Judges 17 in Sunwar
1 एफ्राइम ङा पहाडम मीकाह नें पाइश्शो मुर का बाक्माक्त।
2 मिनु मेकोमी आ आम कली “इन जाम्शो ११ सहे चांदी के शेकेल आ पर्बम सराप पशो, गो नेंता। मेको चांदी के शेकेल गो नु बाक्नीम। गो लाइश्शो नङ। मुल गो लेत्नन्नी” देंमाक्त। मिनु मेको आ ममामी “आं तौ, परमप्रभु यावेमी इ कली आसीक गेवल” देंमाक्त। लेवी ५:१; हितोपदेस २९:२४
3 मिनु मेको ११ सहे चांदी के शेकेल आ ममा कली लेश्शा गेवानु, आ ममामी “एको चांदी आं तौ कली रिम्शो दुम्ल, दे मुशो, चांदीम गिल्शो मूर्ति सेल्पाइश्शा परमप्रभु यावे कली गेनुङ। मोपतीके गो मेको चांदी के शेकेल लेंशा इ कली गेनन” देंमाक्त। शेकेल का ११.५ ग्राम बाक्ब।
4 आ तौमी मेको चांदी आ ममा कली गेवानु, आ ममामी सहे निक्शी चांदी के शेकेल लाइश्शा, चेम्ब कली गेवा बाक्त। मिनु मेकोमी मुशो मूर्ति का सेल्शा मेको कली चांदीम गिला बाक्त। मिनु मेको मीकाह आ खिंमी वोदमे बाक्त।
5 मेको मीकाह के देवता थान का यो बाक्माक्त। मेकोमी चढ़ेब आ ङोंइती फेक्तीके निसाफ पतीक ऊरीम नु थुम्मीम बाक्शो झोला सेल्पाइश्शा, खिं ङा देवतापुकी यो सेल्पदा बाक्त। मिनु आ तौ का कली योव़शा, चढ़ेब सेला बाक्त। न्यायाधीस ८:२७; उत्पत्ती ३१:१९; प्रस्थान २८:४१
6 मेना इस्राएल रागीमी पिप मबाक्मा बाक्त। मोपतीके सुम मार पचा दाक्मा, मेको पाइक्बाक्मा बाक्त। न्यायाधीस १८:१; न्यायाधीस १९:१; न्यायाधीस २१:२५
7 मिनु यहूदा ङा बेथलेहेम रे पा जाक्शो यहूदा आ थर ङा रागीम बाक्ब लेवी ठिटा का बाक्माक्त। न्यायाधीस १८:३; ब्यवस्था १८:६-८
8 मेको यहूदा ङा बेथलेहेम सहर प्रोंइशा, अर्को सहरम बाक्चा कली बाक्तीक माल्ना माल्न गाक्माक्त। मोपा गाक्मेनु, मेको एफ्राइम रागी ङा पहाड मीकाह आ खिंमी जाक्दीम्माक्त।
9 मिनु मीकाहमी “ते रे जाक्शो नवे?” दे हिल्लो पवा बाक्त। मिनु मेकोमी “गो यहूदा ङा बेथलेहेम रे पा जाक्शो लेवी का नङ। मिनु बाक्चा कली बाक्तीक का माल्ना माल्न गाक्ती” देंमाक्त।
10 मिनु मीकाहमी “गो नु बाक्को। मिनु आं आफ नु आं चढ़ेब दुमो। गो इ कली बर्स बर्समी १० ओटा चांदी के शेकेल गेनन। मिनु जचा फेक्चा यो गेनन” देंमाक्त।
11 मोपतीके मेको लेवी मीकाह नु बाक्चा बिस्से बाक्त। मिनु मीकाहमी मेको कली आ तौ आन दाते ङा का खोदेंशो पा वोदा बाक्त।
12 मिनु मीकाहमी मेको लेवी ठिटा कली आ गेय गेवा बाक्त। मिनु मेको ठिटा आ चढ़ेब दुम्शा, मेको आ खिंम बाक्माक्त। प्रस्थान २८:४१
13 मिनु मीकाहमी “मुल परमप्रभु यावेमी आं कली सोशो बोशो सेल्ती, दे तुइक्ताक्ङ। मारदे हना लेवी का आं चढ़ेब दुम्शो बाक्ब” देंमाक्त।