Matthew 17 in Sunwar

1 मिनु ६ नाक्‍त नोले येसुमी पत्रुस, याकूब नु आ लोक्‍ब यूहन्‍ना सां आन कली सुइ मबाक्‍तीके लाइश्‍शो डांडामी लदा बाक्‍त। मत्ती २६:३७; मर्कूस ५:३७; मर्कूस १३:३; मर्कूस १४:३३; लूका ८:५१

2 मिनु मेको आन ङोंइती येसु फांइसेनु, मेकोपुकीमी आ कुल नां खोदेंशो नु आ फेक्‍शो वा बुबु पा जिलील पा बुश दुम्‍शो तामे बाक्‍त। २पत्रुस १:१६-१८; प्रकाश १:१६

3 मिनु मोसा नु एलीया जाक्‍शा, येसु नु लोव़सी पशो तामे बाक्‍त।

4 मिनु पत्रुसमी येसु कली “हे प्रभु, इं कली एकेर बाक्‍चा रिम्‍शो दुम्‍ब। गे दाक्‍नीनी हना, बाक्‍तीके सां सेल्‍नुङ। इन कली का, मोसा कली का नु एलीया कली का सेल्‍नुङ” देंमाक्‍त।

5 मोदेंशो लोव़ पना पन बाक्‍मेनु, जिलील पा बुश तांइसीशो गोस्‍सुमी नेल्‍ल आन कली गिल्‍मी बाक्‍त। मिनु गोस्‍स आगा रे “एको आं दाक्‍शो तौ बाक्‍ब। एको कली तशा ग्‍येरसाक्‍यी। आ लोव़ नेनीने” देंशो सेंदा नेन्‍मे बाक्‍त। मत्ती १:१७

6 मोदेंशो नेंशा, शेंसीबपुकी हिंशा खुम्‍की पा बाम्‍मा बाक्‍त।

7 मिनु येसुमी मेको आन कली गुइमी थिशा “बोक्‍कीन, महिनीन” दे माइक्‍मी बाक्‍त।

8 मिनु बोक्‍शा कोव़ङमेनु, येसु कली ला तामे बाक्‍त।

9 मिनु डांडा रे ब्रुम्‍मानु, येसुमी “रागीम जरमेशो बेक्‍शो रे मसेंसे सम्‍म इन तशो सुइ आन कली मशेंदीने” दे माइक्‍मी बाक्‍त। मत्ती १६:२०

10 मिनु शेंसीबपुकीमी “सास्‍त्रीपुकीमी ‘ङोंइती एलीया जाक्‍चा माल्‍ब’ दे शेंनीम ममाइ? मारदे मोदें शेंनीमी?” दे हिल्‍लो पामेनु मत्ती ११:१४

11 “थमान, एलीया ङोंइती जाक्‍शा, नेल्‍ल ठीक सेल्‍ब।

12 तन्‍न एलीया ङोंइती जाक्‍त। आ जाक्‍मेनु, सास्‍त्रीपुकीमी तुइक्‍तेम। मिनु मेको कली मार पचा दाक्‍तमे, मेकोन पाम्‍तेक्‍म। मोदेंशो पा रागीम जरमेशोमी यो आन गुइ रे पा श्‍येत गेचा पुंइसीब, दे गो इन कली देंनुङ” देंमाक्‍त। मत्ती १४:९-१०

13 मिनु “ब्‍वाक्‍कुम ख्रुम्‍शा ग्रुंइब यूहन्‍ना आ पर्बम लोव़ देंशो बाक्‍माक्‍त” दे रुप्‍मे बाक्‍त। लूका १:१७

14 मिनु येसु नु आ शेंसीब सां शुश मुर देल्‍शा बाक्‍तीकेमी जाक्‍मानु, मुर का येसु आ ङोंइती जाक्‍शा, पोक्‍च थेक्‍शा सेउ पा

