Judges 6 in Sunwar
1 मिनु इस्राएलीपुकीमी लेंशा परमप्रभु यावे आ ङोंइती मार मरिम्शो बाक्मे, मेको पामे बाक्त। मोपतीके परमप्रभु यावेमी मेको आन कली ७ बर्स कली मिदयान ङा मुर आन गुइमी गेवा बाक्त।
2 मिनु मिदयान ङा मुरपुकीमी इस्राएली आन कली शुश दिप्शा, सक्ति पाइश्शो दुम्मा बाक्त। मोपतीके इस्राएलीपुकी पहाड ङा पुक्खी, रोंगु इर लशा, आन ख्रुइश्शा बाक्तीक सेल्मे बाक्त।
3 इस्राएलीपुकीमी वांचेर शोक्गमे चोटीन मिदयान ङा मुरपुकी, अमालेक ङा मुरपुकी नु पूर्ब ङा मुरपुकी जाक्शा, इस्राएलीपुकी नु लडाइ पाइबाक्मा बाक्त। ब्यवस्था २८:३३
4 मेको आन ताम्बु कीशा बाक्शा, गाजा सम्म ङा बाली नाली कली खतम पोक्गमे बाक्त। मेकोपुकीमी इस्राएल ङा मुर आन कली जचा थोव़क काइ महेंदमे बाक्त। आन भेडा, ब्यफ नु गधा नेल्ल रोइश्शा लदमे बाक्त।
5 मेकोपुकी आंम के बी ब्यफ नु ताम्बुपुकी चाक्शा, सल्हा माले खोदेंशो पा जाक्मा बाक्त। मुर नु मेको आन दलओंठ हिक्ने मचाप्चा ङा पा शुश बाक्तीके, मोपा मेको रागी कली खतम पोक्गमे बाक्त।
6 मिनु मिदयान ङा मुरपुकीमी इस्राएली आन कली शुश प्रुङग सेल्मे बाक्त। मिनु इस्राएलीपुकीमी “वारच पाइय्यीकी” दे परमप्रभु यावे कली थोव़मे बाक्त।
7 मोपा इस्राएलीपुकीमी परमप्रभु यावे कली मिदयान ङा मुर आन पर्बम थोव़मे नोले
8 परमप्रभु यावेमी मेको आन कली आ लोव़ पाइब का सोइक्ता बाक्त। मिनु मेकोमी “परमप्रभु यावे, इस्राएली आन परमप्रभुम इन कली ‘गो इन कली इजीप्त रागी वाइलीम वाइल दुम्तीक रे प्रोंइशा ग्रुंइशा पित्ता।
9 गो इन कली इजीप्त ङा मुर आन गुइ रे नु इन कली श्येत गेब मुर आन गुइ रे प्रोंइशा चाक्ता। मेको इन कली दिप्ब नेल्ल आन कली इन ङोंइती रे खेरताक्मी। मिनु मेको आन रागी इन कली गेता।
10 मिनु गो इन कली गो परमप्रभु यावे, इन परमप्रभु नङ। गेपुकी एमोरी आन रागीमी बाक्तीनी हना यो, मेको आन देवी देवता आन कली ठेयब मसेलीन’। तन्न गे आं लोव़ मनेनी” दे मेको परमप्रभु यावे आ लोव़ पाइबमी माइक्मी बाक्त।
11 मिनु परमप्रभु यावे आ स्वर्ग ङा गेय पाइब जाक्शा, ओफ्रा सहर आ नेक्था बाक्शो ठेयब रवा आ पुंम निस्से बाक्त। मेको रू अबीएजेर आ मुर योआश आ रू बाक्माक्त। योआश आ तौ गिदोन चहिं मिदयान ङा मुरपुकी रे ख्रुइक्चा कली अङगुर ख्राक्तीकेमी चेरब तुम्ना तुम्न बाक्मा बाक्त। यहोसु १७:२
12 मिनु परमप्रभु यावे आ स्वर्ग ङा गेय पाइब मेको आ ङोंइती ग्रूशा मेको कली “गे महिंथु लडाइ पाइब मुर, परमप्रभु यावे गे नु बाक्ब” देंमाक्त।
13 मिनु गिदोनमी मेको कली “हजुर, परमप्रभु यावे गोपुकी नु बाक्त हना, आंइ कली मारदे ओदेंशो दुम्मे? मिनु मेको आ छक लाक्चा ङा गेय नेल्ले ते बाक्नीमी? आंइ किकी पिपीपुकीमी ‘परमप्रभु यावेमी आंइ कली इजीप्त रागी रे ग्रुंइशा पिश्शो’ दे मदेंमा ङा? तन्न मुल परमप्रभु यावेमी आंइ कली प्रोंइतु। मिनु आंइ कली मिदयान ङा मुर आन गुइमी गेप्तु” देंमाक्त।
