Joshua 2 in Sunwar
1 मिनु नून आ तौ यहोसुमी, सुइम मतुइक्चा ङा पा, शित्तीम रे मुर निक्शी क्यारी पथ सोइक्ताक्व। मिनु यहोसुमी मेको आस कली “मेको रागी नु यरीको नेल्ल क्यारी पथ लस” देंत। मिनु मेको निक्शी मेकेर जाक्दीश्शा, राहाब माइश्शो तेल्लेम आ खिंमी बास बाक्सा बाक्त। मत्ती १:५; हिब्रू ११:३१; याकूब २:२५
2 मिनु मेकेर ङा मुर कामी यरीको ङा पिप कली “हजुर, मुलाक्त नाक्दो इस्राएल ङा मुर निक्शी एको रागी कली क्यारी पथ, जाक्ताक्स” दे मदा बाक्त।
3 मिनु यरीको ङा पिपमी राहाब आ बाक्तीकेमी मुर सोइक्ता नाक्त। मेकोपुकीमी राहाब कली “इ खिंमी जाक्शो मेको मुर निक्शी आस कली ग्रुंइशा, एक चाक्को। मारदे हना मेको निक्शी इं रागी नेल्ल कली क्यारी पथ जाक्शो नसी” दे लोव़ सोइक्ता बाक्त।
4 तन्न मेको मीश मुरुमी मेको निक्शी आस कली लाइश्शा, ख्रुइक्तीम्सी बाक्त। मिनु मेकोमी लोव़ चाक्ब आन कली “मेको निक्शी थमा पा आं बाक्तीकेमी जाक्ताक्स। तन्न ते रे जाक्शो नसी गो मतुइक्तु।
5 मिनु नां रिक्शा, सहर ङा ठेयब लाप्चो चोक्ची ना, मेको निक्शी ग्रूशा गाक्ताक्स। मेको ते लसा गो मतुइक्नुङ। रीब पा माल्तीनी हना, थित्नीनी कों” दे लोव़ लेत्ता बाक्त।
6 तन्न मेकोमी मेको निक्शी आस कली तला तारी वोइश्शा, पले आ डाठमी सुम्शा, ख्रुइश्शा वोइश्शो बाक्माक्त।
7 मिनु मेको निक्शी आस कली खेदा पाइबपुकी यर्दन ङा लां लशा, खोला सम्म जाक्दीम्मा बाक्त। मेको खेदा पाइबपुकी सहर रे ग्रूमा नोले ठेयब लाप्चो चोक्गमे बाक्त।
8 मेको मीश मुर इप्चा क्येङा ङोंइती मेको निक्शी आस बाक्तीक ङोइश्शा, ग्रुम्थ लमाक्त।
9 मिनु मेको मीश मुरुमी मेको आस कली “परमप्रभु यावेमी आंइ रागी इन कली गेशो बाक्ब, दे गो तुइक्नुङ। मारदे हना एको रागीम बाक्ब मुर नेल्ल इन कली तशा, शुश हिंनीम। प्रस्थान २३:२७
10 गे इजीप्त रागी रे ग्रूशा पिनीनु, परमप्रभु यावेमी इन ङोंइती लल समुन्द्र सोव़पाइक्तु। मिनु यर्दन आइक्ची हांबु ङा एमोरी आन पिप सीहोन नु ओग आस कली साइश्शा खतम सेल्शो लोव़ गोपुकीमी नेंतक। प्रस्थान १४:२१; गन्ती २१:२१-२६
11 मोदेंशो लोव़ नेंशो नोले, गोपुकी साप्पा हिंतक। इन पतीक तशा, गो नेल्ल शुश हिंतक। मारदे हना परमप्रभु यावे, इन परमप्रभु इर स्वर्ग ङा नु उइ रागी ङा परमप्रभु बाक्ब। यहोसु ५:१; प्रस्थान १५:१४-१५; ब्यवस्था ४:३९
