Luke 13 in Sunwar
1 मोपा शेंदीमीनु, आ लोव़ नेंब का निक्शीमी “साइ गालील रागी ङा मुरपुकीमी मारेइ मारेइ क्योरशा जारदमेनु, पिलातसमी सिपाइ सोइश्शा, मेको जारब आन कली क्योरपाइश्शा, मेको आन जारशो हुश नु ब्वाइक्ताक्व” देंमा बाक्त।
2 मिनु येसुमी मेको आन कली “मोपा साइक्चा पुंइसीब आन कली रागी ङा मुर क्येङा मरिम्शो बाक्मा बाक्त, दे मिम्नीनी? ममाइ, मेको इन खोदेंशोन नम। यूहन्ना ९:२
3 इन थुं परमप्रभु यावे गे मलेत्ताक्नी हना, गे यो मोदेंशो पा बेक्नीनी।
4 सिलोआमी नेल्ल क्येङा लाइश्शो खिं ब्रेम्मेनु, १८ जना चिप्शा बेक्मा बाक्त। मोपा बेक्शोपुकी यरूसलेम सहरम बाक्ब नेल्ल आन क्येङा मरिम्शो बाक्मा बाक्त, दे मिम्नीनी? ममाइ, मेको इन खोदेंशोन नम।
5 इन थुं परमप्रभु यावे गे मलेत्ताक्नी हना, गे यो मोदेंशो पा बेक्नीनी” दे माइक्मी बाक्त।
6 मिनु कथा सेल्शा “मुर कामी पोव़शी रवा का ख्रुमा बाक्त। मिनु फल सित्ची ना, सिदा कों, दे कोव़थ लमाक्त। मिनु कोव़ङानु दा, काइ मसिश्शो बाक्माक्त। मत्ती २१:१९
7 मोपा मसिश्शो तशा, आ गेय पाइब कली ‘एको रवा फल मसिप्ब। गो बर्स बर्सम खेयप सां कोव़थ जाक्ङानु, काइ मसिश्शो बाक्त। एको रवामी रू ला नेक्तु। मोपतीके एको कली तिम्शा ताइक्तो’ दे मदा बाक्त।
8 आ गेय पाइबमी चहिं ‘आं होव़प, मुल बाक्ल। बर्स का सम्म आ पुं मेर दोशा, मोल कुर पाइनुङ। २पत्रुस ३:९,१५
9 मिनु सित्त हना, बाक्ल। मसित्त हना, तिम्शा ताइक्चा’ देंमाक्त” दे शेंदीमी बाक्त। लूका ३:९
10 काबु नाइक्तीक नाक्ती ग्रुम्तीक खिंमी मुर आन कली शेंदीमी बाक्त। लूका ६:६-११
11 मेकेर वोलम तशा, १८ बर्स कूंजी दुम्शो मीश का मुर बाक्माक्त। मेको गुर ब्वेशो बाक्माक्त। रिम्शो पा राप्ने मचाप्बाक्माक्त।
12 मिनु येसुमी मेको मीश मुर कली तशा “एक पिवो” दे ब्रेत्ता बाक्त। मिनु पिमेनु “आं तमी, कूंजी दुम्शो रे प्रोंइतन” देंशा आ गुइ मेको तारी वोदा बाक्त।
13 मोपा वोदानु, साशा राम्माक्त। मिनु ग्येरशा परमप्रभु यावे कली ठेयब सेला बाक्त।
14 मिनु ग्रुम्तीक खिं ङा ठेयब मुरुमी नाइक्तीक नाक्ती सापाइश्शो तशा, आ थुं मनुमाक्त। मिनु आ थुं मनुथु, मेकेर बाक्ब आन कली “साता कामी ६ नाक्त गेय पचा माल्ब। काबु नाइक्चा माल्ब। मिनु नाइक्तीक नाक्ती गेय पचा मदुम्ब। मोपतीके इन रोइ सापाइक्चा कली नाइक्तीक नाक्ती गेनायो मजाक्कीन। अरु नाक्त जाक्कीन” दे हुइक्तीमी बाक्त। प्रस्थान २०:९-१०
15 मिनु प्रभुमी हुइक्ब मुर कली “ए कपटी, गे नाइक्तीक नाक्ती इन ब्यफ नु गधा आन कली प्रोंइशा, ब्वाक्कु मतूपाइक्नीनी ङा? लूका १४:५
16 एको मीश मुर अब्राहाम आ तमी बाक्ब। सैतानमी एको कली १८ बर्स सम्म रोइम गुरपाइश्शा वोइश्शो बाक्त। मिनु एको कली नाइक्तीक नाक्ती मप्रोंइचा? मसापाइक्चा?” दे हुइक्ता बाक्त। लूका १९:९
17 मोदेंशो लोव़ पवानु, आ कली मरिम्शो देंब मुर मुने दोक्माक्त। मेकेर बाक्ब मुर नेल्ल येसु आ पशो रिम्शो गेय तशा, थाम्पा ग्येरसमा बाक्त।
18 मिनु मेकोमी “परमप्रभु यावे आ राज्य दोदेंशो बाक्ब देंशा हना,
