Judges 20 in Sunwar

1 मिनु इस्राएली नेल्‍ले दान रे पा बेयर-शेबा सम्‍म गिलाद रागी परमप्रभु यावे आ ङोंइती मिस्‍पामी ग्रुम्‍मा बाक्‍त। यहोसु १८:२६; १सामुएल ७:५

2 इस्राएली आन थर थर ङा ठेयब मुरपुकी नु तरवार कुरब ४ लाख लडाइ पाइबपुकी परमप्रभु आ मुर आन ग्रुम्‍तीकेमी जाक्‍मा बाक्‍त।

3 मिनु बेन्‍यामीन आ थर ङा मुरपुकीमी इस्राएली नेल्‍ले मिस्‍पामी बुक्‍तेक्‍म, दे तुइक्‍तमे बाक्‍त। मिनु इस्राएलीपुकीमी मेको लेवी कली “एको मरिम्‍शो गेय दोपा दुम्‍मे?” दे हिल्‍लो पामे बाक्‍त।

4 मिनु मेको साइक्‍चा पुंइसीशो मीश मुर आ वोंइश लेवीमी “गो नु आं मीश बास बाक्‍चा कली बेन्‍यामीन आ थर ङा गिबा सहरमी लशो नस्‍कु। न्‍यायाधीस १९:१४; यहोसु १८:२८

5 मिनु मेको नाक्‍दो गिबा सहरम बाक्‍ब मुरपुकीम आं कली मरिम्‍शो पचा कली आं बाक्‍शो खिं पुम्‍ताक्‍म। मिनु मेकोपुकीमी आं कली साइक्‍चा माल्‍तेक्‍म। मिनु आं मीश कली कीशा लाइश्‍शा, मेको नु मबेक्‍म सम्‍म का का पा इप्‍तेक्‍म।

6 मिनु गो आं बेक्‍शो मीश कली टुक्रा टुक्रा पा चेक्‍ता। मिनु इस्राएल आ थर नेल्‍ल आन रागीम सोइक्‍ताक्‍ङ। मेकोपुकीमी इस्राएलमी मोदेंशो ग्रांग्रा दिशो नु मरिम्‍शो पामे बाक्‍त, दे तुइक्‍पाइक्‍चा कली गो मो पाता। उत्‍पत्ती ३४:७

7 मुल गे इस्राएली नेल्‍ल लोव़ पने। मार पचा माल्‍बा, इन मिम्‍शो शोव़ङीन” देंमाक्‍त।

8 मिनु मुर का दुम्‍शो खोदेंशो पा मुर नेल्‍ले बोक्‍मा बाक्‍त। मिनु मेकोपुकीमी “गोपुकी सुइ यो आंम खिं लेश्‍शा मलय। का सम्‍म यो लेश्‍शा मलय।

9 मुल गोपुकीमी गिबा सहर ङा मुर आन कली मार पचा देंशा हना, गो फेन्‍टे आप्‍शा, गिबा सहर लशा, लडाइ तोय।

10 इस्राएल आ थर नेल्‍ल ङा सहे का रे १० जना, हजार का रे सहे का जना, १० हजार रे हजार का जना मुर लाइश्‍शा, लडाइ पाइब आन कली जचा थोव़क क्‍याप्‍‍ब नु कुरब सेल्‍य। मिनु मोपा गो गिबा सहरम बाक्‍ब बेन्‍यामीन आ थर ङा मुरपुकीम इस्राएलम पशो ग्रांग्रा दिशो गेय आ पर्बम क्‍येक्‍क लेत्‍तय” देंमा बाक्‍त।

11 मोपा इस्राएली नेल्‍ले थुं का दुम्‍शा, मेको सहर नु लडाइ पचा कली खुम्‍साक्‍मा बाक्‍त।

12 मिनु इस्राएल आ थर ङा मुरपुकीमी बेन्‍यामीन आ थर ङा मुर नेल्‍ल आन कली “इन दातेमी पशो ग्रांग्रा दिशो गेय, मार बाक्‍बा?

