Numbers 15 in Sunwar
1 परमप्रभु यावेमी मोसा कली
2 “गे इस्राएली आन कली ‘गो इन कली गेशो बाक्तीक रागीम जाक्दीन्नीनु,
3 गे कसम जशो खाप्चा कली मीम चोशा चढ़ेतीक चढ़ेचा दाक्ताक्नी हना, यो, चोशा चढ़ेतीके चढ़ेचा दाक्तीनी हना यो, क्योरशा चढ़ेचा दाक्ताक्नी हना यो, इन कली देंशो चाडमी ग्येरशा परमप्रभु यावे कली चढ़ेचा दाक्ताक्नी हना यो, गे इन गोठ नु बगाल रे परमप्रभु यावे कली आ दाक्शो ब्रोव़शो रिना पाइश्शो चढ़ेचा माल्नीनी।
4 मिनु सुमी परमप्रभु यावे कली चढ़ेबा, मेकोमी अन्न चढ़ेतीके यो चढ़ेचा माल्ब। मेको अन्न चढ़ेतीक एफाह का ङा १० भाग ङा भाग का रिम्शो फस, हिन का ङा ४ भाग ङा भाग का तेल ब्वाइश्शा, चढ़ेचा माल्नीनी। एफाह का २२ लिटर पुक्तीके बाक्ब। हिन का ४ लिटर खोदेंशो बाक्ब।लेवी २:-; गन्ती २८:५
5 गे चोशा चढ़ेतीक पाठा का का नु तूचा थोव़क चढ़ेतीक हिन का ङा भाग सां ङा भाग का अङगुर शांबु यो चढ़ेचा माल्नीनी। गन्ती २८:७; प्रस्थान २९:४०; लेवी २३:१३
6 सांड का चढ़ेचा दाक्तीनी हना, मेको नु अन्न चढ़ेतीक यो चढ़ेचा माल्नीनी। मेको अन्न चढ़ेतीक एफाह का ङा १० भाग ङा भाग निक्शी रिम्शो फस नु हिन का ङा भाग सां ङा भाग का तेल ब्वाइश्शा, चढ़ेचा माल्नीनी।
7 तूचा थोव़क चढ़ेतीक कली हिन का ङा भाग सां ङा भाग का अङगुर शांबु चढ़ेचा माल्नीनी। मेको परमप्रभु यावे कली आ दाक्शो ब्रोव़शो रिना पाइश्शो चढ़ेतीक बाक्ब।
8 मिनु कसम जशो खाप्चा कली कि दुशा बाक्चा आ पर्बम परमप्रभु यावे कली चोशा चढ़ेचा कली कि क्योरशा चढ़ेचा कली ब्यफ का चढ़ेतीनी हना,
9 मेको नु अन्न चढ़ेतीके यो चढ़ेचा माल्नीनी। गे एफाह का ङा १० भाग ङा भाग सां रिम्शो फस नु आधा हिन तेल ब्वाइश्शा, चढ़ेचा माल्नीनी। एफाह का २२ लिटर पुक्तीक बाक्ब। हिन का ४ लिटर पुक्तीके बाक्ब।
10 मिनु तूचा थोव़क चढ़ेतीक कली आधा हिन अङगुर शांबु यो मेको चोशा चढ़ेतीक नु चढ़ेचा माल्नीनी। मेको परमप्रभु यावे कली आ दाक्शो ब्रोव़शो रिना पाइश्शो मीम चोशा चढ़ेतीके बाक्ब।
11 मिनु मेको ब्यफ, सांड, बोका, पाठा नु आइक्च पाठा चढ़ेशोनु, मो पचा माल्नीनी।
12 गेपुकीम दोशो चढ़ेनीनी, मेको नेल्ल आन कली का का पा मो पचा माल्नीनी।
13 मिनु इस्राएली सु सुमी परमप्रभु यावे कली ब्रोव़शो रिना पाइश्शो मीम चोशा चढ़ेतीके चढ़ेनीमी, मेकोपुकीमी मोदेंशो पचा माल्नीमी।
