Joshua 15 in Sunwar

1 मिनु योक्‍शा गेशो यहूदा आ खिं खिं ङा मुर आन रागी एदोम रागी रे दक्‍खिन जीन माइश्‍शो गोरशो रागी सम्‍म बाक्‍त। उत्‍पत्ती ४९:८-९; गन्‍ती ३४:३-५

2 मेको आन रागी ङा दक्‍खिन ङा सांद हिक्‍सी समुन्‍द्र आ दक्‍खिन रे दक्‍खिन गे

3 अक्रब्‍बीम रे ग्‍येत्‍थ लाइश्‍शा जीन लाक्‍शा कादेश-बारनेआ आ दक्‍खिन रे ग्‍येत्‍थ लशा, हेस्रोन लाक्‍शा, अदार सम्‍म जाक्‍दीश्‍शा, कारका सहर सम्‍म बाक्‍त।

4 मेकेर रे अच्‍मोन लाक्‍शा इजीप्‍त ङा खोला रे समुन्‍द्र जाक्‍दीश्‍शा नुप्‍शो बाक्‍त। मेको रागी मेको आन के दक्‍खिन गे ङा सांद बाक्‍त।

5 मिनु पूर्ब ङा सांद चहिं हिक्‍सी समुन्‍द्र यर्दन आ ओव़तीक सम्‍म बाक्‍त। उत्तर ङा सांद यर्दन आ ओव़तीक रे लाइश्‍शा

6 बेथ-होग्‍ला रे बेथ-अराबाह आ उत्तर लाक्‍शो बाक्‍त। मिनु मेको सांद रूबेन आ तौ बोहान आ फुल्‍लु सम्‍म ग्‍येत्‍थ लशो यहोसु १८:१७

7 नु आकोर नें पाइश्‍शो दिंम रे देबीर नु उत्तर गे गिल्‍गाल सम्‍म बाक्‍त। गिल्‍गाल अदुम्‍मीम ङा ग्‍येत्‍थ लतीक लां रे आइक्‍ची गे सम्‍म बाक्‍त। मेको अदुम्‍मीम दिंम ङा दक्‍खिन गे बाक्‍ब। मेको सांद एन-शेमेश नें पाइश्‍शो खोला रे लशा, एन-रोगेल सम्‍म लशो बाक्‍त। २सामुएल १७:१७

8 मेको सांद हिन्‍नोम आ तौ आ दिंम रे यबुसी आन सहर आ दक्‍खिन रे ग्‍येत्‍थ खोइश्‍शो बाक्‍त। यबुसी आन सहर यरूसलेम बाक्‍ब। मिनु मेकेर रे हिन्‍नोम दिंम ङा पच्‍छिमम बाक्‍शो डांडा ग्‍येत्‍थ रे रेफाइम आन दिंम ङा उत्तर सम्‍म लशो बाक्‍त। २इतिहास २८:३

9 मेको सांद डांडा आ थेपील रे नेप्‍तोआह नें पाइश्‍शो ब्‍वाक्‍कु बुक्‍तीके जाक्‍दीश्‍शा, एफ्रोन पहाड ङा सहर सम्‍म जाक्‍दीश्‍शो बाक्‍त। लेंशा मेको सांद मेको किरयथ-यारीम, मेको कली बालाह यो देंनीम, सम्‍म जाक्‍दीश्‍शो बाक्‍त। यहोसु १५:६०; यहोसु ९:१७; यहोसु १८:१५

10 मिनु मेको सांद बालाह रे पा सेइर पहाड सम्‍म पच्‍छिम गे हिरब। येआरीम डांडा आ उत्तर गे ङा देम्‍सीलो रे पा बेथ-शेमेश रे लुक्‍च लशा, तिम्‍नाह सम्‍म बाक्‍त। मेको येआरीम डांडा कली केसालोन यो देंनीम। यहोसु १९:४३; न्‍यायाधीस १४:१

11 मेको सांद लेंशा एक्रोन आ उत्तर गे जाक्‍दीश्‍शो बाक्‍त। मिनु शिक्‍केरोन सहरमी जाक्‍दीश्‍शा, बालाह डांडा लाक्‍शा, यब्‍नेलमी जाक्‍दीश्‍शो बाक्‍त। मेको सांद समुन्‍द्र सम्‍म बाक्‍त।