13 मोदेंशो मरिम्‍शो पाइब आन कली आंइ गुइमी गेन। मिनु गो मेको आन कली साइश्‍शा, इस्राएल रागी कली मोदेंशो ग्रांग्रा दिशो रे रिम्‍शो सेल्‍नीकी” दे लोव़ पथ, मुर सोइक्‍तमे बाक्‍त। तन्‍न बेन्‍यामीन आ थर ङा मुरपुकीम आंम लोक्‍ब इस्राएली आन लोव़ मनेन्‍मे बाक्‍त। प्रस्‍थान २१:१२; गन्‍ती ३५:३३-३४

14 मिनु बेन्‍यामीन आ थर ङा मुरपुकी इस्राएलीपुकी नु लडाइ पचा कली गिबामी खुम्‍समा बाक्‍त।

15 बेन्‍यामीन आ थर ङा मुरपुकीमी रीब पा २६ हजार तरवार कुरशो लडाइ पाइब मेको सहर रे खुप्‍तमे बाक्‍त। मेको आन क्‍येङा लाक्‍शा गिबा सहर ङा मुर यो बाक्‍मा बाक्‍त।

16 मेको आन दातेमी ७ सहे पेरा गुइ चलेब, हुरद आप्‍चा शुश जोक्‍ब मुर यो बाक्‍मा बाक्‍त। आन सहर नु गिबा रे यो जाक्‍मा बाक्‍त।

17 मिनु इस्राएलीपुकीमी चहिं बेन्‍यामीन आ थर ङा मुरपुकी नु लडाइ पचा कली तरवार कुरशो ४ लाख लडाइ पाइब ठीक पामे बाक्‍त।

18 मिनु इस्राएलीपुकी रीब पा बेथेल लशा, परमप्रभु कली “आंइ इस्राएली आन दातेमी तेको थरमी नेल्‍ल क्‍येङा ङोंइती बेन्‍यामीन आ थर ङा मुर नु लडाइ पचा?” दे हिल्‍लो पामे बाक्‍त। मिनु परमप्रभु यावेमी “यहूदा आ थर ङा मुरपुकीमी ङोंइती लडाइ पचा माल्‍नीम” देंमाक्‍त। न्‍यायाधीस १:१-२; गन्‍ती २७:२१

19 मिनु इस्राएलीपुकी सुनी कना बोक्‍शा लशा, गिबा आ नेक्‍था ताम्‍बु कीशा बाक्‍मा बाक्‍त।

20 मेकोपुकीमी बेन्‍यामीन आ थर ङा मुरपुकी नु लडाइ पचा कली गिबा सहर आ नेक्‍था ठीक पा बाक्‍मा बाक्‍त।

21 मेको नाक्‍ती बेन्‍यामीन आ थर ङा मुरपुकी गिबा सहर रे लशा, लडाइ पा २२ हजार इस्राएली आन कली सदमे बाक्‍त।

22 तन्‍न इस्राएल ङा मुरपुकी थुं बारपाइश्‍शा, ङोंइती नाक्‍ती खोदेंशो पा लेंशा लडाइ पचा कली ठीक पा बाक्‍मा बाक्‍त।

23 मिनु इस्राएलीपुकी लशा, नाक्‍दो सम्‍म परमप्रभु यावे आ ङोंइती ङाक्‍मा बाक्‍त। मिनु मेकोपुकीमी परमप्रभु यावे कली “आंम लोक्‍ब बेन्‍यामीन आ थर ङा मुर नु लेंशा लडाइ तोचा देय मतोचा” दे हिल्‍लो पामे बाक्‍त। मिनु परमप्रभु यावेमी “मेकोपुकी नु लडाइ पचा कली लन” देंमाक्‍त।

24 आ दीसा नाक्‍त यो मेकोपुकीमी बेन्‍यामीन आ थर ङा मुरपुकी नु लडाइ पचा गोव़मे बाक्‍त।

25 मिनु बेन्‍यामीन आ थर ङा मुरपुकी मेकोपुकी नु लडाइ पचा कली गिबा रे ग्रूमा बाक्‍त। मिनु मेकोपुकीमी लेंशा १८ हजार इस्राएली आन कली सदमे बाक्‍त। उत्‍पत्ती ४९:२७

26 मिनु इस्राएली नेल्‍ले बेथेल सहर लमा बाक्‍त। मिनु मेकोपुकीमी नाक्‍दो सम्‍म परमप्रभु यावे आ ङोंइती ङाक्‍शा माइजा बाक्‍मा बाक्‍त। मेकोपुकीमी परमप्रभु यावे कली चोशा चढ़ेतीक नु दुशा बाक्‍चा आ पर्बम चढ़ेतीक चढ़ेमे बाक्‍त। न्‍यायाधीस २०:१८; यहोसु १८:२१-२२

