Luke 2 in Sunwar

1 मिनु मेना सिजर अगस्‍टसमी “रागी नेल्‍ल ङा मुर आन नें ब्रेक्‍शा हिक्‍चा नमी” दे हुकुम पवा बाक्‍त।

2 मोदेंशो नें ब्रेक्‍‍तीके ङोंइती गेनायो मपशो बाक्‍मा बाक्‍त। मुल पामेनु, सिरीया रागीम क्‍वीरीनीयसम सासन पशो बाक्‍माक्‍त।

3 मिनु मुर नेल्‍ल आन नें ब्रेक्‍पाइक्‍चा कली आन थर ङा सोतीक बोतीक गाउं गाउं सहर सहरम जाक्‍दीम्‍मा बाक्‍त।

4 योसेफ पिप दाऊद आ खिं ङा बाक्‍माक्‍त। पिप दाऊद आ खिं ङा मुर आन सोतीक बोतीक बेथलेहेम सहर बाक्‍माक्‍त। मोपतीके योसेफ आ मीश मरीयम कली लाइश्‍शा, गालील रागी ङा नासरथ सहर रे यहूदीया रागी ङा बेथलेहेम सहर लमाक्‍त।

5 मोपा आस नें ब्रेक्‍पाइक्‍थ लसानु, मरीयम कोव़ज कुरशो बाक्‍माक्‍त।

6 मिनु बेथलेहेम सहरम जाक्‍दीस्‍सा नोले मरीयम आल थितीक रोइ पवा बाक्‍त।

7 मेकेर बास बाक्‍तीक खिं मथित्‍थु, गोठ कामी बास बाक्‍सा बाक्‍त। मिनु गोठम बाक्‍सानु, मरीयममी तौ का थिशा, वाम गिल्‍शा, शुंगुम इप्‍पदा बाक्‍त। मत्ती १:२५

8 मेकेर गोठलापुकी बाक्‍मा बाक्‍त। मेकोपुकी नाक्‍दो रूम बाक्‍शा, आन भेडा खाल पशो बाक्‍मा बाक्‍त।

9 मिनु परमप्रभु यावे आ स्‍वर्ग ङा गेय पाइब का गोठला आन बाक्‍तीकेम फो ग्रूमाक्‍त। मिनु परमप्रभु आ छेङछेङमी मेको गोठला आन एर ओंथ ठेयब हाम्‍सो सेला बाक्‍त। मेको तशा गोठलापुकी शुश हिंमा बाक्‍त।

10 तन्‍न परमप्रभु यावे आ स्‍वर्ग ङा गेय पाइबमी “महिनीने। गो इन कली नु मुर नेल्‍ल आन कली ग्‍येरपाइक्‍ब लोव़ नेंपाइक्‍थ जाक्‍ती।

11 एको ग्‍येरपाइक्‍ब लोव़ दोदेंशो बाक्‍ब देंशा हना, मुलाक्‍दो पिप दाऊद आ सहरम आल का जरमेसाक्‍व। मेको नक जरमेशो आल पाप रे प्रोंइब, प्रभु येसु ख्रीस्‍त बाक्‍ब।

12 आं लोव़ थमा बाक्‍ब, दे दोपा तुइक्‍नीनी देंशा हना, गे मेको नक जरमेशो आल कली वाम गिल्‍शा, शुंगुम इप्‍पाइश्‍शो थित्‍नीनी” देंमाक्‍त।

13 मिनु सरीङ रे परमप्रभु यावे आ स्‍वर्ग ङा गेय पाइब शुश फो फु ग्रूशा, परमप्रभु यावे कली ठेयब सेल्‍शा भजन संग्रह १०३:२०-२१

14 “नेल्‍ल क्‍येङा इर ङा परमप्रभु यावे नेल्‍ल क्‍येङा ठेयब बाक्‍ब। आ दाक्‍शो मुर आन कली थुं नाइश्‍शा बाक्‍चा गेब” दे कुम्‍सो पामे बाक्‍त। लूका १९:३८; गन्‍ती ६:२६; एफिसी २:१४,१७

15 मिनु परमप्रभु यावे आ स्‍वर्ग ङा गेय पाइब सरीङ गे लेश्‍शा लमा बाक्‍त। मिनु गोठलापुकीमी “बेथलेहेम सहर लय। एको परमप्रभुमी तुइक्‍पाइश्‍शो लोव़ कोव़थ लय” देंमुमा बाक्‍त।

16 मिनु दोरशा जाक्‍दीश्‍शा कोव़ङमेनु, मरीयम नु योसेफ थित्‍मे बाक्‍त। मेकेर नक थिशो आल यो शुंगुम इप्‍पाइश्‍शो तामे बाक्‍त।

17 मेको नेल्‍ल तशा, आल आ पर्बम नेंशो लोव़ शुश मुर आन कली तुइक्‍पदमे बाक्‍त।

18 मिनु आन लोव़ नेंब नेल्‍ल छक लाक्‍मा बाक्‍त।

19 तन्‍न मरीयममी गोठला आन लोव़ नेंशा, आ थुंमी वोदा बाक्‍त।

20 गोठलापुकीमी आन तशो नु आन नेंशो आ पर्बम परमप्रभु यावे कली ठेयब सेल्‍ना सेल्‍न लेम्‍मा बाक्‍त।