12 पच्‍छिम ङा सांद चहिं ठेयब समुन्‍द्र सम्‍म बाक्‍त। यहूदा आ थर आन खिं खिं ङा मुर आन रागी एर ओंथ ङा सांद एकोन बाक्‍नीम। यहोसु १४:६-१५; न्‍यायाधीस १:१०-१५

13 मिनु परमप्रभु यावेमी यहोसु कली अरेशो खोदेंशो पा यहूदा आ थर ङा रागी आ दातेमी यपुन्‍ने आ तौ कालेब कली किरयथ-अरबा गेप्‍तु। मेको कली हेब्रोन यो देंनीम। मेको अरबा अनाक आ आफ बाक्‍त।

14 मिनु कालेबमी हेब्रोन रे अनाक आ चच युइ सां शेशै, अहीमान नु तल्‍मै आन कली खेरतीमी।

15 मिनु मेकेर रे देबीरमी बाक्‍ब मुरपुकी नु लडाइ पथ लत। ङोंइती देबीर कली किरयथ-सेफेर देंशो बाक्‍तेक्‍म।

16 मिनु कालेबमी “सुमी चहिं किरयथ-सेफेर लडाइ पा ग्राशा, खतम पाइ‍बा, मेको कली आं तमी अकसा ग्‍युंबे पा गेनुङ” देंत। न्‍यायाधीस १:१२

17 मिनु कालेब आ लोक्‍ब केनाज आ तौ ओथ्‍नीएलमी मेको सहर ग्रात। मिनु कालेबमी ओथ्‍नीएल कली आ तमी अकसा ग्‍युंबे पा गेप्‍तु। न्‍यायाधीस ३:९

18 अकसा ओथ्‍नीएल नु लम नोले, अकसामी ओथ्‍नीएल कली “आं आफ नु रू का पुन” देंत। मिनु अकसा आ गधा रे तोंइसाक्‍व। मिनु आ आफ कालेबमी अकसा कली “मार माल्‍दे” दे हिल्‍लो पाप्‍तु।

19 मिनु अकसामी “आं कली रिम्‍शो थोव़क का गेन। मारदे हना गे आं कली नेगेब ङा रू गेतीनी। मुल आं कली ब्‍वाक्‍कु बुक्‍तीके यो गेन” देंत। मिनु कालेबमी अकसा कली आइदी नु आइक्‍था ङा ब्‍वाक्‍कु बुक्‍तीके गेप्‍तु।

20 मिनु यहूदा आ थर ङा मुर आन खिं खिं ङा मुर आन कली गेशो रागी तेको तेको बाक्‍नीम देंशा हना,

21 यहूदा आ खिं ङा मुर आन दक्‍खिनम बाक्‍शो एदोम आ सांद गे ङा सहरपुकी कब्‍सेल, एदेर नु यागुर,

22 कीनाह, दिमोना नु अदादाह,

23 केदेश, हासोर नु इथ्‍‍नान,

24 जीफ, तेयलेम नु बेआलोथ,

25 हासोर-हादत्ता, केरयोथ-हेस्रोन, मेको कली हासोर यो देंनीम,

26 अमाम, शेमा नु मोलादा

27 हासार-गददा, हेश्‍मोन नु बेथ-पेलेत,

28 हासार-शुआल, बेयर-शेबा नु बिज्‍योत्‍या,

29 बालाह, यीम नु एसेम,

30 एल्‍तोलद, केसील नु होरमा,

31 सिकलाग, मदमन्‍ना नु सन्‍सन्‍ना,

32 लेबाओत, शिल्‍हीम, ऐन नु रिम्‍मोन सहर बाक्‍नीम। मेको नेल्‍ल पा २९ ओटा सहर नु आन नेक्‍था ङा गाउं नेल्‍ल यो बाक्‍नीम।

33 मिनु दिंम गे चहिं एश्‍ताओल, सोराह नु अश्‍ना, न्‍यायाधीस १३:२५; न्‍यायाधीस १६:३१

34 जानोह, एन-गन्‍नीम ताप्‍पुआह नु एनाम,

35 यरमुथ, अदुल्‍लाम, सोकोह नु आजेका,

36 शा-आराइम, अदीथैम, गेदेराह नु गेदे-रोथैम बाक्‍नीम। मेको नेल्‍ल पा १४ ओटा सहर नु आन नेक्‍था ङा गाउं नेल्‍ल यो बाक्‍नीम।

