Joshua 16 in Sunwar

1 मिनु योक्‍शा गेशो योसेफ आ खिं खिं ङा मुर आन रागी तेको तेको बाक्‍तेक्‍म देंशा हना, यरीको आ नेक्‍था ङा यर्दन रे यरीको खोला आ पूर्ब रे ग्‍येत्‍थ लाइब गोरशो रागी लाक्‍शा, बेथेल ङा पहाड रागी सम्‍म बाक्‍त। उत्‍पत्ती ४९:२२

2 बेथेल कली लूज यो देंनीम। मेकेर रे अरकी आ मुर आन रागी लाक्‍शा, अतारोथ सम्‍म जाक्‍दीश्‍शो बाक्‍त।

3 मिनु पच्‍छिम गे तोइश्‍शा याफ्‍लेत आ मुर आन रागी रे पा आइदी ङा बेथ-होरोन नु गेजेर सम्‍म ङा समुन्‍द्र जाक्‍दीश्‍शा नुप्‍शो बाक्‍त।

4 मिनु योसेफ आ तौ निक्‍शी, मनस्‍से नु एफ्राइम आस खिं खिं ङा मुरपुकीमी आंम कली रागी ताम्‍तेक्‍म।

5 मिनु एफ्राइम आ खिं खिं ङा मुर आन रागी तेको तेको बाक्‍तेक्‍म देंशा हना, मेको आन के सांद पूर्ब गे अतारोथ-अदार रे पा आइक्‍था ङा बेथ-होरोन सम्‍म बाक्‍त।

6 मिनु मेको सांद ठेयब समुन्‍द्र सम्‍म लत। उत्तर गे ङा मिकमेथाथ रे लाइश्‍शा, पूर्ब गे तानत-शिलो लाक्‍शा, पूर्ब ङा यानोह सम्‍म जाक्‍दीश्‍शो बाक्‍त।

7 मिनु नोले यानोह रे पा अतारोथ नु नाराह सम्‍म तोइश्‍‍शा यरीको जाक्‍दीश्‍शा, यर्दन सम्‍म बाक्‍त।

8 मेको सांद ताप्‍पुआह रे पा लाइश्‍शा पच्‍छिम गे कानाह खोल्‍सा सम्‍म लशा समुन्‍द्रमी जाक्‍दीश्‍शा नुप्‍शो बाक्‍त। मेको एफ्राइम आ खिं खिं ङा मुर आन रागी बाक्‍ब।

9 एको क्‍येङा लाक्‍शा मनस्‍से आ खिं ङा मुर आन दातेमी एफ्राइम आ खिं ङा मुर आन कली यो सहर नु गाउंपुकी गेशो बाक्‍त। यहोसु १७:९

10 तन्‍न मेकोपुकीमी गेजेर सहरमी बाक्‍ब कनानी आन कली मखेरेम। मोपतीके कनानीपुकी मुल सम्‍म एफ्राइम आ मुर आन दातेमी बाक्‍नीम। मेकोपुकी वाइलीम वाइल दुम्‍शा बाक्‍शो बाक्‍नीम। न्‍यायाधीस १:२९; १राजा ९:१६