Numbers 24 in Sunwar

1 मिनु बालाममी परमप्रभु यावेमी इस्राएली आन कली आसीक गेचा थुं पशो बाक्‍त, दे तुइक्‍ताक्‍व। मिनु मेको ङोंइती ङा खोदेंशो पा परमप्रभु कली हिल्‍लो पथ मला। तन्‍न मेकोमी आ कुल गोरशो रागी गे हिरशा कोव़तु।

2 मिनु बालाममी कोव़ना कोव़न, इस्राएली आन कली थर थर पा बाक्‍शो ताम्‍तीमी। मिनु परमप्रभु आ सोक्‍तीम मेको कली सुम्‍तु।

3 मिनु मेकोमी परमप्रभु आ पपाइश्‍शो लोव़ पा “गो बेओर आ तौ बालाम, मिक्‍च ताइब नङ, आ देंशो लोव़ मार बाक्‍त देंशा हना, १सामुएल ९:९

4 गो, परमप्रभु आ लोव़ नेंबमी, एको लोव़ पाइनुङ। गो नेल्‍ल क्‍येङा सक्ति पाइश्‍शो आ कोंइशो ताइनुङ। मिनु गो आ ङोंइती बाप्‍शा, मेको कली ताइनुङ।

5 याकूब आ मुर इन ताम्‍बु गिश रिम्‍शो बाक्‍नीमी। गे इस्राएली इन बाक्‍तीके दारशो बाक्‍नीम।

6 मेको खजूर रवा ख्रुम्‍शो ठेयब दिंम खोदेंशो बाक्‍ब। मेको खोला आ नेक्‍था ख्रुम्‍शो फू रू खोदेंशो बाक्‍ब। मेको परमप्रभु यावेमी ख्रुम्‍शो ठेयब घ्‍यू कुमारी खोदेंशो बाक्‍ब। ब्‍वाक्‍कु आ नेक्‍था वाशो लेबानोन ङा लाइश्‍शो रवा खोदेंशो बाक्‍ब।

7 मेको आन गरपुकीम ब्‍वाक्‍कु ब्रीशा क्‍युप्‍ब। मिनु मेको आन रू शुश ब्‍वाक्‍कु ताइनीम। मेको आन पिप अगाग क्‍येङा यो ठेयब बाक्‍‍ब। मिनु मेको आ राज्‍य ठेयब सेल्‍चा पुंइसीब।

8 परमप्रभुमी मेको आन कली इजीप्‍त रे ग्रुंइशा चाक्‍शो बाक्‍ब। आ सक्ति इस्राएली आन कली ब्‍वाकी ङा ब्‍यफ आ ग्रोव़ खोदेंशो बाक्‍ब। रागी रागी ङा जोरी सत्रु आन कली क्‍याम्‍ब। मेको आन रुश जिक्‍ब। मेको आन लिब्रामी मेको आन कली ख्रिश्‍शा साइक्‍ब।

9 मेको गुप्‍स खोदेंशो पा बाप्‍शा बाक्‍ब। गुप्‍सनी खोदेंशो पा बाप्‍शा बाक्‍ब। सुम मेको कली पोक्‍बा ङा? इस्राएली, सुमी इन कली आसीक गेनीमी, मेको आसीक राइनीम। सुमी इन कली सराप चीले पाइक्‍नीमी, मेको सराप चीले राइनीम” देंत। गन्‍ती २३:२४; उत्‍पत्ती ४९:९; उत्‍पत्ती १२:३; उत्‍पत्ती २७:२९

10 मिनु बालाक बालाम कली तशा, शुश गाइक्‍ताक्‍व। मिनु मेकोमी आ गुइ क्‍युक्‍शा, बालाम कली “गो इ कली आं जोरी सत्रु आन कली सराप चीले पाइक्‍चा कली कका ब्रेत्‍ताक्‍न। तन्‍न गे मेको आन कली सां खेयप आसीक कका गेप्‍तीवी।

11 मोपतीके मुल गे दोरोर पा इ खिं लेतो। गो इ कली ठेयब सेल्‍नुङ, दे मिम्‍शो नङ। तन्‍न परमप्रभु यावेमी इ कली मान ततीक रे तेक्‍तु” देंत।