14 मिनु अर्को रागी ङा मुर, गेपुकी नु इच्का नाक्त बाक्त हना यो, गेना हना यो बाक्त हना यो, मेकोमी परमप्रभु यावे कली आ दाक्शो ब्रोव़शो रिना पाइश्शो मीम चोशा चढ़ेतीक चढ़ेचा दाक्ताक्व हना, इन खोदेंशो पा पचा माल्ब।
15 मिनु इन ग्रुम्तीकेमी गेपुकी नु बाक्शो अर्को रागी ङा मुर आन कली नेल्ल पाला सम्म एको पचा माल्शो कान बाक्ब। गेपुकी नु अर्को रागी ङा मुर परमप्रभु यावे आ ङोंइती खाल का ङा बाक्नीनी। प्रस्थान १२:४८-४९
16 गेपुकी नु गे नु बाक्शो अर्को रागी ङा मुर आन कली अरेशो लोव़ नु ठीक पतीक लोव़ खाल ङा बाक्चा माल्ब’ देंचा माल्नेवे” दे परमप्रभु यावेमी मोसा कली देंत।
17 परमप्रभु यावेमी मोसा कली
18 “गे इस्राएली आन कली परमप्रभु यावेमी इन कली लाइश्शो, रागीम जाक्दीन्नीनु,
19 गेपुकीमी मेको रागी ङा अन्न जनीनु, परमप्रभु यावे कली कोसेली का गेचा माल्नीनी।
20 मिनु इन ङोंइती निशो फस रे सेल्शो शोब्ले का परमप्रभु यावे कली गेचा माल्नीनी। खला रे क्युक्शा चढ़ेशो खोदेंशो पा चढ़ेचा माल्नीनी। नेहेम्याह १०:३८; इजीकीएल ४४:३०
21 मिनु गेपुकीमी नेल्ल इन पाला सम्म इन ङोंइती ङा निशो फस रे शोब्ले का परमप्रभु यावे कली क्युक्शा चढ़ेतीके कली चढ़ेचा माल्नीनी।
22 मिनु गेपुकीमी मतुइक्थु परमप्रभु यावेमी मोसा कली शेंशो लोव़ नेल्लेमी का मपाइतीनी हना, लेवी ४:१३-२१
23 परमप्रभु यावेमी मोसा रे पा इन कली नु इन नोले ङा मुर आन कली शेंशो लोव़ मपाइतीनी हना,
24 गे नु ग्रुम्तीक ङा मुरुमी मतुइक्थु पशो पाप आ पर्बम मेको ग्रुम्तीक ङा मुर नेल्लेमी ब्यफ का चोशा चढ़ेचा माल्नीम। मेको परमप्रभु यावे कली आ दाक्शो ब्रोव़शो रिना पाइश्शो बाक्ब। मेको आ शेंशो खोदेंशो पा अन्न चढ़ेतीक नु तूचा थोव़क चढ़ेतीक यो चढ़ेचा माल्नीम। मिनु पाप आ पर्बम बोका का यो चढ़ेचा माल्नीम।
25 मिनु चढ़ेबमी इस्राएली नेल्ल आन पर्बम पाप क्याम्तीक गेय पचा माल्ब। मिनु मेकोपुकी आन पाप क्याम्चा ताइनीम। मारदे हना मेकोम मतुइक्थु पाप पशो बाक्नीम। मिनु मेकोपुकीमी परमप्रभु यावे कली मीम चोशा चढ़ेतीक चढ़ेचा माल्नीम। मेको आन मतुइश्शो पाप आ पर्बम परमप्रभु यावे कली चढ़ेचा माल्नीम।
26 मिनु ग्रुम्तीक ङा इस्राएली नु मेको नु बाक्शो अर्को रागी ङा मुर नेल्ल माफ ताइनीम। मारदे हना मेको मुर नेल्लेम मतुइक्थु पाप पशो बाक्नीम।
27 मिनु सुइमी मतुइक्थु पाप पाप्तु हना, मेकोमी आ पाप आ पर्बम बर्स का गाप्शो क्यारश आ पाठी का चढ़ेचा माल्ब। लेवी ४:२७-२८