27 मिनु इस्राएलीपुकीमी परमप्रभु यावे कली “मार पचा” दे हिल्‍लो पामे बाक्‍त। मारदे हना मेना परमप्रभु आ कबल पशो सन्‍दोस मेकेर बाक्‍माक्‍त।

28 मिनु हारून आ तौ एलाजर आ तौ फिनेहासमी मेको कली कोव़ब बाक्‍माक्‍त। मिनु इस्राएलीपुकीमी परमप्रभु यावे कली “मुल गो आंइ लोक्‍ब बेन्‍यामीन आ थर ङा मुरपुकी नु लडाइ पथ लेंशा लचा देय मलचा” दे हिल्‍लो पामे बाक्‍त। मिनु परमप्रभु यावेमी “लन, गो दीसा मेको आन कली इन गुइमी गेनन्‍नी” देंमाक्‍त। गन्‍ती २५:७; यहोसु २४:३३

29 मोपतीके इस्राएल ङा मुरपुकीमी लडाइ पाइब आन कली गिबा आ एर ओंथ बाप्‍पदमे बाक्‍त। यहोसु ८:१२,१४

30 मेको सां नाक्‍ती इस्राएलीपुकी बेन्‍यामीन आ थर ङा मुरपुकी नु लडाइ पथ लमा बाक्‍त। ङोंइती पशो खोदेंशो पा लडाइ पचा कली गिबा सहर आ ङोंइती ठीक पा बाक्‍मा बाक्‍त।

31 मिनु बेन्‍यामीन आ थर ङा मुरपुकी चहिं इस्राएली आन लडाइ पाइब नु लडाइ पचा कली लाङगा ग्रूमा बाक्‍त। इस्राएलीपुकी सहर रे प्रोक्‍खु पा मेको आन कली गिबा सहर रे ङोन लदमे बाक्‍त। मिनु बेन्‍यामीन आ थर ङा मुर ङोंइती खोदेंशो पा इस्राएली सदमे बाक्‍त। मेकोपुकी ठेयब लांमी बाक्‍मा बाक्‍त। लां का बेथेल गे लाइब नु अरु चहिं गिबा नु अर्को रू गे लाइब लां बाक्‍‍माक्‍त। मेकेर ३० जना इस्राएली कली सदमे बाक्‍त।

32 मिनु बेन्‍यामीन आ थर ङा मुरपुकीमी “गो ङोंइती खोदेंशो पा ग्राना ग्रान बाक्‍नय” दे मिम्‍तमे बाक्‍त। तन्‍न इस्राएलीपुकीमी “गो प्रोक्‍खु पा मेको आन कली सहर रे ङोन ठेयब लां सम्‍म ग्रुंइचा माल्‍नीक” देंमा बाक्‍त।

33 मोपा इस्राएली आन लडाइ पाइब आन ठेयब हुल आंम आन लडाइ पतीके प्रोंइशा बाल-तामार गे प्रोक्‍खु पामे बाक्‍त। मिनु बाप्‍शा बाक्‍बपुकी चहिं गेबा आ पच्‍छिम रे रीब पा ग्रूमा बाक्‍त। गेबा गिबा सहर दुम्‍ने चाप्‍ब।

34 मिनु इस्राएल ङा १० हजार योव़सीशो लडाइ पाइबपुकीमी गिबा गे बारशा ठेयब लडाइ तोमे बाक्‍त। तन्‍न बेन्‍यामीन आ थर ङा मुरपुकीमी “ठेयब श्‍येत जाक्‍चा चिक्‍शो बाक्‍त” दे मतुइक्‍तमे बाक्‍त।

35 मिनु परमप्रभु यावेमी बेन्‍यामीन आ थर ङा मुर आन कली इस्राएली आन गुइ रे खतम सेला बाक्‍त। मेको नाक्‍ती इस्राएलीपुकीमी २५ हजार सहे का बेन्‍यामीन आ थर ङा मुर आन कली सदमे बाक्‍त।

36 मिनु बेन्‍यामीन आ थर ङा मुरपुकीमी “मुल गो ब्रुइतक” दे तुइक्‍तमे बाक्‍त। मारदे हना इस्राएलीपुकीमी ब्रुशो देंखु पा गिबा आ नेक्‍था बाप्‍शा बाक्‍ब आन कली थमा सुइश्‍शा, प्रोक्‍खु पामे बाक्‍त।

