Joshua 8 in Sunwar

1 मिनु परमप्रभु यावेमी यहोसु कली “महिनो। इ थुं लुक्‍च मलल। मुल लडाइ पाइब नेल्‍ल लाइश्‍शा, ऐ सहर कली लडाइ तोवो। मारदे हना गो ऐ सहर ङा पिप, मेकेर ङा मुरपुकी, सहर नु रागी इ कली गेता।

2 गे यरीको नु मेकेर ङा पिप कली मार मार पवी, ऐ सहर नु मेकेर ङा पिप कली यो मोदेंशो पावो। मेक ङा मारेइ मारेइ, बी ब्‍यफ क्‍यारश भेडा नेल्‍ल गे इन कली लांइसीन। मिनु सहर आ नोले गे हुल का मुर बाप्‍पाइश्‍शा, वोतीन” देंत। यहोसु ६:२१; ब्‍यवस्‍था २०:१०-१८

3 मिनु यहोसु नु लडाइ पाइब नेल्‍ल ऐ सहर कली लडाइ तोथ, लाम्‍तेक्‍म। यहोसुमी ३० हजार लडाइ पाइब मुर आन कली योव़शा, नाक्‍दो सोइक्‍ताक्‍व।

4 मिनु मेकोमी “गे मेको सहर आ नोले बाप्‍शा बाक्‍चा माल्‍नीनी। मेको सहर क्‍येङा ङोन मलने। लडाइ पचा कली ठीक दुम्‍शा, होस पा बाक्‍कीन।

5 गो नु आं मुर नेल्‍ल सहर गे बारनीकी। मिनु मेको ङोंइती खोदेंशो पा आंइ कली खेदा पा ग्रूतेक्‍म हना, गो प्रोक्‍खु पाइनीकी।

6 मेकोपुकीमी आंइ कली खेदा पा खोइक्‍नीम। आंइ कली खेदा पा खोदमेनु, गोपुकी मेको आन कली सहर रे शुश ङोन लपाइक्‍चा कली आंइ कली खेदा पपाइक्‍नीकी। मारदे हना मेकोपुकीमी ‘इस्राएलीपुकी ङोंइती ङा बुदी गो आंइ कली तशा, प्रोक्‍ना प्रोक्‍न बाक्‍नीम’ दे मिम्‍नीम। मोपा गो प्रोक्‍कानु, यहोसु ७:५

7 गेपुकी इन बाप्‍तीके रे बोक्‍शा ग्रूशा, सहर आंम के सेलीन। मिनु परमप्रभु यावे, इन परमप्रभुमी मेको सहर इन कली गेब।

8 परमप्रभु यावेमी आ देंशो खोदेंशो पा, सहर इन गुइमी गेवा नोले, मेको कली मी सुइक्‍तीन” दे मेको आन कली देंत।

9 मिनु यहोसुमी मेको आन कली सोइक्‍ताक्‍व। मिनु मेकोपुकी ऐ क्‍येङा पच्‍छिम बेथेल नु ऐ आस दातेम बाप्‍शा बाक्‍तेक्‍म। मिनु यहोसु मेको नाक्‍दो आ मुर आन दातेमी बाक्‍त।

10 मिनु यहोसु सुनी कना बोक्‍शा, आ मुर आन कली खुप्‍ताक्‍व। इस्राएल ङा खाल्‍पा नु ऐ सहर गे लाम्‍तेक्‍म।

11 यहोसु नु बाक्‍शो लडाइ पाइब नेल्‍ल यो मेकेर लाम्‍तेक्‍म। मिनु ऐ सहर आ ङोंइती जाक्‍तेक्‍म। सहर आ उत्तर गे जाक्‍शा बाक्‍तेक्‍म। मेको ऐ सहर नु आन दातेमी बेंसी का बाक्‍त।

12 मिनु ङोंइती यहोसुमी ५ हजार लडाइ पाइब आन कली लाइश्‍शा, ऐ क्‍येङा पच्‍छिम गे बेथेल नु ऐ आस दातेम बाप्‍चा कली वोइक्‍तु।

13 मोपा ऐ सहर आ उत्तर गे शुश लडाइ पाइब आन बाक्‍तीकेमी बाक्‍मानु, पच्‍छिम गे मेको बाप्‍शो ५ हजार लडाइ पाइब बाक्‍तेक्‍म। मेको नाक्‍दो यहोसु नु आ मुरपुकी बेंसीम बाक्‍तेक्‍म।

