Mark 12 in Sunwar
1 मिनु येसुमी कथा सेल्शा, शेंचा गोवा बाक्त। मिनु “मुर कामी अङगुर ख्रुम्शा, थारपु हिरशा, अङगुर ख्राक्तीक खाल्टा दोशा, धन्सार सेल्शा, बुम्था पाइब माल्शा, मेको आन कली गेशा वोइश्शा, अर्को रागी लमाक्त। यसैया ५:१-२
2 मिनु अङगुर मीशा, सेक्ची जाक्मेनु, आ गेय पाइब का कली आ भाग पोक्थ सोइक्ता बाक्त।
3 मिनु मेको जाक्दीम्मेनु, बुम्था पाइबपुकीमी मेको कली तुप्शा, श्येत्थ गुइ सोइक्तमे बाक्त।
4 मिनु लेंशा गेय पाइब का कली सोइक्ता बाक्त। मेको कली यो जिचा तोशा, पिया प्रोल्शा, गार सेल्शा सोइक्तमे बाक्त। २इतिहास ३६:१६
5 मिनु लेंशा का कली सोइक्तानु, मेको कली सदमे बाक्त। मोदें शुश खेयप गेय पाइब आन कली सोइक्तानु, का निक्शी आन कली तुप्मे बाक्त। का निक्शी आन कली सदमे बाक्त।
6 मिनु सोइक्ने चाप्चा ङा का ला लीमाक्त। मेको आ दाक्शो तौ बाक्माक्त। मिनु ‘आं तौ आ देंशो टीनीम’ दे मिम्शा, आ तौ कली सोइक्ता बाक्त।
7 मिनु बुम्था पाइबपुकीमी ‘एको दा अङस ताइब बाक्त। लो साइक्चा। मिनु आ अङस नेल्ल इं केन दुम्ब’ देंमुशा गारमा बाक्त।
8 मिनु ग्याइश्शा, साइश्शा, रू रे लाइश्शा ताइक्तमे बाक्त। हिब्रू १३:१२
9 मोदेंशो दुम्त हना, रू आ होव़पम मार पाइबा? जाक्शा, मेको बुम्था पाइब आन कली साइक्ब। मिनु आ रू अरु आन कली गेब।
10 ‘खिं सेल्बपुकीमी गारो प्रोव़ङमेनु, एको फुल्लु मगार, दे ताइक्तमे बाक्त। मेको मगारथु ताइश्शो फुल्लु चहिं सुर ङा सुरे फुल्लु दुम्माक्त’ दे ब्रेक्शो लोव़ मपढेनी?
11 मेको नेल्ल प्रभुमी पशो बाक्त। मिनु ‘ओहो, गिश रिम्शो दुम्मे। एको छक लाक्चा ङा बाक्ब’ दे ब्रेक्शो बाक्ब” दे माइक्मी बाक्त। भजन संग्रह ११८:२२-२३
12 मिनु “एको कथा इं कली कका देंमाक्त” दे रुप्शा, ग्याइक्पाइक्चा माल्मे बाक्त। तन्न शुश मुर देल्शो तशा हिंशा, ब्राशा लमा बाक्त।
13 मिनु येसु कली लोव़ ख्राइक्पाइक्चा दे फरिसी नु हेरोदी का निक्शी येसु आ बाक्तीके सोइक्तमे बाक्त।
14 मिनु मेको सोइश्शोपुकी जाक्शा, येसु कली “शेंब, गे थमा पाइब ननी। मुर आन कुल मकोव़थु सुइ तशा महिंथु, परमप्रभु यावे आ लोव़ थमा पा शेंनीनी, दे तुइक्नीकी। सिजर सरकार कली तिरो थाप्चान माल्ब देय मथाप्थु यो दुम्बा?
