Numbers 12 in Sunwar
1 मिनु हसेरोथमी बाक्मानु, मोसामी कूश रागी ङा मीश चाक्तीके मिरयाम नु हारूनमी मोसा कली मरिम्शो लोव़ पाम्ताक्स। मारदे हना मेकोमी कूश रागी ङा मीश ग्युंबे पशो बाक्त। प्रस्थान २:२१
2 मिनु मेको निक्शीमी “मार, परमप्रभु यावेमी मोसा नु ला लोव़ पशो बाक्बा ङा? मार, मेकोमी गोपुकी नु यो लोव़ मपशो बाक्बा ङा?” देंताक्स। मिनु परमप्रभु यावेमी मेको लोव़ नेंतु।
3 मोसा चहिं रागी ङा मुर नेल्ले आन क्येङा ब्रेम्शो मुर बाक्त।
4 मिनु परमप्रभु यावेमी रीब पा मोसा, हारून नु मिरयाम आन कली “गे सांफा, ग्रुम्तीक ताम्बुम रे ग्रूङीन” देंत। मिनु मेको सांफा ग्रूतेक्म।
5 मिनु नोले परमप्रभु यावे गोस्स के थामम यिशा ग्रुम्तीक ताम्बु आ ओव़तीक राप्शा, हारून नु मिरयाम आस कली ब्रेत्ताक्मसी। मिनु मेको निम्फा जाक्ताक्स। प्रस्थान १६:१०
6 मिनु मेकोमी “आं लोव़ नेनीन। गेपुकी इन दातेमी परमप्रभु यावे आ लोव़ पाइब बाक्त हना, गो मेको कली कोंइतीकेम तपांइसीनुङ। गो मेको नु आ ङोमुमी लोव़ पाइनुङ।
7 तन्न आं गेय पाइब मोसा नु मोदेंशो मपाइनुङ। मेको आ गेय नेल्लेमी थमा सुइक्चा पुंइसीशो बाक्ब। हिब्रू ३:२
8 गो मेको नु कोव़मुशा लोव़ पाइनुङ। मिनु मेको नु रुप्चा ङा लोव़ पा ख्रुइश्शो लोव़ मपाइनुङ। मिनु मेको आं नेक्था जाक्ने चाप्ब। मारदे गे आं गेय पाइब मोसा आ पर्बम मरिम्शो लोव़ पचा काइ महिंसी?” देंत। प्रस्थान ३३:११; ब्यवस्था ३४:१०
9 मिनु परमप्रभु यावेमी मेको आस पर्बम शुश गाइक्ताक्व। मिनु मेको गाक्त।
10 मिनु मेको गोस्स ताम्बु आ तार रे लमेनु, मिरयाम कोव़र मुशा फुं खोदेंशो बुश दुम्त। मिनु हारूनमी मिरयाम कली कोव़ङानु, मेको कोव़री दुम्ने थुम्शो बाक्त। ब्यवस्था २४:९
11 मिनु हारूनमी मोसा कली “आं प्रभु, गो मूर्ख दुम्शा, पाप पशो आ पर्बम आंस कली सजाइ मगेने।
12 एको कली आ आम आ कोव़ज रे ग्रूमेनु, आ रां फेके का राक्शो शाम्शो आल खोदेंशो दुम्चा मगेने” देंत।
13 मिनु मोसामी परमप्रभु यावे कली “परमप्रभु, एको कली सापतीन” दे पुंइतु। प्रस्थान १५:२६
14 मिनु परमप्रभु यावेमी मोसा कली “मार, मेको आ आफोमी आ कुलुम तोक्शो हना, मेको ७ नाक्त सम्म मुने मदोक्बा ङा? मेको कली ७ नाक्त सम्म मुर आन बाक्तीक क्येङा लाङगाम तिल्शा वोतो। मेको नोले ला लेश्शा जाक्चा गेवो” देंत। गन्ती १३:४६
15 मिनु मिरयाम ७ नाक्त सम्म मुर आन बाक्तीक क्येङा लाङगाम तिल्शा वोइक्चा पुंइसाक्व। मिनु मिरयाम कली लेश्शा मचाक्गमे सम्म मुरपुकी यो मगाक्म।
16 मिनु मेको आ नोले मेकोपुकी हसेरोथ रे गाक्शा, पारान ङा गोरशो रागीम आन बाक्तीक सेल्तेक्म।