Numbers 3 in Sunwar
1 परमप्रभु यावेमी मोसा नु सीनै डांडाम लोव़ पची ना मोसा नु हारून आस खिं ङा मुर सु सु बाक्तेक्म देंशा हना, प्रस्थान ६:२३
2 हारून आ तौ आन नें, आ ङोंइती जरमेशो तौ नादाब नु अबीहु, एलाजर नु इथामार बाक्तेक्म।
3 मेको नेल्ल तेल लुक्शो चढ़ेब बाक्तेक्म। हारूनमी मेको आन कली चढ़ेतीक गेय पचा, दे तेल लुक्ताक्व। प्रस्थान ४०:१५
4 नादाब नु अबीहु सीनै ङा गोरशो रागीम बेक्ताक्स। मारदे हना, मेको निक्शीमी परमप्रभु यावेमी मदुम्ब देंशो अर्को मी धूप चोतीकेम कुर पा, परमप्रभु यावे आ ङोंइती चढ़ेम्ताक्स। मिनु परमप्रभु यावे आ ङोंइती बेक्ताक्स। मिनु मेको आस के आल मबाक्म। मोपतीके आ तौ एलाजर नु इथामार निक्शीमी ला आस आफ आ ङोंइती चढ़ेतीक गेय पाम्ताक्स। लेवी १०:१-२
5 परमप्रभु यावेमी मोसा कली
6 “लेवी आ थर ङा मुर आन कली ब्रेश्शा, मेको आन कली चढ़ेब हारून आ ङोंइती राप्पाइक्मी। मिनु मेकोपुकीमी मेको कली वारच पचा माल्नीम। प्रस्थान ३२:२९
7 मिनु मेकोपुकीमी हारून कली वारच पा इस्राएली नेल्ल आन पर्बम ग्रुम्तीक ताम्बु आ ङोंइती गेय पचा माल्नीम। गन्ती १८:३; गन्ती १६:९
8 मेकोपुकीमी ग्रुम्तीक ताम्बु ङा मारेइ मारेइ कोव़चा माल्नीम। मिनु मेकोपुकीमी ग्रुम्तीक ताम्बु ङा इस्राएली आन पचा माल्शो गेय पचा माल्नीम। गन्ती ४:-
9 गे मेको लेवी आ मुर आन कली हारून नु आ तौ आन कली गेचा माल्नेवे। मेको इस्राएली आन दाते रे योव़शा हारून कली गेशो बाक्नीम।
10 मिनु गे हारून नु आ तौ आस कली चढ़ेबम पचा माल्शो गेय पपाइक्मी। मेकोपुकी ङा लाक्शा अर्को सुइ मुरुम मो पाम्तेक्म हना, मेको आन कली साइक्चा माल्नीम” देंत। गन्ती १:१५
11 मिनु लेंशा परमप्रभु यावेमी मोसा कली
12 “गो इस्राएली आन ङोंइती जरमेशो तौ आन पा ङा लेवी आ थर ङा मुर आन कली इस्राएली आन दाते रे योव़तामी। मोपतीके लेवी आ मुर आं केन बाक्नीम। गन्ती ८:१६; प्रस्थान १३:२
13 ङोंइती जरमेशो नेल्ल आं के बाक्नीम। इजीप्तमी ङोंइती जरमेशो नेल्ल सदुमी नाक्ती, गो इस्राएली आन ङोंइती जरमेशो आं कली वोंइसाक्यी। मिनु गो मुर नु बी ब्यफ, क्यारश भेडा नेल्ल आं कली वोंइसाक्यी। मेको आं के बाक्नीम। गो परमप्रभु यावे नङ” देंत।
14 मिनु परमप्रभु यावेमी सीनै ङा गोरशो रागीमी मोसा कली
15 “गे लेवी आ थर ङा मुर आन कली आन खिं खिं पा हिक्मी। महिना का गाप्शो नु मेको क्येङा लाक्शो वोंइश मुर नेल्ल आन कली हिक्मी” देंत।
16 मिनु मोसामी परमप्रभु यावेमी अरेशो खोदेंशो पा मेको आन कली हिक्तीमी।
17 मिनु लेवी आ तौ सु सु बाक्तेक्म देंशा हना, गेरशोन, कोहाथ नु मेरारी बाक्तेक्म। प्रस्थान ६:१६-१९; गन्ती २६:५७-६४