37 मिनु सेनान, हदाशा नु मिग्‍दल-गाद,

38 दिलेआन, मिस्‍पा नु योकतेल,

39 लाकीश, बोस्‍कत नु एग्‍लोन,

40 कब्‍बोन, लहमाम नु कित्‍लीश,

41 गेदे-रोथ, बेथ-दागोन, नामा नु माकेदा बाक्‍नीम। मेको नेल्‍ल पा १६ ओटा सहर नु आन नेक्‍था ङा गाउं नेल्‍ल यो बाक्‍नीम।

42 लिब्‍ना, एथेर नु आशान,

43 इफ्‍‍ताह, अश्‍ना नु नेजीब,

44 कैलाह, अकजीब नु मारेशा बाक्‍नीम। मेको आन बाक्‍तीक नेल्‍ल पा ९ ओटा सहर बाक्‍नीम। यहोसु १९:२९

45 मेको एक्रोन सहर नु आ नेक्‍था ङा खिंपुकी नु गाउं नेल्‍ल, १सामुएल ५:१०; यहोसु १९:४१-४६

46 एक्रोन आ पच्‍छिम गे ङा समुन्‍द्र सम्‍म अश्‍दोद आ नेक्‍था ङा सहर नेल्‍ल नु मेकेर ङा गाउं नेल्‍ल

47 अश्‍दोद नु मेको आ नेक्‍था ङा खिंपुकी नु गाउं नेल्‍ल, गाजा नु मेको आ नेक्‍था ङा खिंपुकी नु गाउं नेल्‍ल नु इजीप्‍त ङा खोला नु ठेयब समुन्‍द्र आ सुर सम्‍म बाक्‍नीम। १सामुएल ५:१; न्‍यायाधीस १:१८

48 मिनु पहाड ङा शामीर, यत्तीर नु सोकोह,

49 दन्‍ना, किरयथ-सन्‍ना, मेको कली देबीर यो देंनीम,

50 आनाब, एश्‍तेमोह नु अनीम,

51 गोशेन, होलोन नु गिलोह। मेको नेल्‍ल पा ११ ओटा सहर नु आन नेक्‍था ङा गाउं नेल्‍ल यो बाक्‍नीम।

52 अराब, दुमा नु एशान,

53 यानीम, बेथ-ताप्‍पुआह नु अफेकाह,

54 हुम्‍ता, किरयथ-अरबा, मेको कली हेब्रोन यो देंनीम, नु सीओर बाक्‍नीम। मेको नेल्‍ल पा ९ ओटा सहर नु आन नेक्‍था ङा गाउं नेल्‍ल यो बाक्‍नीम।

55 माओन, कारमेल, जीफ नु युत्ता,

56 येज्रेल, योकदाम नु जानोह,

57 काइन, गिबा नु तिम्‍नाह बाक्‍नीम। मेको नेल्‍ल पा १० ओटा सहर नु आन नेक्‍था ङा गाउं नेल्‍ल यो बाक्‍नीम।

58 हल्‍हुल, बेथ-सुर नु गेदोर,

59 माराथ, बेथ-अनोत नु एल्‍तेकोन। मिनु मेको नेल्‍ल पा ६ ओटा सहर नु आन नेक्‍था ङा गाउं नेल्‍ल यो बाक्‍नीम।

60 किरयथ-बाल, मेको कली किरयथ-यारीम यो देंनीम नु रब्‍बाह बाक्‍नीम। मेको नेल्‍ल पा सहर निक्‍शी नु आस नेक्‍था ङा गाउं नेल्‍ल यो बाक्‍नीम। यहोसु ९:१७; यहोसु १८:१४

61 मिनु गोरशो रागीमी बेथ-अराबाह, मिदीन नु सेकाका

62 निब्‍शान, शुश हिक्‍सी सेल्‍ब आन सहर नु एन-गेदी बाक्‍नीम। मेको नेल्‍ल पा ६ ओटा सहर नु आन नेक्‍था ङा गाउं नेल्‍ल यो बाक्‍नीम।

63 तन्‍न यहूदा आ खिं ङा मुरपुकीमी यरूसलेम सहरमी बाक्‍ब यबुसी आन कली खेरने मचबेम। मोपतीके एको यबुसीपुकी मुलाक्‍त सम्‍म यरूसलेममी यहूदा आ खिं ङा मुरपुकी नु काथा बाक्‍नीम। यहोसु १८:२८; २सामुएल ५:६-७