Nehemiah 8 in Sunwar
1 मिनु ७ महिना थेक्चावानु, इस्राएली आंम आन आन सहरमी बाक्मानु, मुर नेल्ल थुं का दुम्शा, ब्वाक्कु लाप्चो आ नेक्था ङा ठेयब बाक्तीकेम बुक्तेक्म। मिनु मेकोपुकीमी परमप्रभु यावे आ लोव़ जोक्ब तुइक्ब चढ़ेब एज्रा कली “परमप्रभु यावेमी मोसा कली गेशो इस्राएली आन कली अरेशो लोव़ ङा किताब चाक्को” देंतेक्म। एज्रा ७:६
2 मिनु ७ महिना ङा ङोंइती ङा नाक्तीमी चढ़ेब एज्रामी मेको किताब मुर आन ङोंइती चाक्तु। मेकेर वोंइश मुर, मीश मुरपुकी नु सु सु रुप्ने चाप्ब बाक्मा, मेको नेल्ल बुक्शो बाक्तेक्म। ब्यवस्था ३१:१०-१३
3 मोपा एज्रामी ब्वाक्कु लाप्चो आ नेक्था ङा बाक्तीकेमी सुनी रे नाक्त सम्म वोंइश मुर, मीश मुर नु लोव़ रुप्ने चाप्ब नेल्ल आन ङोंइती मेको किताब पढेप्तु। मिनु परमप्रभु यावे आ अरेशो लोव़ ङा किताब पढेवानु, नेल्लेमी नोफा दाइश्शा नेंतेक्म।
4 मिनु परमप्रभु यावे आ लोव़ जोक्ब तुइक्ब एज्रा मुर नेल्ल आन कली रिम्शो नेंपाइक्चा कली शी के सेल्शो लाइश्शो राप्तीकेमी राप्शो बाक्त। मेको आ ग्युरा गे मत्तीथ्याह, शेमा, आनायाह, उरीयाह, हिल्कीयाह नु मासेयाह राप्शो बाक्तेक्म। मिनु आ पेरा गे पेदायाह, मीशाएल, माल्कीयाह, हाशुम, हश्बादानाह, जकरिया नु मेशुल्लाम राप्शो बाक्तेक्म।
5 मिनु एज्रामी आ लाइश्शो बाक्तीकेमी राप्शा, नेल्लेम तचा ङा पा मुर आन ङोंइती मेको किताब प्राक्तु। मेको किताब प्राक्गानु, मुर नेल्ल बोक्तेक्म।
6 मिनु एज्रामी नेल्ल क्येङा ठेयब परमप्रभु यावे कली “गे ठेयब ननी” दे मान पवानु, मुर नेल्लेमी आन गुइ पोक्शा “आमेन, आमेन” देंतेक्म। मिनु नेल्लेमी आन पिया खुक्शा, परमप्रभु यावे आ ङोंइती खप सम्म बाप्शा ठेयब सेल्तेक्म।
7 मिनु येशुआ, बानी, शेरेब्याह, यामीन, अक्कुब, शब्बेथाइ, होदीयाह, मासेयाह, केलीता, अजारयाह, योजाबाद, हानान, पेलायाह नु लेवीपुकीमी मुर आन कली परमप्रभु आ अरेशो लोव़ रुप्पाइक्तेक्म। मिनु मुर आन बाक्तीकेम राप्शा बाक्तेक्म।
8 मेकोपुकीमी परमप्रभु आ अरेशो लोव़ रुप्चा ङा पा पढेम्तेक्म। आन पढेशो रुप्मेक्ल, दे मुर आन कली आ अर्थ यो शेंताक्म।
9 मिनु परमप्रभु यावे आ अरेशो लोव़ नेंशा, मुर नेल्ल शुश ङाक्तेक्म। मोपतीके पिप आ वोइश्शो हुकुम पाइब, नेहेम्याह, परमप्रभु यावे आ लोव़ जोक्ब तुइक्ब चढ़ेब एज्रा नु मुर आन कली शेंब लेवीपुकीमी “मुलाक्ती परमप्रभु यावे, इन परमप्रभु आ ठेयब नाक्त बाक्ब। हिशेक मपने। मङाक्कीन” दे मुर आन कली माइक्तेक्म।