21 मिनु आल जरमेसे आ ८ नाक्‍ती ख्रोइक्‍तीक चिनु ख्रोदमे बाक्‍त। मिनु आ नें येसु वोदमे बाक्‍त। मारदे हना परमप्रभु यावे आ स्‍वर्ग ङा गेय पाइबमी “मेको आ नें येसु वोइक्‍चा” दे आ कोव़ज कुरचा क्‍येङा ङोंइती मरीयम कली देंशो बाक्‍माक्‍त। लूका १:५९; उत्‍पत्ती १७:१२; लूका १:३१

22 मिनु चोव़खेतीक नाक्‍त जाक्‍मेनु, मोसामी ब्रेक्‍शो लोव़ टिशा, यरूसलेम सहर जाक्‍दीश्‍शा, आल कली परमप्रभु यावे आ खिं लाइश्‍शा “परमप्रभु यावे केन दुम्‍ल” देंशा, परवा आ चाइक्‍ब निक्‍शी चढ़ेम्‍से बाक्‍त। लेवी १२:१-४; गन्‍ती १८:१५

23 मारदे हना परमप्रभुम अरे‍शो लोव़मी “ङोंइती थिशो वोंइश आल परमप्रभु यावे के बाक्‍ब” दे ब्रेक्‍शो बाक्‍ब। प्रस्‍थान १३:२,१५

24 परमप्रभु आ अरेशो लोव़मी आम्‍मा चोव़खेचा कली “परवा आ चाइक्‍ब निक्‍शी चढ़ेचा माल्‍ब” दे ब्रेक्‍शो बाक्‍ब। लेवी १२:६-८

25 यरूसलेममी सिमियोन माइश्‍शो मुर का बाक्‍माक्‍त। मेको ठीक पाइब नु परमप्रभु यावे कली मान पा हिंब बाक्‍माक्‍त। परमप्रभु यावे आ सोक्‍तीम ब्रीशा “परमप्रभु यावेमी इस्राएल ङा मुर आन कली पाप रे प्रोंइब का सोइक्‍ब” दे लां कोव़शा बाक्‍शो बाक्‍माक्‍त। उत्‍पत्ती ४९:१८

26 परमप्रभु यावे आ सोक्‍तीमी मेको कली “इ मबेक्‍थु, प्रभु, पाप रे प्रोंइब ख्रीस्‍त ग्रुम्‍पाइक्‍नन” देंशो बाक्‍माक्‍त।

27 मिनु परमप्रभु यावे आ सोक्‍तीमी मेको कली “मुल परमप्रभु यावे आ खिं लावो” देंतीके लशा, परमप्रभु यावे आ खिं जाक्‍दीम्‍माक्‍त। मिनु मरीयम नु योसेफमी आल कली परमप्रभु यावे आ ब्रेक्‍पाइश्‍शो लोव़मी मार पचा देंशो बाक्‍मे, मेको पचा कली चाक्‍शो तवा बाक्‍त।

28 मिनु सिमियोनमी आल कली लाइश्‍शा, परमप्रभु यावे कली ठेयब सेल्‍शा

29 “परमप्रभु, इन देंशो जाक्‍दीत्‍त। मुल इन वाइल थुं नाइश्‍शा बेक्‍ने चाप्‍‍ब।

30 मारदे हना इन सोइश्‍शो पाप रे प्रोंइब कली आं मिक्‍चीम ताता।

31 मेको कली रागी रागी ङा मुर नेल्‍ल आन पर्बम सोइक्‍ताक्‍नी।

32 अर्को जात ङा मुर आन कली छेङछेङ दुम्‍शा, मेको आन कली रुप्‍तीक थुं गेचा कली सोइक्‍ताक्‍नी। गो इस्राएली आंइ कली थम रिम्‍शो दुम्‍त” देंमाक्‍त। यसैया ४९:६

33 मिनु आल आ आम आफोमी “मार, मिश रिम्‍शो लोव़ पवा” दे छक लाक्‍सा बाक्‍त।

34 मिनु सिमियोनम मेको आस कली आसीक गेशा, मरीयम कली “एको आल इस्राएली आन दातेमी लां कोंइशा मुर आन कली फ्राब। का निक्‍शी खतम दुम्‍नीम, का निक्‍शी रिम्‍शो दुम्‍नीम। मिनु शुश मुरुमी एको कली मदाक्‍नीम। लूका २०:१७-१८; प्रेरित २८:२२; १कोरिन्‍थी १:२३

35 मोपा मुर आन थुंम मिम्‍शो तुंइसीब। मिनु तरवार कामी इ थुं थोक्‍ब” देंमाक्‍त। यूहन्‍ना १९:२५

