Numbers 28 in Sunwar
1 परमप्रभु यावेमी मोसा कली
2 “गे इस्राएली आन कली मीम चोशा चढ़ेतीके आं जचा थोव़क, आं दाक्शो ब्रोव़शो रिना पाइश्शो चढ़ेतीके गे आं देंशो नाक्त चढ़ेचा माल्नीम, दे शेंचा माल्नेवे। लेवी २१:६
3 मिनु गे मेको आन कली ‘गे परमप्रभु यावे कली मीम चोशा चढ़ेतीके मार चढ़ेचा माल्नीनी देंशा हना, मारेइ मदुम्शो थम रिम्शो बर्स का गाप्शो पाठा निक्शी नाक्त किंत किंत चढ़ेचा माल्नीनी। प्रस्थान २९:३८-४२
4 मिनु का सुनी नु का नाक्दो चढ़ेचा माल्नीनी।
5 मेको नु अन्न चढ़ेतीके कली एफाह का ङा १० भाग ङा भाग का रिम्शो फस नु हिन का ङा ४ भाग ङा भाग का ख्राक्शो तेल ब्वाइश्शा चढ़ेचा माल्नीनी। एफाह का २२ लिटर पुक्तीक बाक्ब। हिन का ४ लिटर बाक्ब। ४ भाग ङा भाग का लिटर का बाक्ब।
6 एको परमप्रभु यावे कली गेना हना यो मीम चोशा चढ़ेतीके बाक्ब। मेको आ दाक्शो ब्रोव़शो रिना पाइश्शो सीनै डांडाम देंशो खोदेंशो पा चढ़ेतीके बाक्ब।
7 मेको नु तूचा थोव़क चढ़ेतीके पाठा का कली हिन का ङा ४ भाग ङा भाग का अङगुर शांबु चढ़ेचा माल्नीनी। मेको परमप्रभु यावे आ बाक्तीकेम परमप्रभु यावे आ ङोंइती मोइक्चा माल्नीनी।
8 मेको अर्को पाठा नां रिक्चावानु, चढ़ेचा माल्नीनी। मेको नु सुनी ङा खोदेंशो पा अन्न चढ़ेतीके नु तूचा थोव़क चढ़ेतीके चढ़ेचा माल्नीनी। एको परमप्रभु यावे कली मीम चोशा चढ़ेशो आ दाक्शो ब्रोव़शो रिना पाइश्शो चढ़ेतीके बाक्ब।
9 मिनु नाइक्तीक नाक्तीम मारेइ मदुम्शो थम रिम्शो बर्स का गाप्शो पाठा निक्शी चढ़ेचा माल्नीनी। मेको नु अन्न चढ़ेतीके तेल ब्वाइश्शो रिम्शो फस एफाह का ङा १० भाग ङा भाग निक्शी चढ़ेचा माल्नीनी। मिनु मेको नु तूचा थोव़क चढ़ेतीके यो चढ़ेचा माल्नीनी। एफाह का २२ लिटर पुक्तीक बाक्ब।मत्ती १२:५
10 मेको नाइक्तीक नाक्ती ङा चोशा चढ़ेतीके बाक्ब। मेको नाक्त किंत किंत ङा चोशा चढ़ेतीके नु तूचा थोव़क चढ़ेतीके चढ़ेशा यो मेको चढ़ेचा माल्नीनी।
11 मिनु गे नेल्ल महिना ङा ङोंइती ङा नाक्त परमप्रभु यावे कली चोशा चढ़ेतीके चढ़ेचा माल्नीनी। मेको ब्यफ निक्शी, सांड का नु ७ ओटा मारेइ मदुम्शो थम रिम्शो बर्स का का गाप्शो पाठा चढ़ेचा माल्नीनी। गन्ती १०:१०; इजीकीएल ४६:१,३,६; यसैया १:१३
12 मिनु मेको ब्यफ का का पा नु अन्न चढ़ेतीके तेलम निशो रिम्शो फस एफाह ङा १० भाग ङा भाग सां चढ़ेचा माल्नीनी। मेको सांड का नु अन्न चढ़ेतीके तेलम निशो रिम्शो फस एफाह का ङा १० भाग ङा भाग निक्शी चढ़ेचा माल्नीनी। एफाह का २२ लिटर पुक्तीके बाक्ब।गन्ती १५:२-१२
13 मिनु मेको ७ ओटा पाठा नु का का पा एफाह ङा १० भाग ङा भाग का तेलम निशो रिम्शो फस चढ़ेचा माल्नीनी। एको परमप्रभु यावे कली आ दाक्शो ब्रोव़शो रिना पाइश्शो मीम चोशा चढ़ेतीके बाक्ब।
14 मेको नु तूचा थोव़क चढ़ेतीके ब्यफ का का नु आधा हिन अङगुर शांबु बाक्चा माल्ब। सांड नु हिन का ङा भाग सां ङा भाग का अङगुर शांबु बाक्चा माल्ब। मिनु पाठा नेल्ल नु हिन का ङा ४ भाग ङा भाग का अङगुर शांबु चढ़ेचा माल्नीनी। मेको बर्स ङा महिना नेल्ल ङा औंसीम चोशा चढ़ेतीके बाक्नीम।