10 मिनु मेकोपुकीमी मुर आन कली “मुल गे नेल्ल लने। ब्रोव़शो ब्रोव़शो जने ब्वने, तूङीन। मिनु मथीब आन कली यो मार मार सोइक्तीने। मारदे हना मुलाक्ती आंइ परमप्रभु आ ठेयब नाक्त बाक्ब। हिशेक मपने। मारदे हना परमप्रभु यावे आ गेशो ग्येरतीकेमी इन थुं बारपाइक्ब” देंतेक्म।
11 मिनु लेवीपुकीमी मुर नेल्ल आन कली “सिक्सी पा बाक्कीन। मुलाक्ती परमप्रभु आ ठेयब नाक्त बाक्ब। हिशेक मपने। मङाक्कीन” देंतेक्म। मारदे हना मुर नेल्ल परमप्रभु यावे आ लोव़ नेंशा ङाक्तेक्म। नेहेम्याह ५:१४
12 मिनु मुर नेल्लेमी आन देंशो लोव़ रुप्शा, ठेयब ग्येरतीक चाड मानेचा कली जचा ब्वचा तूचा नु मथीब आन कली मार मार सोइक्चा कली लाम्तेक्म।
13 मिनु आ दीसा खिं नेल्ल ङा ठेयब मुर, चढ़ेब नु लेवी नेल्ल परमप्रभु यावे लोव़ जोक्ब तुइक्ब एज्रा आ ङोंइती परमप्रभु यावे आ अरेशो लोव़ शेंसीचा कली बुक्तेक्म।
14 मिनु परमप्रभु यावेमी मोसा कली “इस्राएलीपुकीमी ७ महिना ङा ७ नाक्त कली गोठ सेल्शा बाक्तीक चाड मानेचा माल्नीम” दे शेंशा, परमप्रभु यावे आ अरेशो लोव़म ब्रेक्शो थित्तेक्म। लेवी २३:३४-३६; लेवी २३:४०
15 मिनु मेकोपुकीमी आंम बाक्तीक सहर नेल्लेमी नु यरूसलेम ङा मुर आन कली “गे इर ब्वाकी ग्येत्थ लशा, मार मार तेल रवा, मूरे रवा, खजूर रवा नु शुश सफा पाइश्शो रवा आन राशी गोठ सेल्चा कली चाक्कीन। मिनु दोदेंशो ब्रेक्शो बाक्मे, मोदेंशो पने” दे नेंपतीन देंतेक्म। लेवी २३:४०
16 मिनु मुरपुकी लशा, सेउला चाक्तेक्म। मिनु आन खिं तारी, आन लाङगामी, परमप्रभु आ खिं ङा लाङगामी, ब्वाक्कु लाप्चो आ नेक्थामी नु एफ्राइम लाप्चो आ नेक्थामी गोठ सेल्शा बाक्तेक्म। नेहेम्याह ८:१
17 मिनु मुर नेल्ल, सु सु ग्याइश्शा लेत्चा पुंइसीशो बाक्मा, मेको नेल्ल, गोठ सेल्शा, आगाम बाक्तेक्म। मिनु नून आ तौ यहोसु आ पाला रे मेको नाक्त सम्म इस्राएलीपुकीमी मोदेंशो मपशो बाक्तेक्म। मेको चाडमी मुर नेल्ल शुश ग्येरसाक्म।
18 मिनु ङोंइती ङा नाक्त रे नोले ङा नाक्त सम्म एज्रा मी नाक्त किंत किंत परमप्रभु आ अरेशो लोव़ ङा किताब पढेप्तु। मेकोपुकीमी मेको चाड ७ नाक्त सम्म मानेम्तेक्म। मिनु दोदेंशो पा ब्रेक्शो बाक्मे, मोदेंशो पा आ दीसा ८ नाक्तीमी चाड थुम्तीक नाक्त नेल्ल क्येङा ठेयब पा मानेम्तेक्म।