Micah 7 in Sunwar
1 गो दोदेंशो पा श्येत जशो बाक्नुङा? गो फल सिश्शा नोले, अङगुर रू ङा सिला माल्ची नोले मारेइ जचा मताइनुङ। आं माल्शो ङोंइती मीशो फोव़शी यो मबाक्ब। भजन संग्रह १२:२; यसैया ५७:१
2 थमा सुइक्चा पुंइसीब मुर रागी रे जाम्शा लाम्तेक्म। मिनु गेना हना यो रिम्शो पाइब मुर मलीशो बाक्नीम। मुर नेल्ल मुर साइक्चा कली बाप्शा बाक्शो बाक्नीम। मुर नेल्लेमी ब्वारद दाइश्शा आंम लोक्ब कली साइक्चा माल्शो बाक्नीम।
3 मेकोपुकी मरिम्शो पचा कली जोक्ब बाक्नीम। आन ठेयब मुर नु निसाफ पाइबपुकीमी घूस जाइनीम। सक्ति पाइश्शोपुकीमी मार मिम्तमे मेकोन पाइनीम। मोपा ठीक पतीके कली दूली सेल्नीम।
4 मेको आन दाते ङा नेल्ल क्येङा रिम्शो मुर चू रवा खोदेंशो बाक्ब। मेको आन दाते ङा गेना हना यो रिम्शो पाइब थरपु हिरशो चू खोदेंशो बाक्ब। इन खाल पाइब आन नाक्त जाक्शो बाक्ब। मेको नाक्ती इन कली कोव़बमी इन कली ग्रुम्थ जाक्ब। मुल मेको आन कली खतम सेल्तीक नाक्त जाक्ब।
5 इन वारच कली थमा मसुतीन। इन दाक्शो मुर कली थमा मसुतीन। गे नु काथा इप्शो मीश नु यो होस पा लोव़ पने। येरमीया ९:३-४
6 मारदे हना तौमी आ आफ कली मरिम्शो पाइब। तमी आ ममा आ पर्बम दूली पाइब दुम्ब। चाइमीम आ शिमी आ पर्बम मरिम्शो पाइब। आंम खिं ङा मुर इन जोरी सत्रु दुम्नीम। मत्ती १०:३५-३६
7 तन्न गो परमप्रभु यावे गे कोव़नुङ। गो आं कली श्येत रे प्रोंइब परमप्रभु कली रिम्नुङ। आं परमप्रभुमी आं पुंइशो नेंब।
8 मिनु “आं जोरी सत्रु आं कली शुक्शी पा मग्येरसीन। गो गोल्ती हना यो, बोक्नुङ। गो छिङछिङम बाक्ती हना यो, परमप्रभु यावे आं छेङछेङ बाक्ब। ओबदिया १:१२; भजन संग्रह २७:१
9 आं कली निसाफ पा वारच मपवा सम्म गो परमप्रभु यावे आ गाइश्शो फाल्चा माल्नुङ। मारदे हना गो मेको कली पाप पाता। मेकोमी आं कली आ शिशी तपाइक्चा कली छेङछेङम ग्रुंइब। येरमीया १४:७
10 मेना आं जोरी सत्रुम मेको ताइनीम। मिनु मुने दोक्नीम। मारदे हना मेकोपुकीमी ङोंइती ‘परमप्रभु यावे, इ परमप्रभु ते बाक्म?’ देंशो बाक्तेक्म। गो मेको आन खतम दुम्शो ताइनुङ। मुल यो मेकोपुकी लां ङा हिलो खोदेंशो पा दिम्चा पुंइसीशो बाक्नीम। भजन संग्रह ७९:१०
11 गे इन गारो लेंशा सेल्तीक नाक्त नु इन सांदपुकी ङोन ङोन सम्म चाक्दीत्तीक नाक्त जाक्शो बाक्ब।
12 मेको नाक्त अस्सुर नु इजीप्त रे शुश मुर जाक्नीम। इजीप्त रे युफ्रेटीस सम्म, समुन्द्र रे समुन्द्र सम्म नु पहाड रे पहाड सम्म ङा शुश मुर इन बाक्तीक जाक्नीम।
13 तन्न रागी रागी नेल्ल श्येत्थ दुम्नीम। मुर आन मरिम्शो पशो आ पर्बम मोदेंशो दुम्ब” देंत।
14 गे इन मुर आन कली कोक्केम योव़ङीन। मेको ब्वाकीम बाक्शो बगाल इन के बाक्ब। मेको रिम्शो बाक्तीकेम बाक्नीम। मेको आन कली ङोंइती ङा खोदेंशो पा बाशान नु गिलादमी जोचा गेन। मीका ५:३; येरमीया ५०:१९
15 गेपुकी इजीप्त रे ग्रूशो नाक्त खोदेंशो पा गो इन कली छक लाक्चा ङा गेय कोंइनुङ।
16 मेको रागी रागी ङा मुरपुकी शुश सक्ति पाइश्शो बाक्तेक्म हना यो, मेको तशा, मुने दोक्नीम। मेकोपुकीम आन गुइम आन कुल सुम्सीनीम। मिनु मेको आन नोफा लाटा दुम्ब।
17 मेकोपुकीम बुस्स खोदेंशो नु खपीम ग्रेशा गाक्ब जन्तु खोदेंशो पा, खप तुक्नीम। मेको आन बोल्यो दरवार रे हिंशा ख्रिंख्रि पा ग्रूनीम। मेकोपुकी हिंशा परमप्रभु यावे, आंइ परमप्रभु गे लेत्नीम। मिनु मेकोपुकीमी इन कली मान पा हिंनीम। भजन संग्रह ७२:९
18 इन खोदेंशो परमप्रभु अर्को सु बाक्बा ङा? गे ठीक मपशो क्याम्ब बाक्नीनी। इन लीशो मुर आन मरिम्शो पतीके माफ गेनीनी। गे गेना हना यो गाइक्स ङा गाइक्स मबाक्नीनी। तन्न शिशी पचा कली ग्येरशा बाक्नीनी। भजन संग्रह १०३:३,८-१३
19 मेकोमी आंइ कली लेंशा शिशी पाइब। मेकोमी आंइ पाप कली दिम्ब। गे आंइ पाप शुश लुक्च लशो समुन्द्रमी ताइक्नीनी।
20 गे याकूब कली इन थमा सुइक्तीके कोंइनीनी। मिनु अब्राहाम कली दाक्शा मप्रोंइतीके कोंइताक्नी। गे साइ ङोंइती आंइ किकी पिप आन कली कसम जशा लोव़ गेशो बाक्तीनी। उत्पत्ती २८:१३-१५; उत्पत्ती २२:१६-१८; लूका १:७३