Nehemiah 1 in Sunwar
1 एको हाकाल्याह आ तौ नेहेम्याह आ लोव़ बाक्ब। २० बर्स ङा किस्लेव महिनामी गो सुसा ङा दरवारम बाक्ती।
2 मेना आं लोक्ब हानानी, का निक्शी मुर नु यहूदा रागी रे जाक्त। मिनु गो मेको आन कली “प्रोक्शा, गाक्शो नु ग्याइश्शा, लाइक्चा मपुंइसीशो रे लीशो यहूदीपुकी दोदेंशो बाक्नीमी? यरूसलेम दोदेंशो तांइसीबा?” दे हिल्लो पातामी।
3 मिनु मेकोपुकीमी आं कली “ग्याइक्चा मपुंइसीशो मेक उइ लीशोपुकीम शुश श्येत जशा, खेदा पचा पुंइसीना सीन बाक्नीम। यरूसलेम ङा गारो ब्रेश्शो बाक्ब। मेकेर ङा ठेयब लाप्चोपुकी मीम दुप्शो बाक्नीम” देंतेक्म। २इतिहास ३६:१९
4 मिनु गो मेको लोव़ नेंशा निश्शा, सुर्ता पा, शुश नाक्त सम्म ङाक्ना ङाक्न बाक्ती। मजथु स्वर्ग ङा परमप्रभु कली एज्रा ९:३
5 “परमप्रभु यावे, स्वर्गम बाक्ब परमप्रभु, गे नेल्ल क्येङा ठेयब नु मान पा हिंचा माल्शो परमप्रभु बाक्नीनी। इन कली दाक्शा, इन अरेशो लोव़ टीब आन कली शिशी पाइब नु कबल खाप्ब बाक्नीनी। दानीएल ९:४
6 गो, इन वाइल, इस्राएली आन पर्बम नाक्दो नाक्त पुंइनुङ। आं पुंइशो लोव़ नेंचा कली गे इन नोफा दाइक्तीन। मिनु आं गे कोव़ङीन। गो, इस्राएली नु आं आफ आ खिं ङा मुर नेल्लेमी इन ङोंइती मरिम्शो पाइतक। मिनु गो यो पाप पाता।
7 गे इन वाइल मोसा कली शेंतीक गेतीनी। गोपुकीमी चहिं मेको इन गेशो फुल्लुम मुशा ब्रेक्शो लोव़ नु इन ठीक पतीक लोव़ मटिथु, इन ङोंइती मरिम्शो पाइतक।
8 मिनु गे इन वाइल मोसा कली ‘गे आं देंशो मटीतीनी हना, गो इन कली रागी रागी ङा मुर आन दातेमी फ्राइनन्नी’ देंतीनी। ब्यवस्था ४:२७
9 तन्न ‘आं गे लेत्तीनी, आं शेंतीक लोव़ नेंशा टीतीनी हना, गो इन कली ङोन ङोन रागी मेर फ्राइतन्नी हना यो, खुप्नन्नी। इन कली खुप्शा, आं नें ठेयब सेल्चा कली आं योव़शो रागीमी चाक्नन्नी’ दे इन ङोंइती पशो लोव़ मिम्तीन। ब्यवस्था ३०:४-९
10 मिनु मेकोपुकी इन वाइली नु इन रागी ङा मुर बाक्नीमी। ङोंइती गे मेको आन कली इन ठेयब सक्ति नु इन बोल्यो गुइमी प्रोंइशो बाक्तीनी।
11 परमप्रभु, इन नोफा दाइक्तीन। मिनु इन नें कली मान पचा दाक्ब इन वाइल आन पुंइशो लोव़ यो नेनीन। मुलाक्ती आं पुंइशो खपीन। पिप आ ङोंइती गो शिशी तङल” दे पुंइता। मेना गो पिप कली तूचा गेब आन ठेयब मुर बाक्ती।