Mark 16 in Sunwar
1 मिनु नाइक्तीक नाक्त नोले माग्दाला ङा मरीयम, याकूब आ ममा मरीयम नु सालोमेमी बेक्शो मुर आ रांम ख्रेक्चा कली ख्रेक्तीक ग्याप्मे बाक्त।
2 मिनु हप्ता ङा ङोंइती नाक्त सुनी कना बोक्शा, नां सोव़मेनु, पुक्खी गे लमा बाक्त।
3 मिनु लमा लमा “फुल्लु सुमी याक्शा गेबा?” देंमुमा बाक्त।
4 मिनु जाक्दीश्शा कोव़ङमेनु, फुल्लु याक्ने थुम्शो तामे बाक्त। मेको फुल्लु शुश ठेयब बाक्माक्त।
5 मिनु पुक्खी ओव़शा कोव़ङमेनु, बुश वा फेक्शो ठिटा का ग्युरा गे निश्शो तशा छक लाक्मा बाक्त।
6 मिनु मेको ठिटामी “मार छक लाक्नी? शीमी क्येप्शा कांटी थोक्शा क्याइश्शो नासरथ ङा येसु कली माल्थ जाक्नी ममाइ? आ बेक्शो रां वोइक्तीके कोव़ङीन, मबाक्ब। बेक्शो रे सेंसाक्व।
7 मुल लशा, पत्रुस, शेंसीब नेल्ल आन कली नु इन ङोंइती तुइक्पाइश्शो खोदेंशो पा, इन ङोंइती गालील जाक्दीप्ब। मेकेर ग्रुम्चा ताइनीनी, दे शोव़थ लने” दे माइक्मी बाक्त। मर्कूस १४:२८
8 मिनु मीश मुरपुकी छक लाक्शा, हिंशा ख्रिंख्रि पा फो फु ग्रूशा प्रोक्मा बाक्त। मिनु सुइ कली मारेइ मदेंमा बाक्त। मारदे हना क्युल हिंशो बाक्मा बाक्त।
9 हप्ता ङा ङोंइती नाक्ती सुनी कना येसु बेक्शो रे सेंसीशा, ७ ओटा वोल ग्रुंइचा पुंइसीशो माग्दाला ङा मरीयम कली तपांइसे बाक्त। लूका ८:२; यूहन्ना २०:१-१८
10 मरीयममी येसु कली तशा, लशा, ङोंइती येसु नु काथा गाक्ब मुल आन थुं खाइश्शा बाक्ब आन कली “गो येसु कली बेक्शो रे सेंसीशा ब्रोंइशो ताता” दे शोव़ङा बाक्त।
11 मेकोपुकीमी मरीयम आ लोव़ थमा मसुदमे बाक्त।
12 नोले येसु कली थमा सुइक्ब निक्शी आस गाउं लसानु, लांमी येसुमी तपांइसे बाक्त। लूका २४:१३-३५
13 मेको निक्शी फ्रा फ्रु लेश्शा जाक्शा, अरु आन कली “येसु कली ताइतस्कु” देंसा बाक्त। मिनु मेको आस लोव़ यो थमा मसुदमे बाक्त।
14 मिनु नोले आ शेंसीब ११ जनामी खमे जना जन बाक्मानु, येसुमी मेको आन कली तपांइसे बाक्त। मिनु “मुल सम्म रुप्चा थुं मपनी? मुल यो थमा मसुइय्यीनी?” दे हुइक्तीमी बाक्त। मारदे हना “बेक्शो रे सेंसीशा ब्रोंइशो आंइ मिक्चीमी ताइतक” देंब आन लोव़ थमा मसुइश्शो बाक्मा बाक्त। १कोरिन्थी १५:५
15 मिनु येसुमी आ शेंसीब ११ जना आन कली “रागी नेल्ल हिरशा, ग्येरपाइक्ब लोव़ नेल्ल आन कली नेंपतीने। मर्कूस १३:१०; मत्ती २८:१६-२०
16 सुमी थमा सुइश्शा, ब्वाक्कुमी ख्रुम्शा ग्रुंइचा पुंइसीबा, मेको ब्रोंइचा ताइब। सुमी चहिं थमा मसुइक्बा, मेको सजाइ गेचा पुंइसीब। प्रेरित २:३८; प्रेरित १६:३१-३३
17 थमा सुइक्बपुकी दोदेंशो सक्ति पाइश्शो दुम्नीम देंशा हना, आं नें थिशा वोल आन कली ग्रुंइशा खेरनीम। परमप्रभु यावे आ सोक्तीमी पपाइश्शो लोव़ ब्वाक्नीम। प्रेरित १६:१८; प्रेरित १०:४६; प्रेरित १९:६
18 बुस्स ग्याइक्ताक्म हना यो, ओश्येर तूतेक्म हना यो, मेको आन कली मारेइ मदुम्ब। रोइ पाइब आन तारी गुइ चाक्शा प्रार्थना पामेनु, सानीम” दे माइक्मी बाक्त। लूका १०:१९; प्रेरित २८:३-६; याकूब ५:१४-१५
19 मेको लोव़ नेल्ल थुम्शा नोले प्रभु येसु स्वर्ग लाइक्चा पुंइसे बाक्त। मिनु परमप्रभु यावे आ ग्युरा गे निस्से बाक्त। प्रेरित १:२; भजन संग्रह ११०:१; प्रेरित ७:५५
20 मिनु येसु कली थमा सुइक्बपुकी लशा, ग्येरपाइक्ब लोव़ तेइ तेइ नेंपाइक्ना पाइक्न गाक्मा बाक्त। प्रभु यो मेकोपुकी नु काथा बाक्शा, चिन्ड कोंइना कोंइन मेको आन लोव़ थमा बाक्ब देंबाक्माक्त। प्रेरित १४:३; हिब्रू २:४