Judges 7 in Sunwar

1 गिदोन कली येरूब-बाल यो देंबाक्‍तेक्‍म। मिनु गिदोन नु आ मुर नेल्‍ले सुनी कना बोक्‍शा ङा मिन हारोद सहर ङा ब्‍वाक्‍कु बुक्‍तीके आ नेक्‍था ताम्‍बु कीङमे बाक्‍त। मिदयान ङा मुरपुकीमी चहिं मेको आन उत्तर गे ङा मोरेह डांडा आ नेक्‍था ङा दिंममी ताम्‍बु कीङमे बाक्‍त। न्‍यायाधीस ६:३२

2 मिनु परमप्रभु यावेमी गिदोन कली “गे नु बाक्‍शो मुरपुकी माल्‍शो क्‍येङा शुश बाक्‍नीम। गो मिदयान ङा मुर आन कली मोदेंशो शुश मुर आन गुइमी गेता हना, इस्राएलीपुकीमी आं कली प्रेंशा ‘गो आंमा आंइ सक्तिमी मिदयान ङा मुर आन कली ग्राशो नकी’ दे ठेयब लेत्‍नीम।

3 मोपतीके मुल गे मेको नेल्‍ल आन कली ‘सुइ मुर हिंशा ख्रिंख्रि पाइब बाक्‍तेक्‍म हना, मेको मुर आन खिं लेत्‍चा माल्‍नीम’ दे नेंपतो” देंमाक्‍त। मिनु २२ हजार आन खिं लेश्‍शा, १० हजार इस्राएली ला लीमा बाक्‍त। ब्‍यवस्‍था २०:८

4 मिनु परमप्रभु यावेमी गिदोन कली “मुल यो शुश मुर बाक्‍नीम। मोपतीके मेको आन कली उइ खोलामी लतो। मेकेर गो मुर योव़शा गेनुङ। गो इ कली ‘एको मुर लाइब’ देंती हना, ‘मेको मुर गे नु लचा माल्‍ब। एको मुर गे नु मलाइब’ देंती हना, मेको गे नु लचा मताइब” देंमाक्‍त।

5 मिनु गिदोनमी मुर आन कली उइ खोलामी लाइक्‍मी बाक्‍त। मिनु परमप्रभु यावेमी गिदोन कली “सु सुमी बाप्‍शा, खोला ङा ब्‍वाक्‍कु कुचुममी तुक्‍शो खोदेंशो पा लेंमी तुक्‍शा तूनीमी, मेको आन कली एर वोतो। सु सुम चहिं खोला ङा ब्‍वाक्‍कु पोक्‍च थेक्‍शा गुइम तूनीमी, मेको आन कली ओंथ वोतो” देंमाक्‍त।

6 मिनु कुचुम खोदेंशो पा ब्‍वाक्‍कु तुक्‍शा तूबपुकी सहे सां दुम्‍मा बाक्‍त। मिनु अरु नेल्‍लेमी पोक्‍च थेक्‍शा आन गुइमी तूङमे बाक्‍त।

7 मिनु परमप्रभु यावेमी गिदोन कली “एको सहे सां ब्‍वाक्‍कु तुक्‍शा तूब मुर रे पा मिदयानी आन गुइ रे प्रोंइनुङ। लीशो आन कली आंम आंम खिंमी लचा गेमी” देंमाक्‍त। १सामुएल १४:६

8 मिनु मुरपुकीमी मेको आन बुत लाम्‍ज नु तुराही वोइश्‍शा, मेको आन खिं गाक्‍मा बाक्‍त। गिदोनमी मेको सहे सां कली वोइक्‍मी बाक्‍त। मिदयानी आन बाक्‍तीक चहिं मेको आन क्‍येङा उइ दिंममी बाक्‍माक्‍त।

9 मिनु मेको नाक्‍दो परमप्रभु यावेमी गिदोन कली “बोक्‍को, मिदयानी आन बाक्‍तीके ब्रुपो। मारदे हना गो मेको आन कली इ गुइमी गेता।

10 तन्‍न हिंनेवे हना, इ गेय पाइब पुराह कली लाइश्‍शा ब्रुपो।

11 मिनु लशा, मेको आन लोव़ पशो नेनो। मेको आन लोव़ नेंनी नोले, मेको आन कली लडाइ तोचा महिंनेवे” देंमाक्‍त। मिनु मेको आ गेय पाइब पुराह नु मिदयानी आन ङोंइती ङा ताम्‍बु आ नेक्‍था ल‍माक्‍त। मेकेर लडाइ पाइबपुकी बाक्‍शो बाक्‍मा बाक्‍त।

12 मेको मिदयानी, अमालेकी नु पूर्ब ङा थर ङा मुर नेल्‍ल शुश सल्‍हा माले खोदेंशो पा दिंममी बाक्‍शो बाक्‍मा बाक्‍त। मेको आन दलओंठ ठेयब समुन्‍द्र ङा बाल्‍वा खोदेंशो हिक्‍ने मचाप्‍चा ङा पा शुश बाक्‍मा बाक्‍त।

13 मिनु गिदोन मेको आन ताम्‍बु आ नेक्‍था जाक्‍दीम्‍मेनु, मेकेर ङा मुर कामी आ वारच कली आ ङोमु शोव़ङा बाक्‍त। मेकोमी “गो आ ङोमुमी क्‍योव़ज शोब्‍ले का गुलुल पा लोक्‍सीशा, मिदयानी आन बाक्‍तीकेमी जाक्‍शा, मेको आन ताम्‍बु चिप्‍शो ताता” देंमाक्‍त।