15 “हे प्रभु, आं तौ कली शिशी पा सापतीने। आं तौ छारे रोइ पा मीम दुप्‍पांइसीशा ब्‍वाक्‍कुम ग्रुम्‍पांइसीशा, शुश श्‍येत जना जन बाक्‍ब।

16 इन शेंसीब आन कली सापतीने देंङानु, सापाइक्‍ने मचबेम” दे माइक्‍तु।

17 मिनु येसुमी “गे थमा पा थमा मसुइक्‍ब नु मटीबपुकी, गेना सम्‍म गेपुकी नु बाक्‍नुङा? ओदेंशो इन पशो गेना सम्‍म फाल्‍शा बाक्‍नुङा ङा? रोइ पाइब कली चाक्‍कीन” देंत।

18 मिनु चाक्‍गमेनु, येसुमी वोल कली हुइश्‍शा खेरतु। मिनु आल ब्रा सात।

19 मिनु मुर गाक्‍मा नोले शेंसीबपुकीमी येसु कली “मारदे गो मेको वोल कली खेरने मचाप्‍का?” दे हिल्‍लो पामेनु,

20 येसुमी “थमा पा थमा सुइक्‍ने मचाप्‍बपुकी, नोफा दाइश्‍शा नेनीने, रायो गेडा खोइ ला थमा सुइक्‍तीनी हना, इन पने मचाप्‍चा ङा मारेइ मलीब। एको डांडा याक्‍सो देंनीनु, एको डांडा यो याक्‍सीशा लाइब। मत्ती २१:२१; लूका १७:६; १कोरिन्‍थी १३:२

21 ओदेंशो वोल खेरचा कली चहिं बर्त बाक्‍शा, प्रार्थना पा ला ग्रुंइने चाम्‍सीब” दे माइक्‍तीमी।

22 मिनु गालील रागीम बाक्‍मानु, येसुमी “रागीम जरमेशोमी मुर आन गुइमी गेशा साइक्‍चा पुंइसीब। मत्ती १६:२१; मत्ती २०:१८-१९

23 मिनु बेक्‍शो आ नित्‍थ नाक्‍त बेक्‍शो रे सेंसीब” देंमेनु, शेंसीब आन थुं थाम्‍पान खाइक्‍मा बाक्‍त।

24 मिनु नोले कापेरनाउम सहर जाक्‍दीम्‍मानु, ग्रुम्‍तीक खिं ङा तिरो पोक्‍बपुकीमी पत्रुस कली “इन कली शेंबमी तिरो मथाप्‍बा?” देंमानु प्रस्‍थान ३०:३३; २राजा १२:५-६

25 “थाप्‍ब” देंमाक्‍त। मिनु खिं लेश्‍शा जाक्‍मेनु, येसुमी पत्रुस कली “ए सिमोन, पिपपुकीमी तिरो पोक्‍पदमेनु, आन तौ आन के यो पोक्‍नीमी देय अर्को रागी ङा मुर आन के ला पोक्‍नीमी, मार देंनेवे?” दे हिल्‍लो पाप्‍तु।

26 पत्रुसम “अर्को रागी ङा मुर आन के ला पोक्‍नीम” देंत। “लो, मो हना तौपुकीमी तिरो थाप्‍चा ममाल्‍बाक्‍मा बाक्‍त।

27 मोदेंशो बाक्‍त हना यो, मेको आन थुं नुपाइक्‍चा कली तिरो थाप्‍तस। गे समुन्‍द्रमी लशा, बोल्सी ग्‍यारशा, नेल्‍ल क्‍येङा ङोंइती रेश्‍शो ङांइ आ शोव़ पाक्‍को। आ शोव़ आगामी स्‍तातेर का थित्‍नेवे। मेको लाइश्‍शा, इस तिरो थाप्‍तो” दे माइश्‍शा सोइक्‍ताक्‍व। स्‍तातेर का ४ देनार बाक्‍ब। ग्रीक क्‍येट बाक्‍ब।