18 गेरशोन आ तौ लिब्नी नु आ खिं ङा मुर नु शिमेइ नु आ खिं ङा मुर बाक्तेक्म।
19 कोहाथ आ तौ अम्राम नु आ खिं ङा मुर नु इच्हार नु आ खिं ङा मुर, हेब्रोन नु आ खिं ङा मुर नु उज्जीएल नु आ खिं ङा मुर बाक्तेक्म।
20 मेरारी आ तौ माहली नु आ खिं ङा मुर नु मुशी नु आ खिं ङा मुर बाक्तेक्म। एको लेवी आ थर ङा मुर आन खिं खिं ङा मुर बाक्तेक्म।
21 गेरशोन रे पा लिब्नी नु शिमेइ आस खिं खिं ङा मुर दुम्तेक्म। मेकोन गेरशोन आ खिं खिं ङा मुर बाक्नीम।
22 मेकोपुकी महिना का गाप्शो नु मेको क्येङा लाक्शो वोंइश मुर हिक्शोनु ७ हजार ५ सहे बाक्तेक्म।
23 गेरशोन आ खिं ङा मुर आन बाक्तीके ग्रुम्तीक ताम्बु आ नोले, पच्छिम गे दुम्चा माल्ब।
24 गेरशोनी आन खिं ङा ठेयब मुर, लाएल आ तौ एली-आसाफ बाक्त।
25 गेरशोन आ मुरपुकीमी ग्रुम्तीक ताम्बु कली सुम्तीके, ग्रुम्तीक ताम्बु आ आगा ओव़तीक ङा फारशो वा,
26 लाङगा ङा फारशो वा, ताम्बु नु चढ़ेतीक आ एर ओंथ ङा लाङगा आ आगा ओव़तीक ङा फारशो वा नु ताम्बु ङा डोरीपुकी कोव़चा माल्बाक्तेक्म।
27 कोहाथ रे पा अम्राम आ खिं ङा मुर, इच्हार आ खिं ङा मुर, हेब्रोन आ खिं ङा मुर नु उज्जीएल आ खिं ङा मुरपुकी दुम्तेक्म। मेको कोहाथ आ खिं खिं ङा मुर बाक्नीम।
28 मेकोपुकी महिना का गाप्शो नु मेको क्येङा लाक्शो वोंइश मुर हिक्शोनु ८ हजार ६ सहे बाक्तेक्म। मिनु मेकोपुकी ग्रुम्तीक ताम्बु ङा गेय पाइब आन कली वारच पाइब बाक्तेक्म।
29 कोहाथ आ खिं ङा मुर आन बाक्तीके ग्रुम्तीक ताम्बु आ दक्खिन गे दुम्चा माल्ब।
30 कोहाथी आन खिं ङा ठेयब मुर उज्जीएल आ तौ, एली-जाफान बाक्ब। लेवी १०:४
31 कोहाथीपुकीमी कबल पशो सन्दोस, शोब्ले वोइक्तीक टेबल, बत्ती दातीके, चढ़ेतीक निक्शी नु चढ़ेब आन माल्शो मारेइ मारेइ नु नेल्ल क्येङा चोव़खो कोठा ङा फारशो वा कोव़चा माल्बाक्तेक्म। गन्ती ७:९
32 मिनु चढ़ेब हारून आ तौ एलाजर चहिं लेवी आन थर ङा ठेयब मुर आन नेल्ल क्येङा ठेयब मुर बाक्त। मिनु मेको ग्रुम्तीक ताम्बु ङा गेय पाइब नेल्ल आन कली कोव़ब मुर बाक्त।
33 मेरारी रे पा माहली आ खिं ङा मुर नु मुशी आ खिं ङा मुर बाक्तेक्म। एको मेरारी आ खिं खिं ङा मुर बाक्नीम।
34 मेकोपुकी महिना का गाप्शो नु मेको क्येङा लाक्शो वोंइश मुर नेल्ल हिक्शोनु ६ हजार सहे निक्शी बाक्तेक्म।
35 मेरारी आ खिं ङा ठेयब मुर अबीहेल आ तौ सुरीएल बाक्ब। मेरारी आ खिं ङा मुर आन बाक्तीके ग्रुम्तीक ताम्बु आ उत्तर गे दुम्चा माल्ब।
36 मेरारी आ तौपुकीमी ग्रुम्तीक ताम्बु ङा फलेकपुकी, थामपुकी नु आन राप्पाइक्तीकपुकी नु आन मारेइ मारेइ कोव़चा माल्नीम।