15 गोपुकीमी थाप्चा देय मथाप्चा? मार देंनीनी” दे हिल्लो पखु पा लोव़ ख्राइक्पाइक्चा माल्मे बाक्त। मिनु येसुमी मेको आन पचा माल्शो तुइश्शा, मेको आन कली “मारदे आं थुं थाम्नीनी? देनार का कोंइदीनी” देंमाक्त। देनार का नाक्त का ङा गाल्च बाक्त। मेको रोम ङा चांदी के क्येट बाक्त।
16 मिनु देनार का कोंइदमे बाक्त। मिनु येसुमी “एको सु आ नेंमी ख्रोइश्शो बाक्मे?” देंमेनु “सिजर आ नेंमी ख्रोइश्शो बाक्त” देंमा बाक्त।
17 मिनु येसुमी “सिजर आ मार मार बाक्मा, मेको सिजर कली गेने। परमप्रभु यावे आ मार मार बाक्मा, मेको परमप्रभु यावे कली गेने” दे माइक्मी बाक्त। मिनु नेल्ल छक लाक्मा बाक्त। रोमी १३:१७
18 मिनु सदुकीपुकी जाक्मा बाक्त। सदुकीपुकीमी बेक्शो रे मसेंसीब दे शेंनीम। मिनु येसु आ बाक्तीके जाक्शा
19 “ए शेंब, मोसामी ब्रेक्शो लोव़मी ‘सुइ आ लोक्ब आल मथिथु बेक्त हना, मेकोमी आ भोग्यु वोंइसीशा, आ लोक्ब आ खिं ङा मुर मजाम्मल, दे तमी तौ थिवल’ दे ब्रेक्शो बाक्त। ब्यवस्था २५:५-६
20 मिनु खिं कामी ७ जना लोक्ब बाक्मा बाक्त। ङोंइती जेठामी मीश चाक्गा बाक्त। मिनु आल मथिथु बेक्माक्त।
21 मिनु माइलामी आ भोग्यु वोंइसे बाक्त। मिनु आ यो आल मथिथु बेक्माक्त। मिनु साइलामी वोंइसे बाक्त। मेको यो आल मथिथु बेक्माक्त।
22 मोदेंशो पा ७ जनान आल मथिथु, बेक्मा बाक्त। मिनु नोले मेको मीश मुर यो बेक्माक्त।
23 मुर बेक्शो रे सेंसीशा ब्रोंइमानु, मेको ७ जना वोंइश आन मीश दुम्शो मीश मुर तेको आ मीश दुम्बा?” दे हिल्लो पामे बाक्त।
24 मिनु येसुमी “गे परमप्रभु यावे आ लोव़ मरुप्नीनी। परमप्रभु यावे आ सक्ति यो मतुइक्नीनी। मोपतीके दूली मिम्नीनी, ममाइ?
25 बेक्शो रे सेंसीशा ब्रोंइमानु, मुरपुकीमी ग्युंबे मपाइनीम, स्वर्गम बाक्ब परमप्रभु यावे आ गेय पाइबपुकी खोदेंशो दुम्नीम।
26 बेक्शो रे सेंसीचा आ पर्बम परमप्रभु यावेमी मोसा कली मी ब्रशो रवा आ नेक्था ग्रुम्शा ‘अब्राहाम आ परमप्रभु यावे, इसहाक आ परमप्रभु यावे नु याकूब आ परमप्रभु यावे गो नङ’ दे मदा बाक्त दे मोसामी ब्रेक्शो किताबमी ब्रेक्शो बाक्ब। मेको लोव़ मपढेनी? प्रस्थान ३:६
27 परमप्रभु यावे बेक्शो मुर आन परमप्रभु ममाइ, ब्रोंइशो आन परमप्रभु यावे बाक्ब। गे दूली मिम्बाक्नी बाक्त” दे माइक्मी बाक्त।
28 मिनु सास्त्री कामी सदुकीपुकीमी येसु नु लोव़ पशो नेंशा, येसुमी मेको आन लोव़ लेन्ने चाप्बाक्त, दे रुप्शा ङा मिन, येसु आ नेक्था जाक्शा “ए शेंब, परमप्रभु यावे आ अरेशो लोव़ तेको नेल्ल क्येङा ङोंइती ङा बाक्बा?” दे हिल्लो पवा बाक्त।
29 मिनु येसुमी “नेल्ल क्येङा ङोंइती ङा लोव़ एकोन बाक्ब ‘ए इस्राएल नेनो, इ परमप्रभु यावे का बाक्ब।