14 मिनु सुनी कना ऐ ङा पिपमी मेको आन कली तशा, ऐ ङा लडाइ पाइब नु सहर ङा वोंइश मुर नेल्‍ल इस्राएली नु लडाइ पथ लाम्‍तेक्‍म। पिप नु आ मुर नेल्‍ल अराबाह माइक्‍तीकेमी दिंम आ ङोंइती जाक्‍तेक्‍म। तन्‍न सहर आ नोले मेकोपुकी बाप्‍शा बाक्‍शो बाक्‍नीम मतुइक्‍तेम।

15 मिनु यहोसु नु इस्राएली नेल्‍ल ब्रुशो खोदेंशो पा, गोरशो रागी गे प्रोक्‍खु पाम्‍तेक्‍म।

16 मेको पिपमी ऐ सहर ङा मुर नेल्‍ल आन कली ब्रेश्‍शा, इस्राएली आन कली खेदा पपाइक्‍तु। मोपा यहोसु कली खेदा पा, मेकोपुकी ऐ सहर क्‍येङा ङोन सम्‍म लाम्‍तेक्‍म।

17 ऐ नु बेथेल ङा वोंइश मुर नेल्‍लेमी इस्राएली आन कली खेदा पाम्‍तेक्‍म। खेदा मपाइब का सम्‍म यो मलीम। मेकोपुकी आंम सहर ङा गारो आ ठेयब लाप्‍चो रोक्‍शा वोइश्‍शा, इस्राएली आन कली खेदा पाम्‍तेक्‍म।

18 मिनु परमप्रभु यावेमी यहोसु कली “इ गुइमी बाक्‍शो तरवार ऐ सहर गे कोंइशा दिंदो। मारदे हना गो मेको सहर इ कली गेनन” देंत। मिनु यहोसुमी आ गुइमी बाक्‍शो तरवार ऐ सहर गे कोंइशा दिंताक्‍व।

19 मिनु यहोसुम आ तरवार दिंदानु, मेको बाप्‍शा बाक्‍ब लडाइ पाइब नेल्‍ल बोक्‍शा बारशा, ऐ सहर आगा ओव़तेक्‍म। मेकोपुकी ओव़शा, सहर कली आंम के सेल्‍शा, मी सुइक्‍ताक्‍म।

20 मिनु ऐ सहर ङा खेदा पाइबपुकीमी बिर हिरशा, कोव़ङमेनु, आंम सहरमी कुन जुइश्‍शो ताम्‍तेक्‍म। मोपा कुन जुइश्‍शो तशा, मेकोपुकीमी एर ओंथ प्रोक्‍ने मचबेम। मारदे हना गोरशो रागी गे प्रोक्‍खु पाइब इस्राएलीपुकी लेश्‍शा, मेकोपुकी नु लडाइ पचा गोम्‍तेक्‍म।

21 यहोसु नु इस्राएली नेल्‍लेमी मेको ऐ सहर बाप्‍शा बाक्‍बपुकीमी सहर आंम के सेल्‍शो ताम्‍तेक्‍म। सहर रे कुन जुइश्‍शो तामे चोटीन, मेकोपुकी बिर हिरशा, ऐ सहर ङा वोंइश मुर आन कली साइक्‍चा गोम्‍तेक्‍म।

22 मिनु ङोंइती बाप्‍शा बाक्‍बपुकी सहर रे ग्रूतेक्‍म। मोपा इस्राएलीपुकीमी ऐ सहर ङा मुर आन कली आन दाते पा आन एर ओंथ बाक्‍शा, का कली यो प्रोक्‍चा मगेम। नेल्‍ल आन कली साइक्‍तेक्‍म।

23 मिनु मेकेर ङा पिप कली चहिं सेसीन ग्‍याइश्‍शा, यहोसु आ बाक्‍तीक चाक्‍तेक्‍म।

24 मिनु इस्राएलीपुकीमी ऐ ङा मुर नेल्‍ल आन कली, गोरशो रागी ङा दिंममी साइक्‍ने थुम्‍शा, ऐ सहर लेश्‍शा, ओव़शा, मेकेर बाक्‍शो आन कली यो तरवारमी क्‍योरशा साइक्‍तेक्‍म।

25 मेको नाक्‍ती साइक्‍चा पुंइसीशो मुर वोंइश मुर नु मीश मुर नेल्‍ल पा १२ हजार बाक्‍तेक्‍म। ऐ ङा मुर नेल्‍ल मोशोन बाक्‍तेक्‍म।

