Numbers 25 in Sunwar

1 इस्राएलीपुकी शित्तीममी बाक्‍मानु, मुरपुकी मोआबी आन तमीपुकी नु इप्‍शा, मरिम्‍शो पचा गोम्‍तेक्‍म। गन्‍ती ३३:४९; १कोरिन्‍थी १०:८

2 मिनु मेकोपुकीम इस्राएली आन कली आन देवी देवता आन कली चढ़ेतीकेम ब्रेत्‍ताक्‍म। मिनु मेकोपुकीम मेको आन भोज जशा, मेको आन देवी देवता आन ङोंइती बाप्‍तेक्‍म।

3 मोपा इस्राएलीपुकीम पेओर डांडा ङा बाल देवता कली पूजा पचा गोम्‍तेक्‍म। मिनु परमप्रभु यावे इस्राएली आन पर्बम गाइक्‍ताक्‍व। ब्‍यवस्‍था ४:३; भजन संग्रह १०६:२८

4 मिनु परमप्रभु यावेमी मोसा कली “एको मुर आन ठेयब मुर नेल्‍ल आन कली चाक्‍शा क्‍युक्‍शा साइश्‍शा, परमप्रभु यावे आ ङोंइती नाप्‍शो नांम वोइक्‍मी। मिनु परमप्रभु यावे इस्राएली आन पर्बम आ थाम्‍पा गाइश्‍शो नांइसीब” देंत। ब्‍यवस्‍था २१:२२-२३; २सामुएल २१:६-९

5 मिनु मोसाम इस्राएली आन निसाफ पाइब आन कली “गे नेल्‍लेमी पेओर डांडा ङा बाल देवता कली पूजा पाइब इन मुर नेल्‍ल आन कली साइक्‍चा माल्‍नीनी” दे माइक्‍तीमी। प्रस्‍थान ३२:२७

6 मिनु इस्राएलीपुकी ग्रुम्‍तीक ताम्‍बु आ ओव़तीकेम ङाक्‍शा बाक्‍मानु, मेना इस्राएली काम मोसा नु इस्राएली नेल्‍ल आन ङोंइती आ खिंम मिदयानी मीश का चाक्‍तु। गन्‍ती ३१:१६

7 मिनु चढ़ेब हारून आ चच, एलाजर आ तौ फिनेहासमी मेको तशा, मेको बोक्‍शा, आ गुइमी तूतीक का शेशा, प्रस्‍थान ६:२५

8 मेको इस्राएली आ नोनोले लशा, आ बाक्‍तीक ओव़शा, मेको इस्राएली नु मेको मीश मुर निम्‍फा आस कली एर ओंथ ख्रिप्‍पाइश्‍शा थोक्‍तीम्‍सी। मिनु इस्राएली आन दाते रे मेको मुर बेक्‍तीक रोइ जाम्‍त।

9 तन्‍न मेको मुर बेक्‍तीक रोइम बेक्‍बपुकी २४ हजार बाक्‍तेक्‍म। भजन संग्रह १०६:२९-३१

10 मिनु परमप्रभु यावेमी मोसा कली

11 “चढ़ेब हारून आ चच, एलाजर आ तौ, फिनेहासमी इस्राएली आन पर्बमी आं गाइश्‍शो नाइक्‍पाइक्‍तु। फिनेहासमी आं रुश पशो तुइश्‍शा, आ जोंब बोक्‍शा, आं गाइश्‍शो नाइक्‍पाइक्‍तु। मिनु मेको आन कली मसदुमी।

12 मोपतीके गे मेको कली ‘परमप्रभुमी इ कली आं थुं नाइक्‍तीक कबल पाइब। १इतिहास ९:२०; यसैया ५४:१०; मलाकी २:५

13 मिनु मेको कबल इ कली नु इ चच युइ आन कली बाक्‍ब। मेको गेना हना यो चढ़ेब दुम्‍तीक कबल बाक्‍ब। मारदे हना गे इ परमप्रभु आ पर्बम जोंब बोक्‍शा, गेय पाप्‍तीवी। मिनु गेमी इस्राएली आन पर्बम पाप क्‍याम्‍तीक गेय पाप्‍तीवी’ देनो” देंत।

14 मेको मिदयानी मीश मुर नु साइक्‍चा पुंइसीब इस्राएली आ नें जिम्री बाक्‍त। मेको सालु आ तौ सिमियोन आ थर ङा खिं का ङा ठेयब मुर बाक्‍त।

15 मेको साइक्‍चा पुंइसीब मिदयानी मीश मुर आ नें कोज्‍बी बाक्‍त। मेको सुर आ तमी बाक्‍त। मेको मिदयान ङा ठेयब मुर बाक्‍त।

16 मिनु परमप्रभु यावेमी मोसा कली

17 “मिदयानी आन कली श्‍येत गेशा, साइक्‍मी। गन्‍ती ३१:२-१०

18 मारदे हना, मेकोपुकीमी इन कली यो श्‍येत गेचा गोम्‍तेक्‍म। मिनु इन कली बाल-पेओर कली पूजा पपाइक्‍तेक्‍म। मेना मिदयान ङा ठेयब मुर आ तमी कोज्‍बीमी इन कली श्‍येत गेपाइक्‍तु। मेको चहिं मुर साइक्‍चा रोइ बोक्‍म नाक्‍त साइक्‍चा पुंइसाक्‍व। पेओर कली पूजा पतीके मो दुम्‍शो बाक्‍त” देंत।