28 मिनु चढ़ेबमी मेको मुर आ पशो पाप मतुइक्तीके, परमप्रभु यावे आ ङोंइती पाप क्याम्तीक गेय पचा माल्ब। मिनु नोले मेको मुरुम माफ ताइब।
29 मतुइक्थु पाप पाइब इस्राएलीपुकी नु मेको नु बाक्ब अर्को रागी ङा मुर नेल्ल आन कली मतुइक्थु पाप पशो आ पर्बम पचा माल्शो गेय खाल का ङा बाक्ब।
30 तन्न इस्राएली बाक्त हना यो, अर्को रागी ङा मुर बाक्त हना यो, तुइश्शा यो, मटिथु पाप पाप्तु हना, मेको परमप्रभु यावे कली पाप पाइब बाक्ब। मेको मुर कली ग्रुम्तीके रे तिल्चा माल्ब। प्रेरित १३:३८; हिब्रू १०:२६-२९
31 मिनु मेको मुरुमी परमप्रभु यावे आ लोव़ लाक्शा, आ अरेशो काइ मटितीके, मेको मुर तिल्चा पुंइसीशा, आ पाप राइब” देंत।
32 मिनु इस्राएलीपुकी गोरशो रागीम बाक्मानु, मेकोपुकीमी नाइक्तीक नाक्ती मुर का कली शी खुप्शो थित्तेक्म। प्रस्थान २०:८-१०
33 मिनु मुरपुकीमी मेको शी खुप्ब कली मोसा, हारून नु मुर नेल्ल आन ङोंइतीमी चाक्तेक्म।
34 मिनु मेको कली मार पाइक्चा माल्बा मतुइक्तीके चोक्शा वोइक्तेक्म। लेवी २४:१२
35 मिनु परमप्रभु यावेमी मोसा कली “मेको मुर कली साइक्चा माल्ब। ग्रुम्तीक ङा मुर नेल्लेमी मेको कली मुर आन बाक्तीके रे ग्रुंइशा, फुल्लु आप्शा साइक्चा माल्नीम” देंत। प्रस्थान ३१:१४-१५; प्रस्थान ३५:२-३
36 मिनु ग्रुम्तीक ङा मुर नेल्लेमी मेको कली मुर आन बाक्तीके रे ग्रुंइशा, फुल्लु आप्शा साइक्तेक्म। परमप्रभु यावेमी मोसा कली दोदेंशो पा अरेवा, मोदेंशो पा मुरपुकीमी पाम्तेक्म।
37 मिनु लेंशा परमप्रभु यावेमी मोसा कली
38 “गे इस्राएली आन कली ‘गेपुकीमी इन फेक्तीक वा आन सुरमी नीलो श्येले के फेने सेलीन। मोदेंशो नेल्ल इन पाला सम्म पचा माल्नीनी। ब्यवस्था २२:१२; मत्ती २३:५; प्रस्थान ३९:१
39 मारदे मोदेंशो पचा माल्तीनी देंशा हना, गे मेको फेने तशा, परमप्रभु यावे आ शेंतीके नेल्ल मिम्शा, टिचा कली मोदेंशो पचा माल्नीनी। इन थुं ङा दला दाक्स मपचा कली नु इन मिक्च कली पाप मपपाइक्चा कली मोदेंशो पचा माल्नीनी।
40 गे परमप्रभु यावे आ शेंतीक नेल्ल मिम्शा पचा माल्नीनी। मिनु गे इन परमप्रभु आ ङोंइती ग्रांग्रा मदिशो दुम्चा माल्नीनी।
41 गो, परमप्रभु यावे, इन परमप्रभु नङ। गो इन परमप्रभु दुम्चा कली इन कली इजीप्त रागी रे ग्रुंइताक्नी। गो परमप्रभु यावे, इन परमप्रभु नङ’ देंचा माल्नेवे” देंत।