30 थुं का पा, सोक्त का पा, मिम्तीके नु सक्ति नेल्लेमी परमप्रभु यावे, इ परमप्रभु कली दाक्तो’ देंशो एको लोव़ नेल्ल क्येङा ङोंइती ङा बाक्ब। ब्यवस्था ६:४-५
31 मिनु आ नोले ङा ठेयब लोव़ ‘आंम इ कली दाक्शो खोदेंशो पा इ नेक्था बाक्ब आन कली यो दाक्तो’ देंशो बाक्ब। एको लोव़ निक्शी क्येङा ठेयब लोव़ मबाक्ब” देंमाक्त। लेवी १९:१८
32 मिनु सास्त्रीमी “शेंब, गे थमान ठीक लोव़ पाइतीनी। परमप्रभु यावे कानाइ बाक्ब। आ ङा लाक्शा सुइ मबाक्ब। लूका २०:३९-४०
33 मिनु थुं का पा, रुप्तीक नु सक्ति नेल्लेमी परमप्रभु यावे कली दाक्चा, आंम कली दाक्शो खोदेंशो पा इ नेक्था बाक्ब आन कली दाक्चा, देंशो लोव़ नेल्ल क्येङा ठेयब बाक्त। मारेइ मारेइ क्योरशा चढ़ेशो क्येङा मेको लोव़ टिशा पचा रिम्शो बाक्ब” देंमाक्त। १सामुएल १५:२२; होसे ६:६; मत्ती ९:१३
34 मिनु येसुमी “एकोमी निप्स खाप्शो लोव़ पाइबाक्त” दे रुप्शा “गे परमप्रभु यावे आ राज्य रे ङोन मबाक्नी बाक्त” दे मदा बाक्त। में ङा मेरे हिंशा, सुइमी लोव़ हिल्लो मपामे बाक्त। प्रेरित २६:२७-२९
35 मिनु येसुमी परमप्रभु यावे आ खिंमी शेंना शेंन बाक्मेनु “ख्रीस्त दाऊद आ तौ बाक्माक्त, दे सास्त्रीपुकीमी दोपा शेंने चाप्नीमी ङा? यसैया ११:१; यूहन्ना ७:४२; रोमी १:३
36 दाऊदमी परमप्रभु यावे आ सोक्त रे पा ‘प्रभुमी आं प्रभु कली इ जोरी सत्रु आन कली इ खोइली आगाम मवोदुमी सम्म आं ग्युरा गे बाक्को’ देंत। भजन संग्रह ११०:१; २सामुएल २३:२
37 दाऊदमी मेको कली प्रभु देंब। मिनु दोपा आ तौ दुम्ने चाप्बा ङा?” दे शेंदा बाक्त। शुश मुरुमी आ शेंशो लोव़ नेंचा दाक्तमे बाक्त।
38 मिनु शेंना शेंन “सास्त्री आन लोव़ क्येङा होस पांइसीने। मेकोपुकीमी लाइश्शो कोट फेक्शा गाक्चा दाक्नीम। बजारमी हिरशा, मान पपांइसीचा दाक्नीम।
39 ग्रुम्तीक खिंमी ठेयब नित्तीकेमी नित्चा दाक्नीम। भोजमी मान पपांइसीचा ङा नित्तीकेमी नित्चा दाक्नीम।
40 वोंइश बेक्शो मीश मुर आन शोंप नेल्ल नेक्शा गेशा, दुइश्शो दुइश्शो प्रार्थना पा कोंइखु पाइनीम। मोदेंशो पाइबपुकीमी अरु आन क्येङा शुश सजाइ ताइनीम” देंमाक्त। याकूब १:२७
41 मिनु येसुमी क्येट चढ़ेतीक एरे निश्शा, शुश मुरुमी क्येट चढ़ेशो कोव़ना कोव़न बाक्माक्त। क्येट थीब शुशेमी शुश क्येट चढ़ेमे बाक्त। २राजा १२:१०
42 मिनु आ वोंइश बेक्शो मारेइ मथीब प्रुङग मीश मुर का जाक्शा, लेप्तोन निक्शी चढ़ेवा बाक्त। लेप्तोन का नेल्ल क्येङा आइक्च तांबा के क्येट बाक्त।
43 मिनु येसुमी आ शेंसीब आन कली ब्रेश्शा “नोफा दाइश्शा नेनीने, नेल्लेमी चढ़ेशो क्येङा मेको प्रुङग मीश मुरुमी शुश चढ़ेप्तु।
44 आ जशा ब्रोंइतीक क्येट नेल्ल गेप्तु। अरुमी चहिं आन गाप्शो रे गेम्तेक्म” देंमाक्त।