14 मिनु परमप्रभु यावे मेको गे लेश्शा “गे महिंब नु बोल्यो बाक्नेवे। मोपतीके लावो। इस्राएली आन कली मिदयान ङा मुर आन गुइ रे प्रोनो। गो इ कली सोइक्नुङ” देंमाक्त। न्यायाधीस ६:३२; १सामुएल १२:११; हिब्रू ११:३२
15 मिनु गिदोनमी “हजुर, गो दोपा इस्राएली आन कली प्रोंइने चाप्नुङा? आं खिं मनस्से आ थरमी नेल्ल क्येङा आइक्च बाक्ब। मिनु गो आं आफ आ खिंमी यो नेल्ल क्येङा आइक्च मुर बाक्नुङ” देंमाक्त।
16 मिनु परमप्रभु यावेमी मेको कली “गो गे नु बाक्नुङ। मिनु गे मिदयानी नेल्ल आन कली साइक्नेवे” देंमाक्त। प्रस्थान ३:१२
17 मिनु मेकोमी “गो इन ङोंइती शिशी ताता हना, नु गे थमा पा गो नु लोव़ पाइब बाक्तीनी हना, आं कली चिन्ड का कोंइदीनी।
18 गो इन कली जचा मख्रेत्तु सम्म, गे एक रे मलन” देंमाक्त। मिनु मेकोमी “गे मजाक्ङे सम्म गो एकेन बाक्नुङ” देंमाक्त। न्यायाधीस १३:१५-१६
19 मिनु गिदोन खिं ओव़शा, क्यारश पाठा का ठीक पवा बाक्त। एफाह का फस के बोरब ओख्ती मसुप्शो शोब्ले चोवा बाक्त। मिनु श्ये डालोम कुर पा आ शेक्क चहिं बोस काम लुक्शा, ठेयब रवा आ पुंमी लाइश्शा, मेको कली ख्रेत्ता बाक्त। एफाह का २२ लिटर पुक्तीक बाक्ब। एफाह का ५ पाथी खोदेंशो बाक्ब।लेवी ४:२८
20 मिनु परमप्रभु आ स्वर्ग ङा गेय पाइबमी “मेको श्ये नु बोरब ओख्ती मसुप्शो शोब्ले एको फुल्लु तारी वोतो। आ शेक्क चहिं आ तार मोतो” देंमाक्त। मिनु मोदेंशोन पवा बाक्त।
21 मिनु नोले परमप्रभु यावे आ स्वर्ग ङा गेय पाइबमी मेको श्ये नु शोब्ले कली आ गुइम बाक्शो कोक्केमी थिवा बाक्त। मिनु मेको फुल्लु रे पा मी ग्रूशा, मेको श्ये नु बोरब ओख्ती मसुप्शो शोब्ले नेल्ल नेक्गा बाक्त। मिनु परमप्रभु यावे आ स्वर्ग ङा गेय पाइब यो लमाक्त। लेवी ९:१४
22 मिनु गिदोनमी “थमा पा परमप्रभु यावे आ स्वर्ग ङा गेय पाइब बाक्माक्त” दे तुइक्ता बाक्त। मिनु “परमप्रभु, परमप्रभु यावे, आं कली वारच पाइय्यीनी। मुलाक्त परमप्रभु यावे आ स्वर्ग ङा गेय पाइब कली आं नेक्थान ताता” देंमाक्त। न्यायाधीस १३:२२; प्रस्थान ३३:२०
23 मिनु परमप्रभु यावेमी “इ थुं नाइक्तो। महिनो। मारदे हना मबेक्नेवे” देंमाक्त।
24 मिनु गिदोनमी परमप्रभु यावे कली चढ़ेतीक का सेला बाक्त। मिनु आ नें “परमप्रभु यावे थुं नाइक्चा गेब बाक्ब” दे नें वोदा बाक्त। मेको चढ़ेतीक मुलाक्त सम्म अबीएजेर आ मुर आन ओफ्रा सहरम बाक्ब।
25 मेको नाक्दो परमप्रभु यावेमी गिदोन कली “इ आफ आ गोठ रे ७ बर्स दुम्शो ब्यफ चाक्को। इ आफ आ बाल देवता नु आ नेक्था बाक्शो अशेराह देवी आ शी के थाम प्रेश्शा गेवो” देंमाक्त। २राजा ११:१८; २राजा २३:१२-१५
26 मिनु “मेकेर परमप्रभु यावे, इ परमप्रभु कली आं देंशो खोदेंशो पा चढ़ेतीक का सेलो। मिनु नोले आं कली मेको ब्यफ कली इ प्रेश्शो अशेराह देवी आ शी के खोल्शो थाम तारी चोशा चढ़ेतीक का चढ़ेवो” देंमाक्त।
27 मिनु गिदोनमी आंम के १० जना गेय पाइब कली लाइश्शा, परमप्रभु यावे आ देंशो खोदेंशो पवा बाक्त। मिनु नाक्त मेको गेय पचा कली आं आफ आ खिं ङा मुर नु मेको सहर ङा मुर आन कली तशा शुश हिंमाक्त। मोपतीके मेकोमी गेय नेल्ले नाक्दोमी पवा बाक्त।