37 मिनु मेको बाप्‍शा बाक्‍बपुकीमी रीब पा लडाइ पा गिबा सहर ओव़मा बाक्‍त। मिनु मेकोपुकीमी मोपा ओव़शा, गिबा ङा मुर नेल्‍ल कली तरवारमी क्‍योरशा सदमे बाक्‍त।

38 इस्राएली नु मेको बाप्‍शा बाक्‍ब मुर आन सल्‍ला मार बाक्‍त देंशा हना, मेकोपुकीमी सहर ओव़शा, ग्राशा, मी मुइश्‍शा सरीङ गे कुन सोइक्‍चा माल्‍बाक्‍मा बाक्‍त।

39 मिनु प्रोक्‍खु पशो इस्राएल ङा ठेयब हुल मेको तशा लेत्चा, दे सल्‍ला पशो बाक्‍मा बाक्‍त। मिनु ङोंइती बेन्‍यामीन आ थर ङा मुरपुकीमी इस्राएली आन कली ३० जना साइश्‍शा “गो थमा पा ग्रानीक” दे मिम्‍शो बाक्‍मा बाक्‍त।

40 मिनु सहर आ दाते रे कुन ग्रूशो तशा, बेन्‍यामीन आ थर ङा मुरपुकीमी नोले हिरशा कोव़ङमे बाक्‍त। मिनु सहर नेल्‍लेमी मी ब्रशो तामे बाक्‍त।

41 मिनु प्रोक्‍खु पाइब इस्राएलीपुकी फ्रा लेश्‍शा, बेन्‍यामीन आ थर ङा मुर आन कली लडाइ तोव़मे बाक्‍त। मिनु बेन्‍यामीन आ थर ङा मुरपुकी “ला, मुल बेक्‍साक्‍व” दे हिंमा बाक्‍त।

42 मोपतीके बेन्‍यामीन आ थर ङा मुर मेक रे गोरशो रागी गे प्रोक्‍मा बाक्‍त। तन्‍न सहर रे जाक्‍शो इस्राएलीपुकीमी मेको आन कली दाते पा क्‍योरशा साइक्‍चा गोव़मे बाक्‍त।

43 मेकोपुकीमी बेन्‍यामीन आ थर ङा मुर नेल्‍ल कली मनाइक्‍थु, खेदा पामे बाक्‍त। मिनु नोहा रे गिबा आ नां दाप्‍तीके सम्‍म मेको आन कली खेदा पा साइश्‍शा ग्रामा बाक्‍त।

44 मिनु १८ हजार बेन्‍यामीन आ थर ङा मुरपुकी साइक्‍चा पुंइसमा बाक्‍त। मेको नेल्‍ल बोल्‍यो लडाइ पाइब बाक्‍मा बाक्‍त।

45 मिनु लेश्‍शा गोरशो रागी रिम्‍मोन माइश्‍शो ठेयब फुल्‍लु गे प्रोक्‍मानु, इस्राएलीपुकीमी ठेयब लांमी ५ हजार खोइ बेन्‍यामीन आ थर ङा मुर आन कली सदमे बाक्‍त। मेकोपुकीमी अरु आन कली गिदोम सहर सम्‍म खेदा पा हजार निक्‍शी आन कली सदमे बाक्‍त।

46 मेको नाक्‍ती २५ हजार या कुरशो बेन्‍यामीन आ थर ङा मुरपुकी लडाइमी साइक्‍चा पुंइसमा बाक्‍त।

47 तन्‍न ब्रोंइशा लीशो ६ सहे जना बेन्‍यामीन आ थर ङा मुरपुकी गोरशो रागी ङा रिम्‍मोन फुल्‍लु मेर प्रोक्‍शा, ४ महिना मेकेर बाक्‍मा बाक्‍त। न्‍यायाधीस २१:१३

48 मिनु इस्राएलीपुकीमी बेन्‍यामीन आ थर ङा मुर नेल्‍ल आन कली लडाइ पा सदमे बाक्‍त। सहर कली क्रोइश्‍शा, मुर नु बस्‍तु भाव मारेइ मारेइ सदमे बाक्‍त। मेकोपुकीमी लीशो सहर नेल्‍ल आन कली यो मी सुइक्‍तमे बाक्‍त। उत्‍पत्ती ३४:२५-२९; गन्‍ती ३५:३०-३४; ब्‍यवस्‍था १३:१३-१९