19 मुर कामी आ रूमी तोरी शोक्गा बाक्त। मिनु वाशा ठेयब रवा दुम्माक्त। मेको रवाम चिक्बपुकीमी ग्योव़ सेल्मे बाक्त।
20 मिनु परमप्रभु यावे आ राज्य दोदेंशो बाक्ब देंशा हना,
21 मीश मुर कामी सेआह सां फसीम बोरपाइक्ब ओख्ती सुप्ताक्व। मिनु मेको फस नेल्ल बोरत” दे शेंदीमी बाक्त। सेआह का १३ लिटर गारचा ङा पुक्तीके बाक्ब। अरु ब्रेक्तीकेमी चहिं ७ लिटर पुक्तीके बाक्ब, दे ब्रेक्शो बाक्त। सेआह सां ३९ लिटर कि २१ लिटर पुक्तीके बाक्ब।
22 येसु गाउं सहर ते ते जाक्दीम्मे, मेक मेक शेंना शेंन यरूसलेम गे लमाक्त।
23 मिनु मुर कामी “शेंब हजुर, परमप्रभु यावे आ राज्य ओव़चा ताइबपुकी का निक्शी ला बाक्नीमी?” दे हिल्लो पवा बाक्त
24 मिनु येसुमी “आइक्च लाप्चो रे ओव़चा मालो। मेकेर रे शुश मुर ओव़चा दाक्नीम, तन्न ओव़ने मचाप्नीम। मत्ती ७:१३-१४
25 मारदे हना खिं ङा मुरुमी लाप्चो चोक्ब। मिनु जाक्शोपुकी लाङगाम राप्शा ‘ओव़चा गेकी, प्रभु’ दे ब्रेत्नीनी। तन्न खिं ङा मुरुमी ‘इन कली मतुइक्नन्नी, ते रे जाक्शो ननी?’ देंब। मत्ती २५:११-१२
26 मिनु गेपुकीमी ‘हजुर, गे नु काथा खमे जाइब नकी। आंइ गाउं सहर सहरमी शेंदीनीनु, गो इन लोव़ नेंतक’ देंनीनी। मत्ती ७:२२-२३
27 तन्न मेकोमी इन कली ओव़चा मगेथु ‘ते रे जाक्नी मतुइक्नुङ। मरिम्शो पाइबपुकी आं रे पा ङोन लने’ दे खेरब।
28 मोदेंशो पा खेरचा पुंइसीशा, ङाक्शा इन ख्रुइ शेप्नीनी। मारदे हना इं किकी पिपी अब्राहाम, इसहाक, याकूब नु परमप्रभु यावे आ लोव़ पाइब नेल्ल आन कली परमप्रभु यावे आ राज्यम ओव़शा, बाक्शो ताइनीनी। गे चहिं खेरचा पुंइसीनीनी। मत्ती ८:११-१२
29 मुरपुकी पूर्ब पच्छिम उत्तर दक्खिन रे जाक्शा, परमप्रभु यावे आ राज्यम ओव़शा भोज जशा बाक्शो ताइनीनी। लूका १४:१५
30 नेल्ल आन क्येङा नोले दुम्शोपुकी ङोंइती दुम्नीम। मिनु नेल्ल आन क्येङा ङोंइती दुम्शोपुकी नोले दुम्नीम” दे शेंदीमी बाक्त।
31 येसुमी शेंना शेंन बाक्मेनु, फरिसीपुकी जाक्शा, येसु कली “पिप हेरोदम इन कली ग्याइश्शा साइक्चा माल्शो बाक्ब। मोपतीके एक रे रीब पा लने” देंथ जाक्मा बाक्त।
32 मिनु येसुमी “लशा, मेको फ्याउरे कली ‘मुलाक्ती नु दीसा वोल आन कली खेरनुङमी। रोइ पशो मुर आन कली सापाइक्नुङमी। मिनु नित्थ नाक्ती आं गेय थुम्नुङ।
33 मुलाक्ती, दीसा नु नित्थ नाक्ती यरूसलेम मेर गाक्नुङ। मारदे हना परमप्रभु यावे आ लोव़ पाइबपुकी साइ रेन यरूसलेम सहरम ला खतम दुम्नीम’ देनीन” दे सोइक्तीमी बाक्त।
34 मिनु यरूसलेम कली “ए यरूसलेम, यरूसलेम, परमप्रभु यावे आ लोव़ पाइब आन कली साइक्तीवी। इ कली शेंथ सोइश्शो आन कली फुल्लु क्रोम्ताक्वी। पोव़थीमी आ चितोली आन कली पुप्शो खोदेंशो पा, गो शुश खेयप इ आल आन कली पुप्चा माल्ती, गे चहिं मबिस्से। मत्ती २३:३७-३९; लूका १९:४१-४४
35 मुल इ खिं ब्रेश्शा मारेइ मलीब। ‘प्रभु आ नेंमी जाक्ब ठेयब बाक्ब’ मदेंने सम्म गे आं कली मताइनेवे” देंमाक्त। येरमीया २२:५, भजन संग्रह ६९:२७; भजन संग्रह ११८:२६