37 मेकोपुकीमी लाङगा एर ओंथ ङा थामपुकी नु आन राप्पाइक्तीकपुकी, किलापुकी नु डोरीपुकी कोव़चा माल्नीम।
38 मोसा, हारून नु आस तौ आन बाक्तीके ग्रुम्तीक ताम्बु आ ङोंइती पूर्ब गे, नां दाप्तीके गे दुम्चा माल्बाक्त। मेकोपुकीमी ग्रुम्तीक ताम्बुम इस्राएली आन पर्बम मार मार पचा माल्शो बाक्मे, मेको पचा माल्बाक्तेक्म। मेकोपुकी ङा लाक्शा अर्को सुइ मुरुम मो पाम्तेक्म हना, मेको आन कली साइक्चा माल्नीम।
39 मोसा नु हारूनमी परमप्रभु यावे आ देंशो खोदेंशो पा हिक्शो लेवी आ थर ङा खिं खिं ङा मुर महिना का गाप्शो नु मेको क्येङा लाक्शो नेल्ल २२ हजार जना बाक्तेक्म।
40 मिनु परमप्रभु यावेमी मोसा कली “महिना का गाप्शो नु मेको क्येङा लाक्शो इस्राएली आन ङोंइती जरमेशो तौ नेल्ल आन कली हिक्शा आन नें ब्रेक्तो।
41 मिनु गे इस्राएली आन ङोंइती जरमेशो तौ आन पा ङा लेवी आ मुर आन कली आं के सेल्मी। मोपा इस्राएली आन ङोंइती जरमेशो बी ब्यफ क्यारश भेडा आन पा ङा लेवी आन बी ब्यफ क्यारश भेडा आं के सेल्मी। गो परमप्रभु यावे नङ” देंत। गन्ती १८:१५
42 मिनु मोसामी परमप्रभु यावेमी अरेशो खोदेंशो पा इस्राएली आन ङोंइती जरमेशो तौ आन कली हिक्तीमी।
43 मिनु मेकोपुकी महिना का गाप्शो नु मेको क्येङा लाक्शो ङोंइती जरमेशो आन नें ब्रेक्शा, हिक्शोनु नेल्ल २२ हजार सहे निक्शी ७३ जना बाक्तेक्म।
44 मिनु लेंशा परमप्रभु यावेमी मोसा कली
45 “इस्राएली आन ङोंइती जरमेशो तौ आन पा ङा लेवी आ मुर आं के सेल्मी। मिनु मेको आन बी ब्यफ, क्यारश भेडा आन पा ङा लेवी आ मुर आन बी ब्यफ, क्यारश भेडा आं के सेल्मी। लेवी आ मुर आं के बाक्नीम। गो परमप्रभु यावे नङ।
46 मिनु लेवी आन क्येङा शुश दुम्शो इस्राएली आन ङोंइती जरमेशो तौ सहे निक्शी ७३ जना बाक्तेक्म। मेको आन कली प्रोंइचा माल्बाक्त।
47 मेको आन कली प्रोंइचा कली का के ५ शेकेल ताक्को। ग्रुम्तीक ताम्बु ङा शेकेल का २० गेराह ङा बाक्ब। गेराह का ०.६ ग्राम बाक्ब। ग्रुम्तीके ताम्बु ङा शेकेल १२ ग्राम बाक्ब।
48 मिनु गे इस्राएली आन कली प्रोंइचा कली गेशो शेकेल हारून नु आ तौ आन कली गेचा माल्नेवे” देंत। शेकेल इस्राएली आन क्येट बाक्ब। बजार ङा शेकेल ११.५ ग्राम बाक्ब। ताम्बु कली गेतीक शेकेल चहिं १२ ग्राम बाक्ब। मेको सुन के नु चांदी के शेकेल बाक्नीम।
49 मिनु मोसामी लेवी आन क्येङा शुश दुम्शो, प्रोंइचा माल्शो मुर रे प्रोंइतीक क्येट ताक्तु।
50 मिनु मेकोमी इस्राएली आन ङोंइती जरमेशो तौ रे प्रोंइतीक क्येट ताक्शा, मेको हजार का सहे सां ६५ ताम्बु ङा शेकेल बाक्तेक्म।
51 मिनु मोसामी परमप्रभु यावेमी अरेशो खोदेंशो पा, मेको प्रोंइतीक क्येट हारून नु आ तौ आन कली गेम्तीमी।