Joshua 17 in Sunwar
1 मिनु योसेफ आ ठेयब तौ मनस्से नु मनस्से आ ठेयब तौ माकीर कली योक्शो रागी गिलाद नु बाशान बाक्माक्त। गिलाद आ किकी पिपी बाक्माक्त। मेकोपुकी बोल्यो लडाइ पाइब बाक्तेक्म। यहोसु १३:३१; गन्ती २६:२९
2 मिनु मेको योव़शो रागी मनस्से आ लीशो मुर आन कली बाक्त। मिनु मेको लीशो मुर सु सु बाक्तेक्म देंशा हना, अबीएजेर आ खिं ङा मुर, हेलेक आ खिं ङा मुर, अस्रीएल आ खिं ङा मुर, शेकेम आ खिं ङा मुर, हेफेर आ खिं ङा मुर नु शेमीदा आ खिं ङा मुर बाक्तेक्म। मेकोपुकी योसेफ आ चच युइ आन खिं खिं ङा मुर बाक्तेक्म। न्यायाधीस ६:११,२४; न्यायाधीस ८:३२
3 तन्न मनस्से आ तौ माकीर, मेको आ तौ गिलाद, मेको आ तौ हेफेर नु मेको आ तौ सेलोफेहाद के तमीपुकी ला बाक्तेक्म, तौ मबाक्म। मेको आ तमीपुकी महलाह, नोआह, होग्ला, मिल्का नु तिरचा बाक्तेक्म। गन्ती २६:३३; गन्ती २७:१-८; गन्ती ३६
4 मेकोपुकीमी चढ़ेब एलाजर, नून आ तौ यहोसु नु ठेयब मुर आन ङोंइती जाक्शा “आंइ कली आंइ लोक्ब आन दातेमीन रागी गेचा, दे परमप्रभु यावेमी मोसा कली अरेशो बाक्ब” देंतेक्म। मिनु यहोसुमी मेको आन कली, परमप्रभु यावे आ देंशो खोदेंशो पा, आन बोडो बकान्छा आन दातेमी रागी गेप्तु।
5 मिनु मनस्से कली १० ओटा रागी गेम्तेक्म। मिनु मेको कली यर्दन आ पूर्ब ङा गिलाद नु बाशान रागी यो तेम्शा गेम्तेक्म।
6 मारदे हना मनस्से आ थर ङा तमीपुकीमी यो मेको आन तौ आन दातेमीन रागी ताम्तेक्म। गिलाद रागी चहिं मनस्से आ अरु तौ आन रागी दुम्त।
7 मनस्से आ रागी आशेर रे लाइश्शा शेकेम आ पूर्ब ङा मिकमेथाथ सम्म बाक्शो बाक्त। मेको सांद दक्खिन गे लशा एन-ताप्पूआह सहरमी बाक्ब आन रागी सम्म जाक्दीश्शो बाक्त।
8 मिनु ताप्पुआह आ एर ओंथ ङा रागी मनस्से के बाक्त। तन्न मनस्से आ सांदमी बाक्शो ताप्पुआह सहर चहिं एफ्राइम आ खिं ङा मुर आन के बाक्त।
9 मेको सांद दक्खिन गे कानाह खोला सम्म जाक्दीश्शो बाक्त। एफ्राइम आ सहर आन दातेमी मनस्से आ सहरपुकी यो बाक्तेक्म। तन्न मनस्से आ सांद चहिं खोला आ उत्तर गे ङा समुन्द्र जाक्दीश्शा नुप्शो बाक्त।
10 दक्खिन गे एफ्राइम आ रागी बाक्त। मिनु उत्तर गे मनस्से आ रागी बाक्त। मनस्से थर आ रागी समुन्द्र रे लशा, उत्तर गे आशेर आ रागी नु पूर्ब गे इस्साकार आ रागी सम्म जाक्दीश्शो बाक्त।
11 इस्साकार नु आशेर आस रागी आस दातेमी मनस्से आ सहर नु गाउं का निक्शी यो बाक्तेक्म। मेको तेको तेको बाक्तेक्म देंशा हना, बेथ-शेआन, इब्लाम नु आ एर ओंथ, एन-डोर, तानाक, मेगीददो नु एर ओंथ ङा गाउंपुकी बाक्तेक्म। मेको कली डांडा सां यो देंनीम। न्यायाधीस १:२७-२८
12 मिनु मनस्से आ थर ङा मुरपुकीमी मेको सहर आंम के सेल्ने मचाप्शो बाक्तेक्म। मिनु कनानीपुकी मेकेर बाक्शो बाक्तेक्म।
13 मिनु नोले इस्राएलीपुकी बोल्यो दुम्शा, मेको कनानी आन कली वाइलीम वाइल सेल्तेक्म। तन्न नेल्ल आन कली मखेरेम। यहोसु १६:१०
14 मिनु योसेफ आ खिं ङा मुरपुकीमी यहोसु कली “गे मारदे आंइ कली रागी का ला गेनी? गो शुश मुर बाक्नीकी। मिनु परमप्रभु यावेमी आंइ कली शुश आसीक गेप्तु” देंतेक्म।
15 मिनु यहोसुमी मेको आन कली “गेपुकी मोदेंशो शुश बाक्नीनी नु एफ्राइम आ पहाड रागी इन कली आइक्च दुम्त हना, परिज्जी नु रेफाइम आन रागी ङा ब्वाकी कोव़थ लने” देंत।
16 मिनु योसेफ आ खिं ङा मुरपुकीमी “पहाड रागी आंइ कली मजाक्दीप्ब। मिनु दिंमम बाक्ब कनानीपुकी नु फलाम के बग्गी बाक्नीम। मिनु बेथ-शेआन, एर ओंथ ङा मुरपुकी नु येज्रेल आ दिंममी बाक्बपुकी नु यो फलाम के बग्गी बाक्नीम” देंतेक्म।
17 मिनु यहोसुमी योसेफ आ खिं ङा मुर, एफ्राइम नु मनस्से आस मुर आन कली “गे शुश मुर नु बोल्यो यो बाक्नीनी। गे रागी का ला मताइनीनी।
18 गे पहाड ब्वाकी ङा रागी यो ताइनीनी। मिनु लशा, मेको कली शुश लाइश्शो सम्म क्योव़ङीन। मिनु मेको इन के दुम्ब। मेको कनानीपुकी नु फलाम के बग्गी बाक्त हना नु बोल्यो बाक्तेक्म हना यो, गेपुकीमी मेको आन कली खेरने चाप्नीनी” देंत।