Micah 5 in Sunwar
1 गे गारो हिरशो सहर बाक्नेवे। लडाइ पाइबपुकीमी इ कली पुम्नीम। मिनु इस्राएल कली सासन पाइब कली कोक्केम चोव़चोम तुप्नीम। उत्पत्ती ३५:१९; मत्ती २:५-६; यूहन्ना १:१-२
2 तन्न गे बेथलेहेम एफ्राथाह, गे यहूदा ङा सहर आन दाते ङा आइक्च बाक्ते हना यो, इ रे पा आं पा ङा इस्राएल कली हुकुम पाइब का जाक्ब। मेको साइ ङोंइती रेन बाक्शो बाक्त। यसैया ४:१७; यसैया ११:१२
3 मिनु परमप्रभु यावेमी इस्राएली आन कली काइ मकोव़ब। मिनु मीश मुरुमी आल थिवा नोले ला कोव़ब। मेना लीशो मुरपुकी इस्राएल ङा मुर नु गारशा, लेत्चा पुंइसीनीम। इजीकीएल ३४:२३
4 मिनु मेकोमी परमप्रभु यावे आ सक्तिमी आ बगाल आन कली योव़ब। मिनु मेकोमी आ परमप्रभु यावे आ ठेयब नेंमी आ गेय पाइब। मिनु मेकोपुकी रिम्शो पा बाक्नीम। मारदे हना मेको रागी ङा सुर सम्म नेल्ल क्येङा ठेयब दुम्ब। यसैया ९:५; एफिसी २:१४
5 मिनु मेकोमी थुं नाइक्चा गेब। मिनु अस्सुर ङा मुर इं रागी ओव़शा लडाइ पचा गोम्तेक्म हना, गोपुकीमी ७ जना गोठला नु ८ जना हुकुम पाइब वोइक्नीकी।
6 मेकोपुकीमी अस्सुर रागी कली तरवारम हुकुम पाइनीम। निम्रोद रागी कली शोइश्शो तरवारमी हुकुम पाइनीम। मिनु मेकोपुकीमी इं कली “अस्सुरी इं रागी ओव़तेक्म हना यो, इं कली प्रोंइनीम। इ रागी ङा सांदम जाक्तेक्म हना यो, इं कली प्रोंइनीम” देंनीम। भजन संग्रह ११०:३
7 याकूब आ लीशो मुर शुश आन दातेम परमप्रभु यावे रे जाक्शो सीत नु घांस तार जुक्शो रेउ खोदेंशो दुम्नीम। मेकोमी “सुइ मुरुम वारच पाइनीमी कों” दे मकोव़नीम। मिनु मुर आन आस मपाइनीम।
8 याकूब आ लीशो मुर शुश आन दातेमी ब्वाकी ङा गुप्स खोदेंशो दुम्नीम। मेकोपुकी भेडा गोठम बाक्शो गुप्स आ चाइक्ब खोदेंशो दुम्नीम। गुप्स मेकेर लाम्तेक्म हना, साइश्शा ब्वाइनीम। मिनु सुइमी मेको आन कली प्रोंइने मचाप्नीम।
9 मिनु परमप्रभु यावेमी “गे इन गुइ इन जोरी सत्रु क्येङा बोल्यो दुम्शा ग्रानीनी। मिनु इन जोरी सत्रु नेल्ल खतम दुम्नीम। जकरिया ९:१०
10 मेको नाक्ती गो इन शारा इन दाते रे खतम पोक्नुङ। इन बग्गी प्रेश्शा गेनुङ।
11 गो इन रागी ङा सहर नेल्ल खतम पोक्नुङ। गो इन बोल्यो दरवार नेल्ल प्रेत्नुङ।
12 गो इन टुना मुना पशो आ पर्बम इन कली खतम पोक्नुङ। मिनु इन दातेमी साहीत कोव़ब आन कली बाक्चा मगेनुङ। जकरिया १३:२
13 गो इन दाते ङा मूर्ति नेल्ल खतम पोक्नुङ। इन पूजा पचा कली ख्रुक्शो फुल्लु खतम पोक्नुङ। मिनु इन गुइमी सेल्शो थोव़क आन ङोंइती मबाप्नीनी।
14 गो इन दाते ङा मूर्ति पाइश्शो थाम तुल्शा बेरपाइक्नुङ। मिनु इन सहर आन कली प्रेत्नुङ।
15 गो गाइश्शा चुरशा रागी रागी ङा मटीब मुर आन कली क्येक्क लेत्नुङमी” देंत।