Judges 19 in Sunwar
1 मेना इस्राएल रागीम पिप मबाक्माक्त। मिनु लेवी का बाक्माक्त। मेको एफ्राइम ङा नेल्ल क्येङा नोले ङा पहाडी रागीम बाक्शो बाक्माक्त। मेकोमी यहूदा ङा बेथलेहेम रे मीश का चाक्शो बाक्माक्त। न्यायाधीस १७:६
2 मिनु आ वोंइश नु गाइश्शा, मेको कली प्रोंइशा आ माइत यहूदा ङा बेथलेहेममी लशो बाक्माक्त। मिनु मेको मीश मुर मेकेर बाक्शो ४ महिना दुम्शो बाक्माक्त।
3 मिनु आ वोंइश आ कान्छी मीश कली लेम्शा बिप्पाइश्शा, मेको कली पित्चा कली लमाक्त। मेकोमी वाइल का नु गधा निक्शी यो लदा बाक्त। मिनु मेको आ शिउ आ खिंमी जाक्दीम्माक्त। मिनु आ शिउमी मेको कली तशा ग्येरसीशा ग्रुमा बाक्त।
4 मिनु आ शिउमी “बाक्कीन” दे नमो सिमो पवा बाक्त। मोपतीके नाक्त सां सम्म बाक्माक्त। मेकोपुकी जशा तूशा बाक्मा बाक्त।
5 मिनु ४ नाक्त नोले मेको लेवी सुनी कना बोक्शा, गाक्चा कली सासे बाक्त। तन्न आ शिउमी “लचा क्येङा ङोंइती मारेइ जने” देंमाक्त।
6 मोपतीके जशा तूशा बाक्सा बाक्त। मिनु आ शिउमी “मुलाक्त नाक्दो का बाक्शा, चिनु ग्येरसीशा लने” देंमाक्त।
7 मिनु मेको निक्शी जशा तूशा बाक्सा बाक्त। मिनु आ शिउमी “चिनु काब नाक्दो बाक्कीन” दे नमो सिमो पवा बाक्त।
8 मिनु ५ नाक्त मेको लचा कली सुनी कना बोक्माक्त। तन्न आ शिउमी “ङोंइती जने, नां इच्का चोक्तल। मिनु नोले लने” देंमाक्त। मोपतीके मेको निक्शी नां चोक्चा सम्म बाक्शा, जशा तूशा, बाक्सा बाक्त।
9 मिनु मेको मुर, आ मीश नु आ वाइल नु लचा, दे बोक्मेनु, आ शिउमी “लो, कोव़ङीन, नां रिक्चाप्तु। मोपतीके मुलाक्त नाक्दो बाक्शा, इन थुं ग्येरपतीन। मिनु दीसा सुनी कना बोक्शा इन खिं लेतीन” देंमाक्त। लूका २४:२९
10 तन्न मेको नाक्दो बाक्चा मबिस्से बाक्त। मेक रे बोक्शा, आ मीश, आ वाइल नु गधा निक्शी खुल्शा, मेकोपुकी यबुस आ आइदी जाक्दीम्मा बाक्त। यबुस सहर कली यरूसलेम यो देंबाक्मा बाक्त। न्यायाधीस १:२१; १इतिहास ११:४
11 मिनु यबुस आ नेक्था जाक्दीम्मानु, नां रिक्चशो बाक्माक्त। मिनु वाइलमी “मुलाक्त नाक्दो लशा, यबुसी आन सहरमी बाक्य” देंमाक्त।
12 तन्न लेवीमी “गो इस्राएली अरु मुर आन सहरम मलाइनीक। गिबा सहरमी लय।
13 लो, गाक्य, गिबा हना यो रामाह सहर हना यो का सम्म जाक्दीशा, बास बाक्य” देंमाक्त।
14 मिनु गाक्मा बाक्त। मोपा गाक्मा गाक्मा बेन्यामीन आन गिबा सहर जाक्चामेनु, नां रिक्माक्त। यहोसु १८:२८
15 मिनु मेकेर बास माल्शा लामा बाक्त। मिनु सहर ङा चोकमी बाक्मा बाक्त। मारदे हना सुइमी मेको आन कली बास बाक्चा कली आन खिंमी मलदमे बाक्त।
16 मिनु खाल्पा का आ रूमी गेय पा नाक्दो खिं लेश्शो बाक्माक्त। मेको खाल्पा एफ्राइम ङा पहाडी रागी ङा बाक्माक्त। तन्न गिबामी बेन्यामीन आ थर ङा सहरम बाक्बाक्माक्त।