15 मिनु पाप पशो आ पर्बम बोका का परमप्रभु यावे कली चढ़ेचा माल्नीम। मेको नाक्त किंत किंत ङा चोशा चढ़ेतीक नु तूचा थोव़क चढ़ेतीके चढ़ेशा यो मेको चढ़ेचा माल्नीनी।
16 मिनु ङोंइती ङा महिना ङा १४ नाक्ती परमप्रभु यावे कली पास्सा चाड ङा चढ़ेतीके चढ़ेचा माल्नीनी। लेवी २३:५-१४
17 मिनु मेको महिना ङा १५ नाक्ती ठेयब चाड का मानेचा माल्नीम। मेको चाडम ७ नाक्त सम्म बोरब ओख्ती मसुप्शो शोब्ले जचा माल्नीनी।
18 ङोंइती ङा नाक्तीम परमप्रभु यावे नु ग्रुम्तीके का दुम्चा माल्ब। मेको नाक्ती गे काइ गेय मपने।
19 गे परमप्रभु यावे कली मीम चोशा चढ़ेतीके चढ़ेचा माल्नीनी। मार चढ़ेचा माल्नीनी देंशा हना, ब्यफ निक्शी, सांड का नु बर्स का का गाप्शो ७ ओटा पाठा चढ़ेचा माल्नीनी। मेको नेल्ल मारेइ मदुम्शो थम रिम्शो बाक्चा माल्नीम।
20 मेको नु अन्न चढ़ेतीके तेल ब्वाइश्शो रिम्शो फस दुम्चा माल्ब। मेको ब्यफ का नु एफाह का ङा १० भाग ङा भाग सां चढ़ेचा माल्नीनी। मेको सांड का नु एफाह का ङा १० भाग ङा भाग निक्शी चढ़ेचा माल्नीनी। एफाह का २२ लिटर खोदेंशो बाक्ब।
21 मिनु मेको ७ ओटा पाठा नु एफाह ङा १० भाग ङा भाग का का पा रिम्शो फस चढ़ेचा माल्नीनी।
22 मिनु इन पाप आ पर्बम पाप क्याम्तीक गेय पचा कली बोका का चढ़ेचा माल्नीनी।
23 मिनु सुनी ङा चोशा चढ़ेतीके, मेको गेना हना यो पचा माल्शो चोशा चढ़ेतीक बाक्ब, मेको चढ़ेचा माल्नीनी।
24 गे मोदेंशो चढ़ेतीके ७ नाक्त सम्म नाक्त किंत किंत जचा थोव़क कली चढ़ेचा माल्नीनी। मेको परमप्रभु यावे कली आ दाक्शो ब्रोव़शो रिना पाइश्शो मीम चोशा चढ़ेतीक बाक्ब। मेको नाक्त किंत किंत ङा चोशा चढ़ेतीके नु तूचा थोव़क चढ़ेतीके चढ़ेशा यो मेको चढ़ेचा माल्नीनी।
25 मिनु ७ नाक्तीम परमप्रभु यावे नु ग्रुम्तीके का दुम्चा माल्ब। मेको नाक्ती गे काइ गेय मपने।
26 ङोंइती मीशो अन्न नु फल फुल ङा चाड नाक्त गे परमप्रभु यावे कली नक अन्न रे अन्न चढ़ेतीक चढ़ेनीनी। मेको हप्ता ङा चाड बाक्ब। मेना परमप्रभु यावे नु ग्रुम्तीके का दुम्चा माल्ब। मेको नाक्ती गे काइ गेय मपने। लेवी २३:१५-२१; ब्यवस्था १६:१०
27 गे परमप्रभु यावे कली चोशा चढ़ेतीके चढ़ेचा माल्नीनी। मेको परमप्रभु यावे कली आ दाक्शो ब्रोव़शो रिना पाइश्शो चढ़ेतीके बाक्ब। गेपुकीमी ब्यफ निक्शी, सांड का नु बर्स का का गाप्शो ७ ओटा पाठा चढ़ेचा माल्नीनी।
28 मेको नु अन्न चढ़ेतीके तेल ब्वाइश्शो रिम्शो फस दुम्चा माल्ब। मेको ब्यफ का नु एफाह का ङा १० भाग ङा भाग सां चढ़ेचा माल्नीनी। मेको सांड का नु एफाह का ङा १० भाग ङा भाग निक्शी चढ़ेचा माल्नीनी। एफाह का २२ लिटर खोदेंशो बाक्ब।
29 मिनु मेको ७ ओटा पाठा नु भाग का रिम्शो फस चढ़ेचा माल्नीनी।
30 मिनु इन पाप आ पर्बम पाप क्याम्तीक गेय पचा कली बोका का चढ़ेचा माल्नीनी।
31 मिनु नाक्त किंत किंत ङा चोशा चढ़ेतीक नु मेको अन्न चढ़ेतीक गेपुकीम मेको नु आ तूचा थोव़क चढ़ेतीक चढ़ेचा माल्नीनी। मेको ब्यफ, सांड, पाठा नेल्ल मारेइ मदुम्शो थम रिम्शो बाक्चा माल्नीम।