Nehemiah 9 in Sunwar

1 मिनु मेको महिना ङा २४ नाक्‍त नोले इस्राएलीपुकी माइजा बाक्‍शा, अरन्‍डी फेक्‍शा नु आन पियामी फुरक देप्‍शा खुम्‍साक्‍म।

2 इस्राएलीपुकीमी अर्को जात ङा मुरपुकी रे आंम कली तिल्‍साक्‍म। मिनु आन बाक्‍तीकेम राप्‍शा, आन मरिम्‍शो पशो नु आन किकी पिपी आन मरिम्‍शो पशो शोव़तेक्‍म।

3 मिनु नेल्‍ल आन बाक्‍तीकेमी राप्‍शा, घन्‍टा सां सम्‍म परमप्रभु यावे, आन परमप्रभु आ अरेशो लोव़ ङा किताब पढेशो नेंतेक्‍म। मिनु अर्को घन्‍टा सां सम्‍म चहिं आंम आंम आन मरिम्‍शो पशो शोव़ना शोव़न, परमप्रभु यावे आ ङोंइती बाप्‍शा, परमप्रभु यावे, आन परमप्रभु कली ठेयब सेल्‍ना सेल्‍न बाक्‍तेक्‍म।

4 येशुआ, बानी, कदमीएल, शेबान्‍याह, बुन्‍नी, शेरेब्‍याह, बानी नु केनानी लेवी आन शी के सेल्‍शो राप्‍तीके ङा क्रेसीमी बाक्‍‍शा, ठेयब सेंदामी परमप्रभु यावे, आन परमप्रभु कली लोव़ पाम्‍तेक्‍म।

5 मिनु लेवी येशुआ, कदमीएल, बानी, हशाब्‍नैयाह, शेरेब्‍याह, होदीयाह, शेबान्‍याह नु पेथायाहमी मुर आन कली “बोक्‍कीन, गेना हना यो बाक्‍ब परमप्रभु यावे, इन परमप्रभु कली ठेयब सेलीन। ‘इन नें ठेयब बाक्‍ब। नेल्‍ल आन ठेयब सेल्‍तीके आन क्‍येङा इन नें ठेयब सेल्‍चा पुंइसीशो बाक्‍ब’ देंचा माल्‍नीनी” देंतेक्‍म।

6 मिनु एज्रामी “गे का ला परमप्रभु यावे बाक्‍नीनी। गे सरीङ सेल्‍तीनी। स्‍वर्ग नु मेकेर बाक्‍ब नेल्‍ल सेल्‍तीनी। गे रागी नु मेकेर ङा मारेइ मारेइ, समुन्‍द्र नु मेकेर ङा मारेइ मारेइ आन कली सेल्‍तीनी। मिनु मेको नेल्‍ल कली ब्रोंइचा गेतीनी। मिनु स्‍वर्ग ङा गेय पाइबपुकीमी इन कली ठेयब सेल्‍नीम।

7 परमप्रभु यावे, गे परमप्रभुमी अब्राम कली योव़शा, कल्‍दी आन रागी ऊर सहर रे ग्रुंइशा, अब्राहाम नें वोइक्‍तीनी। उत्‍पत्ती ११:३१; उत्‍पत्ती १७:५

8 मिनु मेको आ थुं इन कली मप्रोंइब, ठीक पाइब बाक्‍ब, दे तुइश्‍शा, मेको नु कबल का पाइतीनी। मार कबल पाइतीनी देंशा हना, मेको कली कनानी, हित्ती, एमोरी, परिज्‍जी, यबुसी नु गिरगाशी आन रागी आ चच युइ आन कली गेनुङ, दे कबल पाइतीनी। मिनु गे इन कबल खाप्‍तीनी। मारदे हना गे ठीक पाइब बाक्‍नीनी। उत्‍पत्ती १५:१८-२१

9 मिनु आंइ किकी पिपी इजीप्‍त रागीम बाक्‍मानु, मेको आन श्‍येत जशो ताइतीनी। लल समुन्‍द्रम बाक्‍शा आन ङाक्‍शो नेंतीनी। प्रस्‍थान ३:७

10 मिनु गेमी पिप फाराओ आ गेय पाइब नु आ रागी ङा मुर नेल्‍ल आन ङोंइती चिन्‍ड नु छक लाक्‍चा ङा गेय पाइतीनी। मारदे हना मेकोपुकीमी आंइ किकी पिपी आन कली ठेयब लेश्‍शा, श्‍येत गेशो बाक्‍तेक्‍म, दे तुइक्‍ताक्‍नी। मोदेंशो पा इन नें ठेयब सेल्‍साक्‍नी। मुल सम्‍म मेको मोदेंशो बाक्‍ब। प्रस्‍थान १८:११

