चच माकीर आ तौ गिलाद आ खिं खिं ङा योसेफ आ थर का ङा ठेयब मुरपुकी, मोसा नु इस्राएली आन थर थर ङा ठेयब मुर आन ङोंइती जाक्तेक्म।
2 मिनु मेकोपुकीमी “परमप्रभु यावेमी आंइ होव़प, इन कली इस्राएली आन कली रागी योक्शा गेचा, दे अरेशो बाक्त। मिनु आंइ लोक्ब सेलोफेहाद आ शोंप चहिं मेको आ तमी आन कली गेचा माल्ब, दे परमप्रभु यावेमी अरेशो बाक्त। गन्ती २६:५५
3 तन्न मेको मीश आलपुकीम इस्राएली आन अरु थर ङा मुर नु ग्युंबे पाम्तेक्म हना, मेको आन शोंप वोंइश मुर आन शोंपोम तेम्सीब। मोपा मेको आन भाग आंइ किकी पिपी आन रागी रे जाम्शा लाइब।
4 मिनु प्रोंइतीक बर्स जाक्मेनु, मेको मीश मुर आन रू यो ग्युंबे पा लाइब मुर आन रूम तेम्सीब। मोपा गो आंइ थर रागी रे जाम्शा लाइब” देंतेक्म। लेवी २५:१०-१३
5 मिनु परमप्रभु यावेमी मोसा कली अरेशो खोदेंशो पा मोसामी इस्राएली आन कली “योसेफ आ तौ आन थर ङा मुर आन देंशो लोव़ थमा बाक्ब।
6 परमप्रभु यावेमी सेलोफेहाद आ तमी आन पर्बम अरेशो मार बाक्त देंशा हना, मेकोपुकीमी आन दाक्शो वोंइश आल ग्युंबे पने चाप्नीम। तन्न आन आफ आ खिं खिं ङा मुर नु ला ग्युंबे पने चाप्नीम।
7 मो दुम्मेनु इस्राएली आन रागी थर का रे अर्को थरम मयाक्सीब। मारदे हना इस्राएली नेल्ल आन किकी पिपी आन रागीम बाक्चा माल्नीम।
8 सुइ मीश आल आ आफ आ शोंप तशो बाक्त हना, मेकोमी आ आफ आ खिं खिं ङा मुर का ग्युंबे पचा माल्ब। मोपा इस्राएली नेल्ले आन किकी पिपी आन थर ङा रागी लीब।
9 मिनु इस्राएली आन रागी थर का रे अर्को थरम याक्चा मदुम्ब। मोपा इस्राएली नेल्ल आन आंम रागीम बाक्चा ताइनीम” देंत।
10 सेलोफेहाद आ तमीपुकीमी परमप्रभु यावेमी मोसा कली अरेशो खोदेंशो पा पाम्तेक्म।
11 सेलोफेहाद आ तमीपुकी महलाह, तिरचा, होग्ला, मिल्का नु नोआहमी आन आफ आ लोक्ब आन तौपुकी नु ग्युंबे पाम्तेक्म। गन्ती २६:२९-३४
12 मेकोपुकीमी योसेफ आ तौ मनस्से आ थर ङा मुरपुकी नु ग्युंबे पाम्तेक्म। मोपा मेको आन शोंप आन थर नु आन आफ आ खिं खिं ङा मुर नु लीत।
13 एको परमप्रभु यावेमी मोसा कली शेंतीके नु ठीक पतीके लोव़ बाक्ब। मिनु मोसामी इस्राएली आन कली नेल्ल अरेशो बाक्ब। मेना मेकोपुकी यर्दन खोला आ शुंइच, मोआब ङा दिंममी यरीको आ नेक्था बाक्तेक्म।