Numbers 27 in Sunwar
1 योसेफ आ तौ मनस्से, मनस्से आ तौ माकीर, माकीर आ तौ गिलाद, गिलाद आ तौ हेफेर, हेफेर आ तौ सेलोफेहाद आ तमीपुकी महलाह, नोआह, होग्ला, मिल्का नु तिरचा बाक्तेक्म। गन्ती २६:३३; यहोसु १७:३-६
2 मेकोपुकी मोसा, चढ़ेब एलाजर, ठेयब मुरपुकी नु मेकेर बाक्ब मुर नेल्ले आन ङोंइती ग्रुम्तीक ताम्बु आ लाप्चो आ ङोंइती बाक्तेक्म।
3 मिनु सेलोफेहाद आ तमीपुकीमी “आंइ आफ गोरशो रागीम बेक्त। तन्न मेको परमप्रभु यावे आ पर्बम मरिम्शो पा बोक्ब कोराह आ हुलम मबाक्शो बाक्त। तन्न मेको आ आंम पाप पतीके बेक्त। मिनु मेको के तौ मबाक्म। गन्ती १६:७; उत्पत्ती ३:१९
4 मिनु तौ मबाक्तीके आंइ आफ आ नें आ थर आ मुर आन दाते रे मारदे क्याम्सीबा? आंइ आफ आ लोक्बपुकी नु आंइ कली यो अङस गेने” देंतेक्म।
5 मिनु मोसामी मेको आन पोक्शो लोव़ परमप्रभु यावे आ ङोंइती चाक्तु।
6 मिनु परमप्रभु यावेमी मोसा कली
7 “सेलोफेहाद आ तमीपुकीम पोक्शो लोव़ ठीक बाक्ब। गे थमा पा मेको आन कली आन आफ आ लोक्ब आन दातेमी अङस गेचा माल्नेवे। मिनु गे मेको आन आफ आ अङस मेको आन कली गेमी।
8 मिनु गे इस्राएली आन कली ‘सुइ मुर तौ मथिथु, बेक्त हना, मेको आ तमी आन कली आ अङस गेचा माल्नीनी।
9 मेको के तमी यो मबाक्त हना, मेको आ अङस आ लोक्ब आन कली गेचा माल्नीनी।
10 मेको के आ लोक्ब यो मबाक्त हना, मेको आ अङस आ आफ आ लोक्ब कली गेचा माल्नीनी।
11 मिनु मेको आ आफ आ लोक्ब यो मबाक्त हना, मेको आ अङस आ थर ङा नेल्ल क्येङा आ नेक्था ङा मुर कली गेचा माल्नीनी। मिनु मेको अङस मेको केन दुम्ब’ दे माइक्मी” देंत। मेको लोव़ परमप्रभु यावेमी मोसा कली देंशो, इस्राएली आन कली फुल्लुम मुशा ब्रेक्शो नु अरेशो लोव़ बाक्ब।
12 मिनु परमप्रभु यावेमी मोसा कली “गे एको अबारीम पहाड ङा डांडा ङोंइसो। मिनु इस्राएली आन कली गेशो रागी कोव़ङो। गन्ती २१:११; ब्यवस्था ३२:४८-५२
13 मिनु गे मेको रागी तवी नोले, गे इ लोक्ब हारून खोदेंशो पा इ किकी पिपी नु बाक्थ लाइनेवे। गन्ती २०:२४-२८
14 मारदे हना जीन ङा गोरशो रागीमी मुरपुकी गो नु जिचा पोक्ग्मेनु, गे यो मटिसी। मेरीबाथ-कादेश ङा ब्वाक्कुम मुर आन ङोंइती गे आं कली ठेयब मसेल्यीसी” देंत। गन्ती २०:१२-१३
15 मिनु मोसामी परमप्रभु यावे कली
16 “परमप्रभु यावे, मुर नेल्ल आन ब्रोंइचा गेब परमप्रभु, एको मुर आन कली लां कोंइब मुर का वोतीन। गन्ती १६:२२
17 मिनु मेको मुर आन ङोंइती गाक्ल। मिनु मेको आन कली लतीक नु जाक्तीक लां कोंइदल। मोपा परमप्रभु यावे आ मुर गोठला मबाक्शो भेडा खोदेंशो मदुम्मल” देंत। मीका ५:३; मत्ती ९:३६
18 मिनु परमप्रभु यावेमी मोसा कली “गे आं सोक्त पाइश्शो नून आ तौ यहोसु कली चाक्शा, इ गुइ मेको आ तार वोतो। प्रस्थान ३३:११; ब्यवस्था ३४:९
19 मिनु मेको कली चढ़ेब एलाजर नु मुर नेल्ल आन ङोंइती राप्पतो। मिनु मेको मुर नेल्लेम तचा ङा पा मेको कली एको गेय जिम्मा गेवो।
20 मोपा गे मेको कली इ अधिकार गेवो। मिनु इस्राएली नेल्लेमी मेको आ देंशो टीमेक्ल। प्रस्थान ३४:२९-३०; २राजा २:९,१५
21 मिनु यहोसु चढ़ेब एलाजर आ ङोंइती राप्चा माल्ब। मिनु एलाजरमी ऊरीम यहोसु आ पर्बम मार देंबा, दे परमप्रभु यावे आ ङोंइती हिल्लो पचा माल्ब। यहोसु आ देंशोमी इस्राएली नेल्ले मेको नु लडाइ पथ लचा नु लेत्चा माल्नीम” देंत। प्रस्थान २८:३०; ब्यवस्था ३३:८
22 मिनु मोसामी परमप्रभु यावेमी अरेशो खोदेंशो पा पाप्तु। मेकोमी यहोसु कली चाक्शा चढ़ेब एलाजर नु इस्राएली नेल्ल आन ङोंइती राप्पाइक्तु।
23 मिनु मोसामी परमप्रभु यावेमी देंशो खोदेंशो पा आ गुइ यहोसु आ तार वोइश्शा, आ गेय पचा कली जिम्मा गेप्तु।