14 मिनु आ वारचमी “थमा पा, मेको इस्राएली योआश आ तौ गिदोन आ तरवार बाक्‍ब। परमप्रभुमी मिदयान नु मुर नेल्‍ले आन कली मेको आ गुइमी गेप्‍तु” देंमाक्‍त।

15 मिनु गिदोनमी ङोमु नु मेको आ अर्थ नेंशा ङा मिन परमप्रभु यावे कली ठेयब सेला बाक्‍त। मिनु इस्राएली आन बाक्‍तीकेम लेश्‍शा “बोक्‍कीन, परमप्रभु यावेमी मिदयानी नेल्‍ल आन कली इन गुइमी गेप्‍तु” देंमाक्‍त।

16 मिनु मेको सहे सां मुर आन कली, हुल सांमी योक्‍गा बाक्‍त। मिनु नेल्‍ल आन कली का का पा तुराही नु आगा रांको वोइश्‍शो शेत्‍थ गर का का गेमी बाक्‍त।

17 मिनु “आं कली कोव़ङीन। आं खोदेंशो पने। गो मेको आन ताम्‍बु आ नेक्‍था जाक्‍दीशा, मार मार पाइनुङा, गे यो मोदेंशो पने।

18 मिनु गो नु बाक्‍ब हुलमी गेना तुराही ताप्‍नीमी, मेना गे यो आन बाक्‍तीक एर ओंथ इन तुराही ताप्‍शा ‘परमप्रभु यावे कली नु गिदोन कली’ दे ठेयब सेंदा पा ग्रीङीन” देंमाक्‍त।

19 गिदोन नु मेको नु बाक्‍ब सहे का मुरपुकी क्‍येर नाक्‍दोमी मिदयान ङा मुर आन बाक्‍तीक आ नेक्‍था जाक्‍दीम्‍मा बाक्‍त। मेको आन खाल पाइब नक फांइसीशो बाक्‍मा बाक्‍त। मिनु गिदोन आ मुरपुकीमी तुराही ताप्‍शा, आन गुइमी कुरशो शेत्‍थ गर प्रोल्‍मे बाक्‍त।

20 मोपा मेको हुल सांमीन तुराही ताप्‍शा, आन कुरशो गर प्रोल्‍मे बाक्‍त। आन पेरा गुइमी रांको नु ग्‍युरा गुइमी तुराही कुरशा “परमप्रभु यावे कली तरवार का नु गिदोन कली तरवार का” दे ग्रीमा बाक्‍त।

21 मिनु गिदोन आ मुर नेल्‍ल मेको आन बाक्‍तीक एर ओंथ राप्‍शा बाक्‍मा बाक्‍त। मिदयान ङा लडाइ पाइबपुकी चहिं नेल्‍ल वाइ ब्रेश्‍शा प्रोक्‍मा बाक्‍त।

22 मिनु मेको सहे सां मुरुमी तुराही ताप्‍मेनु, परमप्रभु यावेमी मेको मिदयान ङा मुर आन दातेमी साइक्‍मुपाइक्‍मी बाक्‍त। मिनु मिदयान ङा लडाइ पाइबपुकी सेरेराह गे बेथ-शित्‍ता सम्‍म प्रोक्‍मा बाक्‍त। मेको आबेल-मेहोलाह आ सांद तब्‍बाथ सहर आ नेक्‍था सम्‍म प्रोक्‍मा बाक्‍त। भजन संग्रह ८३:१०; यसैया ९:३; यसैया १०:२६

23 मिनु गिदोनमी नाप्‍ताली आ थर, आशेर आ थर नु मनस्‍से आ थर ङा मुर आन कली ब्रेश्‍शा, मिदयान ङा मुर आन कली खेदा पपदा बाक्‍त।

24 मिनु गिदोनमी एफ्राइम ङा पहाडी रागीम बाक्‍ब मुर आन कली लोव़ सोइक्‍ता बाक्‍त। मार लोव़ सोइक्‍ता बाक्‍त, देंशा हना “उइ ब्रुप्‍शा, मिदयानी आन कली सतीन। बेथ-बाराह सम्‍म यर्दन ङा लांमी प्रोक्‍चा मगेन” दे लोव़ सोइक्‍ता बाक्‍त। मिनु मेको ब्रेश्‍शो एफ्राइम आ थर ङा मुरपुकीमी बेथ-बरा ङा ब्‍वाक्‍कु रे यर्दन ङा शोक्‍तीक सम्‍म ङा लां तेक्‍गमे बाक्‍त।

25 मेकोपुकीमी मेको मिदयानी आन कली खेदा पस ङा पस पा आन कप्‍तान निक्‍शी ओरेब नु जेयब कली ग्‍याइक्‍तमे बाक्‍त। मिनु मेकोपुकीमी ओरेब कली ओरेब आ फुल्‍लु तारी नु जेयब कली आ अङगुर ख्राक्‍तीक कोलमी सदमे बाक्‍त। मिनु नोले मेकोपुकीमी ओरेब नु जेयब आस पिया क्‍योरशा, यर्दन आइक्‍ची हांम गिदोन आ बाक्‍तीकेम चाक्‍गमे बाक्‍त।