11 मेको आन ङोंइती समुन्‍द्र कली चेश्‍शा लां का सेल्‍तीनी। मेकोपुकी सोव़शो खपीम गाक्‍शा, समुन्‍द्र शोक्‍साक्‍म। मेको खेदा पाइब आन कली चहिं ब्‍वाक्‍कुम ख्रुम्‍तीनी। फुल्‍लु ब्‍वारशा, ब्‍वाक्‍कुम ताइश्‍शो खोदेंशो पा ख्रुम्‍तीनी। प्रस्‍थान १४:२१; प्रस्‍थान १५:५,१०

12 आंइ किकी पिपी आन कली नाक्‍त गोस्‍स के थामम लां कोंइताक्‍नी। मिनु नाक्‍दो आन लां तपाइक्‍चा कली मी के थाम दुम्‍शा लां कोंइताक्‍नी।

13 गे सीनै डांडामी यितीनी। मिनु स्‍वर्ग रे मेकोपुकी नु लोव़ पाइतीनी। गे मेको आन कली इन ठीक पतीक लोव़, थमा शेंतीके, इन रिम्‍शो फुल्‍लुम मुशा ब्रेक्‍शो लोव़ नु इन शेंतीके गेतीनी। प्रस्‍थान १९:१८; प्रस्‍थान २०:१-१७

14 इन नाइक्‍तीक नाक्‍त नाइक्‍चा, दे मेको आन कली तुइक्‍पाइक्‍तीनी। मेको आन कली मोसा रे पा इन शेंतीके, इन फुल्‍लुम मुशा ब्रेक्‍शो लोव़ नु इन अरेशो लोव़ गेतीनी।

15 मेको आन कली शोव़लु बेक्‍मानु, सरीङ रे शोब्‍ले गेतीनी। मेको आन कली तूतू मदाक्‍चा ङा पा, रूचा ङा पा सेरथे फुल्‍लु रे ब्‍वाक्‍कु ग्रुंइशा गेतीनी। मिनु मेको आन कली ‘गेपुकी मेको रागी ओव़शा, नेल्‍ल आंम के सेलीन’ दे माइक्‍तीनी। मिनु मेको आन कली ‘गो मेको नेल्‍ल गेनुङ’ दे कसम जाइतीनी। प्रस्‍थान १६:४,१४,१५; प्रस्‍थान १७:६

16 मिनु आंइ किकी पिपीमी ठेयब लेश्‍शा, आन मिम्‍शो ला पशा, इन शेंशो मटीब दुम्‍शो बाक्‍तेक्‍म। प्रस्‍थान ३२:१,९

17 इन कली टिने मबिस्‍सम। आन दातेमी पशो इन चिन्‍ड नु छक लाक्‍चा ङा गेय ममिम्‍शो बाक्‍तेक्‍म। मेकोपुकी इन देंशो मटीब दुम्‍शो बाक्‍तेक्‍म। मिनु आन काइ मटितीकेमी इजीप्‍त रागी लेश्‍शा लशा, लेंशा वाइलीम वाइल दुम्‍चा कली थुंम वोइश्‍शो बाक्‍तेक्‍म। गे चहिं आंइ मरिम्‍शो पशो क्‍याम्‍शा गेब परमप्रभु बाक्‍नीनी। शिशी पाइब नु गेना हना यो दाक्‍ब बाक्‍नीनी। गे ओंखां पा चुरब बाक्‍शा, गेना हना यो दाक्‍तीके पाइश्‍शो बाक्‍नीनी। मोपतीके गे इन मुर आन कली दाक्‍शा मप्रोंइ‍नी। प्रस्‍थान ३४:६

18 मेकोपुकीमी सुन के बाछा सेल्‍शा ‘इजीप्‍त रागी रे प्रोंइशा कुइब, आंइ परमप्रभु एकोन बाक्‍ब’ देंमानु यो, इन कली ठेयब शुक्‍शी लोव़ पशो बाक्‍तेक्‍म हना यो, प्रस्‍थान ३२:४

19 गे मेको आन कली शुश शिशी पशा, गोरशो रागीमी प्रोंइशा मसोइक्‍तीनी। आन लतीक लां तपाइक्‍चा कली नाक्‍त गोस्‍स के थाम नु नाक्‍दो मी के थाम दुम्‍‍शा गेनायो मप्रोंइनी।

20 मिनु मेको आन कली शेंचा, दे इन रिम्‍शो पाइब सोक्‍त गेतीनी। मेको आन कली मन्‍ना शोब्‍ले गेचा मप्रोंइनी। मिनु मेको आन कली रूथ्री पा ब्‍वाक्‍कु तूचा गेतीनी। प्रस्‍थान १६:३५; प्रस्‍थान १७:६; गन्‍ती ११:१७-२५; भजन संग्रह ७८:१५-१६; भजन संग्रह ७८:२३-२४