26 मिनु यहोसुमी ऐ ङा मुर नेल्‍ल साइक्‍ने मथुम्‍मे सम्‍म आ तरवार शेशा दिंशो गुइ मतोक्‍ग।

27 मिनु परमप्रभु यावेमी यहोसु कली देंशो खोदेंशो पा बी ब्‍यफ, क्‍यारश भेडा नु रोइश्‍शो मारेइ मारेइ इस्राएलीपुकीमी वोंइसाक्‍म।

28 मिनु यहोसुमी ऐ सहर कली चोशा, गेनायो मसेल्‍चा ङा पा खतम सेल्‍तु। मोदेंशो मुल सम्‍म बाक्‍ब।

29 मिनु मेकोमी ऐ ङा पिप कली नां मरिक्‍म सम्‍म रवामी क्‍युक्‍शा वोइक्‍पाइक्‍तु। मिनु नां रिक्‍म नोले यहोसुमी पिप आ रां रवा रे शोल्‍शा, सहर ओव़तीक लाप्‍चोम लाइश्‍शा ताइक्‍पाइक्‍तु। मेको आ तारी शुश फुल्‍लु तेल्‍तेक्‍म। मेको मुल सम्‍म बाक्‍ब। ब्‍यवस्‍था २१:२२-२३

30 मिनु यहोसुमी परमप्रभु यावे, इस्राएली आन परमप्रभु कली एबाल डांडामी चढ़ेतीक का सेल्‍तु। ब्‍यवस्‍था २७:२-८

31 परमप्रभु यावे आ गेय पाइब मोसामी इस्राएली आन कली देंशो खोदेंशो पा नु मोसामी अरेशो लोव़ ब्रेक्‍शा किताबम ब्रेक्‍शो खोदेंशो, मक्‍योरशो, फलामम मथिपाइश्‍शो फुल्‍लु खुप्‍शा, चढ़ेतीक का सेल्‍तेक्‍म। मेकेर परमप्रभु यावे कली चोशा चढ़ेतीके नु दुशा बाक्‍चा आ पर्बम चढ़ेतीके चढ़ेम्‍तेक्‍म। प्रस्‍थान २०:२५; प्रस्‍थान २४:१-८

32 मिनु मेकेर इस्राएली नेल्‍ल आन ङोंइती यहोसुमी परमप्रभु यावे आ अरेशो लोव़ मोसामी मुशा ब्रेक्‍शो खोदेंशो पा, फुल्‍लुम मुशा ब्रेक्‍ताक्‍व।

33 मिनु इस्राएली नेल्‍ल, मेको नु बाक्‍ब अर्को रागी ङा मुरपुकी, खाल्‍पापुकी, ठेयब मुर नु मेको आन ठेयब मुरपुकी परमप्रभु यावे आ कबल पशो सन्‍दोस आ नेक्‍था राप्‍शो बाक्‍तेक्‍म। मेकोपुकी परमप्रभु यावे आ सन्‍दोस कुरब लेवी आ थर ङा चढ़ेब गे कोव़शा, राप्‍शो बाक्‍तेक्‍म। इस्राएली नु मेको नु बाक्‍ब अर्को रागी ङा मुर नेल्‍ल आधी गेरीजीम डांडा गे कोव़शा, अरु आधी एबाल डांडा गे कोव़शा राप्‍शो बाक्‍तेक्‍म। मिनु परमप्रभु यावे आ गेय पाइब मोसामी अरेशो खोदेंशो पा यहोसुमी इस्राएली नेल्‍ल आन कली आसीक गेप्‍तु। ब्‍यवस्‍था ११:२९; ब्‍यवस्‍था २७:१२-२६; ब्‍यवस्‍था २८:-

34 मिनु नोले यहोसुमी परमप्रभु यावे आ अरेशो लोव़ नेल्‍ल, आसीक नु सराप आ पर्बम ब्रेक्‍शो यो पढेप्‍तु। दोदेंशो पा ब्रेक्‍शो बाक्‍मे, मोदेंशो पा पढेप्‍तु।

35 मोसामी मार मार लोव़ अरेशा, ब्रेक्‍शो बाक्‍मे, मेको नेल्‍ल यहोसुमी इस्राएली नेल्‍ल कली पढेशा नेंपाइक्‍तु। मेक बाक्‍शो वोंइश मुर, मीश मुर, आलपुकी नु मेकोपुकी नु बाक्‍ब अर्को रागी ङा मुर आन ङोंइती नेल्‍ल पढेशा नेंपाइक्‍तु।