12 मोपतीके गो इस कली वारच पाता। गे परमप्रभु यावे आ नें थिशा, कसम जसे। मार कसम जस देंशा हना, गो इस कली वारच पशो खोदेंशो पा, गे लडाइ पनीनु, आं खिं ङा मुर नेल्ल आन कली यो वारच पसे। आं कली वारच पतीके चिन्ड का गेयीसी। यहोसु ६:२३,२५
13 मिनु आं आम आफ, आं लोक्बपुकी नु मेको आन खिं ङा मुर नेल्ल आन कली ब्रोंइचा गेन। बेक्चा रे प्रोनीन” दे मेकोमी देंमाक्त।
14 मिनु मेको निक्शीमी “गे आंइ पचशो गेय सुइ आन कली मदेंते हना, नु परमप्रभु यावेमी एको रागी आंइ कली गेवा नोले गो इ कली थमा पा वारच पा रिम्शो पाइनस्कु। इ कली साइक्चा क्येङा ङोंइती आंस कली साइक्चा माल्नीम” देंसा बाक्त।
15 मिनु मेको मीश मुरुमी मेको निक्शी आस कली झेल रे डोरी तोक्शा, उइ तोइक्चा गेम्सी बाक्त। मारदे हना मेको आ खिं मेको सहर ङा गारोम बाक्माक्त।
16 मिनु मेको मीश मुरुमी मेको निक्शी आस कली “गे डांडा गे लसे। मेक लाइतीसी हना, खेदा पाइबपुकीमी इस कली मथित्नीम। मेको खेदा पाइब एक्य मलेम्मा सम्म, गे सां नाक्ती मेकेर ख्रुंइसीस। मिनु नोले इस लां लसे” देंमाक्त।
17 मिनु मेको निक्शीमी “गे आस देंशो मपाप्तीवी हना, गो कसम मजशो खोदेंशो दुम्नस्कु।
18 गो लेंशा एक जाक्कानु, गे आंस कली तोइक्तीक झेलम मेको लल डोरी फ्रेंशा वोतो। इ आम आफ, इ लोक्ब नु इ खिं ङा मुर नेल्ल यो इ खिंम बाक्चा माल्नीम।
19 मेना सु इन खिं रे लांम ग्रूबा, मेको साइक्चा पुंइसीब। मिनु आंइ कली मारेइ यो दोस मदुम्ब। सु चहिं इ खिंम बाक्शा यो, साइक्चा पुंइसीबा, मेको आ दोस आंइ तारी दुम्ल।
20 तन्न एको लोव़ गे सुइ कली देंते हना, आंस कली जपाइश्शो कसम मराइनीक” देंसा बाक्त।
21 मिनु मेको मीश मुरुमी “इस देंशो खोदेंशो दुम्ल” देंमाक्त। मिनु मेको निक्शी लसा बाक्त। मिनु नोले मेको मीश मुरुमी आ झेलम मेको लल डोरी फ्रेंशा वोदा बाक्त।
22 मेको निक्शी लशा, डांडामी जाक्दीश्शा, खेदा पाइब मलेम्मा सम्म नाक्ती सां मेकेर बाक्सा बाक्त। खेदा पाइबपुकीमी मेको निक्शी आस कली साप्पा माल्मे बाक्त हना यो, मथिदमे बाक्त।
23 मिनु मेको निक्शी डांडा रे ब्रुप्शा, लेश्शा, खोला आइक्ची हांबु नून आ तौ यहोसु आ बाक्तीक जाक्दीश्शा, मेको कली मार मार दुम्मे, मेको नेल्ल शोव़ताक्स।
24 मेको निक्शीमी यहोसु कली “थमा पा, परमप्रभु यावेमी मेको रागी नेल्ल इं कली गेशो बाक्ब। मेको रागी ङा मुर इं कली तशा, शुश हिंशा, ख्रिंख्रि पशो बाक्तेक्म” देंताक्स। यहोसु २:९