21 गे मेको आन कली ४० बर्स सम्‍म गोरशो रागीमी मारेइ ममाल्‍चा ङा पा थुल्‍तीनी। मेको आन वा मजेक्‍म, आन खोइल यो गेनायो महोम्‍म। ब्‍यवस्‍था ८:४

22 मेको आन कली राज्‍य नु जात जात ङा मुरपुकी नु ग्रापाइक्‍तीनी। मेको आन बाक्‍तीके का का पा योव़शा गेतीनी। मिनु सीहोन माइश्‍शो, हेश्‍बोन रागी ङा पिप नु ओग माइश्‍शो, बाशान रागी ङा पिप आस रागी यो मेको आन कली गेतीनी। गन्‍ती २१:२३-२४; गन्‍ती २१:३३,३५

23 गे मेको आन तौ सरीङ ङा सोरुल खोदेंशो पा हिक्‍ने मचाप्‍चा ङा पा शुश सेल्‍‍तीनी। मिनु आन किकी पिपी आन कली ‘गे मेको रागी आंम के सेलीन’ देंशो रागीमी चाक्‍दीत्‍तीनी।

24 मिनु मेको आन तौ चच युइमी मेको रागी ओव़शा, आंम के सेल्‍साक्‍म। मिनु गे मेको रागीम बाक्‍ब कनानी नु आन पिपपुकी यो मेको आन गुइम गेतीनी। यहोसु १२:-

25 मेकोपुकीमी एर ओंथ नेल्‍ल ठेयब गारो हिर‍शो सहरपुकी ग्राशो बाक्‍तेक्‍म। शुश ग्रेल्‍ब रू आंम के सेल्‍शो बाक्‍तेक्‍म। रिम्‍शो थोव़कीम ब्रीशो खिंपुकी आंम के सेल्‍शो बाक्‍तेक्‍म। फुल्‍लु मुशा सेल्‍शो इनार, अङगुर रू, तेल रवा रू नु मार मार फल फुल रू शुश तशो बाक्‍तेक्‍म। मिनु मेकोपुकीमी जशा ब्‍वशा, रूशा, दोम्‍शा इन ठेयब शिशी तशा, ग्‍येरसीशो बाक्‍तेक्‍म। ब्‍यवस्‍था ६:१०-११; ब्‍यवस्‍था ३२:१५

26 मेको नेल्‍ल तशा यो इन देंशो मटिथु, ठेयब लेश्‍शा, इन अरेशो लोव़ मटीमे बाक्‍त। इन लोव़ पाइबपुकीमी आन कली ‘गे मरिम्‍शो पाइब बाक्‍नीनी। आं गे लेतीन’ देंमानु, मेको आन कली सदमे बाक्‍त। मिनु मेकोपुकीमी शुश शुक्‍शी पामे बाक्‍त।

27 मोपतीके गे मेको आन कली आन जोरी सत्रु आन गुइमी गेनी बाक्‍त। मेकोपुकीमी मेको आन कली शुश श्‍येत गेमे बाक्‍त। मिनु श्‍येत जामेनु ‘वारच पाइक्‍की’ दे इन कली पुन्‍मेनु, गे स्‍वर्ग रे आन पुंइशो नेंनी बाक्‍त। गे इन ठेयब शिशीमी मेको आन कली आन जोरी सत्रु रे प्रोंइचा कली मुर सोइक्‍तीनी बाक्‍त। मिनु मेकोपुकीमी मेको आन कली प्रोन्‍मे बाक्‍त। न्‍यायाधीस ३:९,१५; न्‍यायाधीस २:१४-२२

28 एर ओंथ ङा आन जोरी सत्रु रे प्रोंइपांइसीशा, नाइश्‍शा बाक्‍मा नोले, लेंशा इन मदाक्‍शो पामे बाक्‍त। मिनु गे मेको आन कली आन जोरी सत्रु आन गुइमी गेनी बाक्‍त। आन जोरी सत्रुपुकीमी मेको आन कली हुकुम पामे बाक्‍त। मिनु लेंशा मेकोपुकीमी इन कली ‘वारच पाइक्‍की’ दे ग्रीमानु, गे स्‍वर्ग रे मेको आन पुंइशो नेंशा, मेको आन कली इन ठेयब शिशीमी शुश खेयप प्रोंइनी बाक्‍त।