17 मिनु मेको खाल्पामी इर कोव़शा सहर ङा चोकमी बाक्शो लां गाक्ब मुर आन कली तवा बाक्त। मिनु लशा मेको आन कली “ते रे पिनी? ते लाइनीनी?” दे हिल्लो पवा बाक्त।
18 मिनु मेकोमी “गोपुकी यहूदा ङा बेथलेहेम रे एफ्राइम ङा नेल्ल क्येङा नोले ङा पहाडी रागीम लाइनीकी। गो मेकेर ङा नङ। गो यहूदा ङा यबुस बेथलेहेममी लती। मुल मेक रे लेश्शा, आं खिं लना लन बाक्नुङ। मिनु सुइमी आंइ कली बास बाक्चा मगेम।
19 गोपुकी नु आंइ गधा कली नल नु जचा थोव़क बाक्ब। गो, आं मीश नु आं वाइल नेल्ल कली जचा तूचा थोव़क यो बाक्ब। गो आंइ कली माल्शो मारेइ मारेइ गोपुकी नु बाक्ब” दे लोव़ लेत्ता बाक्त।
20 मिनु खाल्पामी “थुं नाइक्तीन। आं खिंम बाक्कीन। इन माल्शो नेल्ल गेनन्नी। गेपुकीमी चोकमी बाक्शा, नां सोंइचा काइ मदुम्ब” देंमाक्त।
21 मिनु खाल्पामी आ खिंमी लाइक्मी बाक्त। गधा आस कली जचा गेवा बाक्त। मिनु आन खोइल चिक्शा, जशा तूशा बास बाक्मा बाक्त।
22 मेकोपुकी ग्येरसीशा बाक्शो बाक्मानु, सहर ङा मरिम्शो मुरपुकीमी मेको खिं कली दि दा रे पा पुम्दमे बाक्त। मिनु खिं ङा लाप्चो कली ख्रोकोल पना पन “इ खिंमी ओव़ब मुर कली लाङगा ग्रुंइदो। गोपुकी मेको नु इप्नीकी” दे ग्रीमा बाक्त। उत्पत्ती १९:५-८
23 मिनु खाल्पा लाङगा ग्रूशा, मेको आन कली “आं लोक्बपुकी, एको मुर आं वारच बाक्ब। मोदेंशो मरिम्शो मपन। एको मुर आं पौना बाक्ब। मेको कली मारेइ यो मपन।
24 एकेर आं कन्ने तमी नु एको पौना आ कान्छी मीश बाक्ब। मेको आस कली लतीन। मिनु इन दाक्शो पन। तन्न एको मुर कली मारेइ यो मपन” देंमाक्त।
25 तन्न मेको मुरपुकीमी खाल्पा आ लोव़ काइ मबिस्समा बाक्त। मोपतीके मेको पौनामी आ कान्छी मीश मेको आन बाक्तीक सोइक्ता बाक्त। मिनु मेकोपुकी मेको नाक्दो नेल्ल मेको मीश मुर नु इम्मा बाक्त। मेको कली का का पा बिग्रेमे बाक्त। मिनु सुनी सोइक्तमे बाक्त।
26 मिनु सुनी कना आ वोंइश बाक्शो खिं ङा लाप्चोमी जाक्शा गोल्माक्त। मिनु नां मसोक्म सम्म मेकेरेन गोल्शा बाक्माक्त।
27 मिनु आ वोंइश बोक्शा, मुल गाक्चा, दे लाप्चो रोक्गानु, आ मीश कली लाप्चो आ पुंम गोल्शो तवा बाक्त।
28 मिनु “बोक्को, गाक्य” देंमेनु, मारेइ लोव़ मलेत्ता बाक्त। मिनु आ मीश कली गधा तारी वोइश्शा खिं लदा बाक्त।
29 मिनु खिं जाक्दीश्शा, आ छूरी ग्रुंइशा आ मीश कली क्योरशा, १२ टुक्रा पा इस्राएल आ थर नेल्ल आन कली सोइक्ता बाक्त। १सामुएल ११:७
30 मेको ताइब नेल्लेमी “गो इस्राएलीपुकीम इजीप्त रागी रे पिशो रे मुलाक्त सम्म ओदेंशो मदुम्शो नु मतशो बाक्तय। मोपतीके मुल मार पचा मिम्तीन। मिनु सल्ला पने” देंमा बाक्त। होसे १०:९