12 मिनु बालामम बालाक कली “गे आं कली ब्रेत्‍थ सोइश्‍शो मुर आन कली गो

13 ‘बालाकमी आं कली सुन नु चांदीम ब्रीशो आ दरवार गेती हना यो, परमप्रभु यावे आ लोव़ लाक्‍शा आं मिम्‍शोमी मारेइ रिम्‍शो नु मरिम्‍शो पने मचाप्‍नुङ। परमप्रभु यावेमी आं कली मार देंबा, गो मेकोन देंनुङ’ मदेंशो नङा ङा? गन्‍ती २२:१८

14 मुल गो आं मुर आन बाक्‍तीके लाइनुङ। तन्‍न इस्राएलीपुकीम इन मुर आन कली नोले मार पाइक्‍नीमी, मेको इन कली शेंनुङ” देंत।

15 मिनु बालाममी परमप्रभु आ पपाइश्‍शो लोव़ पा “गो बेओर आ तौ बालाम, मिक्‍च ताइब नङ, आ देंशो लोव़ मार बाक्‍त देंशा हना,

16 गो, परमप्रभु आ लोव़ नेंबमी, एको लोव़ पाइनुङ। गो नेल्‍ल क्‍येङा ठेयब तुइश्‍शा, नेल्‍ल क्‍येङा सक्ति पाइश्‍शो आ कोंइशो ताइनुङ। मिनु गो आं मिक्‍च मसुम्‍शो आ ङोंइती बाप्‍शा,

17 गो मेको कली ताइनुङ, तन्‍न मुल ममाइ। गो मेको कली कोव़नुङ। तन्‍न आ नेक्‍था रे ममाइ। याकूब रे पा सोरुल का दाप्‍ब। मिनु इस्राएली रे पा पिप का ग्रूब। मिनु मेकोमी मोआब रागी आ सांद रे पा खतम सेल्‍ब। मिनु शेथ आ थर ङा मुर आन कली खतम पोक्‍ब। मत्ती २:२; लूका १:७८; उत्‍पत्ती ४९:१०; २सामुएल ८:२

18 एदोम रागी आ केन सेल्‍ब। मिनु सेइर रागी ग्राब। मिनु इस्राएल बोल्‍यो दुम्‍ब। २सामुएल ८:१४; येरमीया ४९:७-२२

19 याकूब रे पा हुकुम पाइब का ग्रूब। मिनु इर सहर ङा लीशो आन कली साइक्‍ब” देंत। मीका ५:१,७,८

20 मिनु बालाममी अमालेक आ मुर आन कली कोव़शा “अमालेक आ मुरपुकी रागी रागी नेल्‍ल क्‍येङा ङोंइती ङा बाक्‍तेक्‍म। तन्‍न मेकोपुकी गेना हना यो जाम्‍शा लाइनीमी” देंत। प्रस्‍थान १७:१४; १सामुएल १५:२-३,७

21 मिनु नोले मेकोमी केनी ङा मुर आन कली कोव़शा “इन बाक्‍तीक रागी बोल्‍यो बाक्‍ब। इन बाक्‍तीक सेरथे फुल्‍लुमी सेल्‍शो ग्‍योव़ खोदेंशो बाक्‍ब। १सामुएल १५:६

22 तन्‍न गे काइन सहर ङा मुरपुकी मीम चोचा पुंइसीनीनी। गिश सम्‍म अश्‍शुरीमी इन कली फ्रेंशा लाइक्‍नीम” देंत।

23 मिनु लेंशा मेकोमी लोव़ पा “आबी, परमप्रभुम मोदेंशो पवानु, सु ब्रोंइने चाप्‍बा ङा?

24 कित्तीम रे जहाजपुकी जाक्‍नीम। मिनु मेकोपुकीम अश्‍शुर नु एबेर कली श्‍येत गे‍नीम। मिनु मेकोपुकी यो खतम दुम्‍नीम” देंत। उत्‍पत्ती १०:-४; उत्‍पत्ती १०:२१-२२

25 मिनु बालाम बोक्‍शा, आ खिं लेत्‍त। मिनु बालाक यो आ लां लत। गन्‍ती ३१:८,१६