36 यरूसलेममी आन्‍ना माइश्‍शो परमप्रभु यावे आ लोव़ पाइब खाल्‍पी का बाक्‍माक्‍त। मेको आशेर आ थर ङा फनुएल आ तमी बाक्‍माक्‍त। मेको ग्‍युंबे पशो आ ७ बर्सम आ वोंइश बेक्‍शो बाक्‍माक्‍त।

37 मिनु आ वोंइश बेक्‍म नोले शुश बर्स ब्रोंइशा, ८४ बर्स दुम्‍माक्‍त। मेकोमी परमप्रभु यावे आ खिं मप्रोंइथु, नाक्‍दो नाक्‍ती मेकेर माइजा बाक्‍शा प्रार्थना पा, परमप्रभु यावे कली ठेयब सेल्‍ना सेल्‍न बाक्‍बाक्‍माक्‍त। १तिमोथी ५:५

38 मिनु मरीयम नु योसेफमी आल मेकेर लदसेनु, मेको खाल्‍पी ग्रुम्‍से बाक्‍त। मिनु खाल्‍पीमी आल कली तशा, परमप्रभु यावे कली ठेयब सेला बाक्‍त। मिनु “परमप्रभु यावेमी पाप रे प्रोंइब सोइक्‍ब” दे आस पा बाक्‍ब यरूसलेम ङा मुर आन कली मेको आल आ पर्बम लोव़ पा नेंपाइक्‍मी बाक्‍त।

39 मिनु परमप्रभु आ अरेशो पचा माल्‍शो गेय नेल्‍ल थुम्‍शा, आल कली लाइश्‍शा, गालील रागी ङा नासरथ सहरम लेस्‍सा बाक्‍त।

40 मिनु नोले आल कोल्‍शा, जोक्‍ब तुइक्‍ब दुम्‍माक्‍त। मारदे हना परमप्रभु यावेमी दाक्‍शा मेको कली आसीक गेवा बाक्‍त।

41 येसु आ आम आफ बर्स बर्समी पास्‍सा चाड मानेथ यरूसलेम लाइबाक्‍सा बाक्‍त। ब्‍यवस्‍था १६:१-८

42 मिनु येसु १२ बर्स जाक्‍दीम नोले पास्‍सा मानेथ लमानु, मार दुम्‍माक्‍त देंशा हना,

43 पास्‍सा थुम्‍शा खिं लेम्‍मानु, आम आफोम मतुइक्‍थु, येसु मेकेरन लीमाक्‍त। तन्‍न आ आम आफोमी मतुंइ‍से बाक्‍त। प्रस्‍थान १२:१८

44 मेको नाक्‍त का ङा लां गाक्‍सानु, येसु आ वारच नु लत, दे मिम्‍तसे बाक्‍त। मिनु वारच नु बाक्‍शो मतथु, येसु कली माल्‍चा गोम्‍से बाक्‍त। नाक्‍त का ङा लां ३०-४० किलो मिटर बाक्‍ब।

45 मिनु माल्‍से माल्‍से तेइ मथित्‍से बाक्‍त। मिनु लेश्‍शा माल्‍ना माल्‍न यरूसलेम जाक्‍शा यो मथित्‍से बाक्‍त।

46 नाक्‍दो नाक्‍ती सां सम्‍म माल्‍ना माल्‍न गाक्‍सा नोले परमप्रभु यावे आ खिंम थित्‍से बाक्‍त। मेको परमप्रभु यावे आ लोव़ शेंबपुकी नु बाक्‍शा, आन लोव़ नेंशा, मेको आन कली लोव़ हिल्‍लो पना पन बाक्‍शो ताम्‍से बाक्‍त।

47 मेको आ लोव़ नेंब नेल्‍लेमी “शुश जोक्‍ब तुइक्‍ब आल बाक्‍माक्‍त” दे छक लाक्‍मा बाक्‍त।

48 आ आम आफोम मेको कली तशा, थाम्‍पा छक लाक्‍सा बाक्‍त। मिनु आ ममामी “आं तौ, गे मारदे आंस कली मोदेंशो श्‍येत गेस्‍की? इ आफ नु गो इ कली ‘ते लाक्‍गा?’ दे शुश हिंशा माल्‍तास्‍कु” देंमाक्‍त।

49 मिनु येसुमी “मारदे माल्‍यीसी? गो आं आफ आ खिंमी बाक्‍चा माल्‍नुङ, दे मतुइक्‍तीसी?” देंमाक्‍त। यूहन्‍ना २:१६

50 तन्‍न मेको आ लोव़ मरुप्‍से बाक्‍त।

51 मिनु येसु आ आम आफ नु लेश्‍शा, नासरथ आ खिं लमाक्‍त। में ङा मेरे आ आम आफ आस लोव़ टिशा बाक्‍माक्‍त। आ ममामी मेको मोदेंशो दुम्‍शो नेल्‍ल शुश मिम्‍शा थुंम वोदा बाक्‍त।

52 येसु कोल्‍शा बारशा, शुश जोक्‍ब तुइक्‍ब दुम्‍माक्‍त। परमप्रभु यावेमी मेको कली दाक्‍ता बाक्‍त। मुरपुकीमी यो दाक्‍तमे बाक्‍त। १सामुएल २:२६