29 मिनु मेको आन कली इन अरेशो लोव़ गे लेत्‍चा कली, मेको आन कली टिचा शेंदीनी बाक्‍त। तन्‍न मेकोपुकी ठेयब लेश्‍शा, इन शेंतीके काइ मटिथु, इन पतीक लोव़ मपामे बाक्‍त। मुरपुकीमी इन पतीक लोव़ पशो नम हना, ब्रोंइचा ताम वा। तन्‍न मेकोपुकीम इन लोव़ मनेंथु, मटिथु, इन गे आन ची हिरदमे बाक्‍त। लेवी १८:५

30 गे शुश बर्स सम्‍म मेको आन कली फाल्‍नी बाक्‍त। इन लोव़ पाइबपुकीमी मेको आन कली इन सोक्‍त रे पा शेंपाइक्‍नी बाक्‍त। तन्‍न मेकोपुकीमी नेंचा मबिस्‍समा बाक्‍त। मोपतीके गे मेको आन कली अर्को जात जात ङा मुर आन गुइमी गेनी बाक्‍त। येरमीया ७:२५-२६; येरमीया ४४:४-६

31 मो पाम्‍तेक्‍म हना यो, इन ठेयब शिशीमी मेको आन कली मसाइक्‍थु, आन श्‍येत रे प्रोंइनी बाक्‍त। मारदे हना गे शिशी पाइब नु शुश दाक्‍ब परमप्रभु बाक्‍नीनी।

32 मिनु आंइ परमप्रभु, गे नेल्‍ल क्‍येङा ठेयब सक्ति पाइश्‍शो नु मान पा हिंचा माल्‍शो परमप्रभु बाक्‍नीनी। इन पशो कबल इन गेना हना यो दाक्‍तीक खाप्‍ब बाक्‍नीनी। अस्‍सुर ङा पिप आन पाला रे मुलाक्‍त सम्‍म आंइ कली गेशो श्‍येत, आंइ पिप आन कली, आंइ ठेयब मुर आन कली, इन कली चढ़ेब आन कली, इन लोव़ पाइब आन कली, आंइ किकी पिपी आन कली नु इन मुर नेल्‍ल आन कली गेशो श्‍येत कली आइक्‍च ममिम्‍तीन। ब्‍यवस्‍था ७:९,१२; १राजा ८:२३; नेहेम्‍याह १:५

33 आंइ कली दुम्‍तीके, गे ठीक पशो बाक्‍नीनी। मारदे हना गे आंइ कली रिम्‍शो पाइतीनी। गोपुकीमी चहिं इन कली थम मरिम्‍शो पाइतक। दानीएल ९:५,७

34 आंइ पिप, आंइ ठेयब मुरपुकी, इन कली चढ़ेबपुकी नु आंइ किकी पिपीमी इन अरेशो लोव़ मपथु, इन शेंतीके नु इन गेशो होस पतीक लोव़ मनेंथु, हिक्‍सीन महिक्‍ग्‍मे बाक्‍त।

35 मिनु आन आंम राज्‍यमी, इन रिम्‍शो पतीकेमी नु आन बाली नाली शुश ग्रेल्‍ब ठेयब रागीमी इन कली मान मपामे बाक्‍त। आन काइ मरिम्‍शो गेय मप्रोन्‍मे बाक्‍त।

36 मुलाक्‍ती गो वाइलीम वाइल दुम्‍शो बाक्‍नीकी। आंइ किकी पिपी आन कली मेको रागी ङा फल फुल जचा नु मेकेर ङा रिम्‍शो रिम्‍शो थोव़क तचा कली गेशो बाक्‍तीनी। इन गेशो रागीमी गो वाइलीम वाइल दुम्‍शो बाक्‍नीकी।

37 मेको रागी ङा मारेइ मारेइ रिम्‍शो थोव़की गे आंइ कली हुकुम पपाइक्‍ब पिप आन कली ताइब सेल्‍तीनी। मेको आंइ मरिम्‍शो पतीके आ पर्बम बाक्‍ब। मेकोपुकीमी आंइ कली नु आंइ बी ब्‍यफ नु क्‍यारश भेडा आन कली आन दाक्‍स पा पाइनीमी। मोदेंशो पा गो शुश श्‍येत जशो बाक्‍नीकी” दे एज्रामी परमप्रभु कली लोव़ पाप्‍तु।

38 मिनु मेको आन पशो नेल्‍ल मिम्‍शा, गोपुकीमी परमप्रभु नु कबल का पाइतक। मिनु मेको कबल ङा लोव़ नेल्‍ल ब्रेक्‍ताक्‍क। मेको छाप थोक्‍शो ब्रेक्‍सम आंइ ठेयब मुरपुकी, लेवीपुकी नु चढ़ेब आन नें ब्रेक्‍शो बाक्‍तेक्‍म।