28 मिनु मेको सहर ङा मुरपुकी सुनी कना बोक्शा, बाल देवता आ चढ़ेतीके प्रेश्शो, मेको आ नेक्था बाक्शो अशेराह देवी आ मूर्ति यो प्रेश्शो नु गिदोनमी सेल्शो चढ़ेतीकेम नोले ङा ब्यफ चढ़ेशो तामे बाक्त।
29 मिनु मेकोपुकीमी “एको सुम पवा, माइ?” दे हिल्लो पमुमा बाक्त। शुश हिल्लो पामे नोले योआश आ तौ गिदोनमी पाप्तु, दे तुइक्त्मे बाक्त।
30 मिनु सहर ङा मुरपुकीमी योआश कली “इ तौ कली लाङगा ग्रुंइदो। मेको बेक्चा माल्ब। मेकोमी बाल देवता आ चढ़ेतीक प्रेदा बाक्त। मिनु आ नेक्था बाक्शो अशेराह देवी आ मूर्ति पाइश्शो थाम यो खोला बाक्त। मोपतीके मेको कली साइक्चा माल्नीक” देंमा बाक्त।
31 मिनु योआशमी मेको आ नेक्था बाक्शो ग्रीब मुर नेल्ल आन कली “गेपुकी बाल देवता आ पर्बम ग्रीशो ननी? बाल देवता कली वारच पचा दाक्नीनी? सुम मेको कली वारच पाइबा, मेको दीसा सुनी सम्म साइक्चा पुंइसीब। आ चढ़ेतीक प्रेत्चा पुंइसीशो बाल देवता थमा पा देवता बाक्त हना, मेकोमी आंमान आ सक्ति कोंइदल” देंमाक्त। १रजा १८:२१-३९
32 मेको नाक्त रे मेकोपुकीमी गिदोन आ नें येरूब-बाल, दे वोदमे बाक्त। मेको आ अर्थ “बाल देवता आंमान गिदोन कली आ सक्ति कोंइदल। मारदे हना गिदोनमी आ चढ़ेतीक प्रेश्शो बाक्ब” देंमा बाक्त। न्यायाधीस ७:१
33 मिनु मिदयानी, अमालेकी नु पूर्ब ङा मुरपुकी खुम्सीशा, हुल का दुम्मा बाक्त। मेकोपुकी यर्दन खोला शोक्शा, येज्रेल आ दिंमम ताम्बु कीङमे बाक्त।
34 मिनु परमप्रभु यावे आ सोक्तीम गिदोन कली सुमा बाक्त। मिनु तुराही ताप्शा, अबीएजेर आ मुर नेल्ल आन कली “आं नोले खोतीन” दे ब्रेत्ता बाक्त। न्यायाधीस ३:१०; न्यायाधीस ११:२९; न्यायाधीस १३:२५
35 मिनु मनस्से आ थर आन बाक्तीकेमी लोव़ कुरब मुर सोइक्ता बाक्त। मिनु मेको आन कली “आं नोले खोतीन” दे ब्रेत्ता बाक्त। मिनु मोपा आशेर, जबूलून नु नाप्ताली आन बाक्तीकेम यो लोव़ कुरब मुर सोइक्ता बाक्त। मिनु मेको नेल्ल गिदोन कली ग्रुम्थ जाक्मा बाक्त।
36 मिनु गिदोनमी परमप्रभु कली “गे देंनी बुदी आं कली इस्राएली आन कली प्रोंइब सेल्तीनी हना,
37 गो भेडा आ ऊन कली खलामी वोइक्नुङ। मेको खला ङा ऊन कली ला सीतमी जिश्शो नु एर ओंथ ङा खप चहिं मजिश्शो बाक्त हना, इन देंशो लोव़, गे इस्राएली आन कली प्रोंइचा, दे आं कली ब्रेत्तीनी, देंशो लोव़ थमा बाक्ब, दे तुइक्नुङ” देंमाक्त।
38 मिनु मेको आ देंशो खोदेंशोन दुम्माक्त। मेको आ सुनी बोक्शा मेको ऊन रे चिरशा, बोस का ब्वाक्कु ग्रुंइदा बाक्त। एर ओंथ ङा खप चहिं मजिश्शो बाक्माक्त।
39 मिनु लेंशा गिदोनमी परमप्रभु कली “गो नु मगाइक्तीन। मिनु आं कली चिनु लोव़ का देंचा गेन। गो इन कली लेंशा पुंइनुङ। आं कली खेयप का मेको ऊन सोव़शो नु एर ओंथ ङा खप चहिं जिप्पाइश्शा कोंइदीन” देंमाक्त। उत्पत्ती १८:३०
40 मिनु परमप्रभुमी मेको नाक्दो यो गिदोन आ देंशो खोदेंशो पवा बाक्त। खप ला जिम्माक्त, मेको ऊन चहिं सोव़शो बाक्माक्त।