Malachi 2 in Sunwar
1 मिनु मुर नेल्ल आन परमप्रभु यावेमी “गे चढ़ेबपुकी, एको शेंशो लोव़ इन कली बाक्ब।
2 गे इन नोफा मदाइक्ताक्नी नु आं नें कली मान पचा कली ममिम्ताक्नी हना, गो इन कली सराप पाइनन्नी। इन कली गेशो आसीक सराप दुम्ब। मारदे हना गे काइ मटीब बाक्नीनी। गो थमा पा इन आसीक कली सराप सेल्नुङ। ब्यवस्था २८:१५
3 गो इन पतीके इन आल आन कली हुइक्नुङ। इन चढ़ेशो बस्तु आन गा क्यी ङा ग्रांग्रा इन कुलम देप्नुङ। मिनु इन कली आं ङोंइती रे तिल्नुङ।
4 गो लेवी नु पशो कबल गेना हना यो लील, दे इन कली मेको शेंतीक सोइक्ताक्ङ।
5 आं पशो कबल ब्रोंइतीक नु थुं नाइक्तीक कबल बाक्ब। गो मेको कबल आं कली मान पा हिंल, दे गेता। मेकोमी आं कली मान पा आं नें थिचा शुश हिंत।
6 मेकोमी रिम्शो शेंतीक लोव़ पाप्तु। गेनायो दूली मशेंद। थम रिम्शो नु ठीक पतीकेमी गो नु गाक्त। मिनु मेकोमी ठीक मपाइब शुश मुर आन कली आन मरिम्शो पतीक रे लेप्पाइक्तु।
7 चढ़ेबपुकीमी तुइक्तीक लोव़ होस पा पचा माल्नीम। मिनु मुरपुकीमी मेको आन शेंशो नेंचा माल्नीम। मारदे हना चढ़ेबपुकी मुर नेल्ल आन परमप्रभु यावे आ सोइश्शो लोव़ पाइब बाक्नीम। ब्यवस्था ३३:१०; हाग्गै १:१३
8 गेपुकी चहिं आं लां प्रोंइशा, हेंथे गाक्तीनी। इन दूली शेंतीकेमी गे शुश मुर आन कली हेंथे गाक्ब सेल्तीनी। गेपुकीमी लेवी नु पशो कबल खतम सेल्तीनी” दे मुर नेल्ल आन परमप्रभु यावेमी देंत।
9 परमप्रभुमी “मोपतीके गो इन कली मुर नेल्ल आन ङोंइती आइक्च नु महिक्सीशो सेल्ता। मारदे हना गेपुकीमी आं लां प्रोंइतीनी। आं शेंशो लोव़ मटिथु, कुल कोव़मुशा हुकुम पाइतीनी” देंत।
10 मार, गो नेल्ल इं आफ कान ममाइ ङा? मार, परमप्रभु कामीन इं कली मसेला ङा? मारदे गोपुकीमी कामी अर्को कली थमा मसुइक्थु, इं किकी पिपी आन कली गेशो कबल ख्रोइक्नया? मलाकी १:६; अय्युब ३१:१५; एफिसी ४:६
11 यहूदामी आं कली प्रोंइती। मिनु इस्राएल नु यरूसलेममी ग्रांग्रा दित्चा ङा गेय दुम्शो बाक्ब। मारदे हना यहूदामी परमप्रभु यावे आ दाक्शो बाक्तीके ग्रांग्रा दिशो सेल्तु। दोपा मोदेंशो सेल्तु देंशा हना, आंम तौ आन कली देवी देवता आन कली ठेयब सेल्ब मुर आन तमी चाक्तु। एज्रा ९:२
12 परमप्रभु यावेमी मोदेंशो पाइब मुर आन कली याकूब आ मुर आन बाक्तीक ताम्बु रे तिल्ब। मिनु मेकोपुकीम मुर नेल्ल आन परमप्रभु यावे कली गेनायो चढ़ेचा मताइनीम।
13 गेपुकीमी अर्को मार पाइनीनी देंशा हना, परमप्रभु यावे आ चढ़ेतीके आ नेक्था ङाक्शा, रोंका पा इन प्रेक्कुमी जित्नीनी। मारदे हना इन चढ़ेशो ग्येरशा मब्राइब। मलाकी १:१०
14 मिनु गेपुकीमी “मारदे मब्राइबा”? दे हिल्लो पाइनीनी। मारदे हना गे इन ठिटा बाक्ची ना ङा मीश प्रोंइतीनी। मेको आ पर्बम परमप्रभु यावे सांकछी बाक्ब। मेको इ वारच इ मीश बाक्ब, इ कबल पा चाक्शो मीश बाक्ब।
15 परमप्रभुम मेको निक्शी आस कली कान मसेला ङा? मेको आस सोक्त नु गिंम परमप्रभु यावे के बाक्नीस। मारदे मेको निक्शी आस कली कान सेल्तु देंशा हना, आस आल परमप्रभु आ मुर दुम्मल, दे कान सेल्तु। मोपतीके गेपुकी आंम थुं आ पर्बम होस पा, सुइमी आंम ठिटा बाक्ची ना ङा मीश कली मप्रोनीन।
16 मारदे हना परमप्रभु यावे, इस्राएली आन परमप्रभुमी गो मीश, वोंइश कली प्रोंइब मुर काइ मदाक्नुङ। आन जिशो मदाक्नुङ। मोपतीके इन थुं फ्रेंदीन। इन मीश मप्रोंइब दुमीन। ब्यवस्था २४:१
17 गे इन लोव़मी परमप्रभु यावे कली ब्रीपाइक्तीनी। मोपा यो गेपुकीमी “गोपुकीमी मार लोव़मी इन कली ब्रीपाइक्का?” देंतीनी। गेपुकीमी “दूली लोव़ पा मरिम्शो गेय पाइब नेल्ल परमप्रभु यावे आ ङोंइती ठीक बाक्नीम। मिनु मेको, मेको आन कली तशा ग्येरसीशो बाक्ब” दे “निसाफ पाइब परमप्रभु ते बाक्बा ङा?” दे यो देंनीनी। मलाकी ३:१३-१४