Job 8 in Sunwar
1 मिनु शुआह ङा बिल्दादमी लोव़ लेश्शा
2 “गे गेना सम्म ओदेंशो लोव़ पस ङा पस बाक्नीनी। इन लोव़ ठेयब फश ला बाक्नीम।
3 मार, परमप्रभुम दूली निसाफ पाइबा ङा? मार, नेल्ल क्येङा सक्ति पाइश्शो परमप्रभुम मार ठीक बाक्बा, मेको मतुइक्बा ङा? अय्युब ३४:१०
4 इन तमी तौपुकीम मेको आ पर्बम पाप पाम्तेक्म। मोपतीके मेकोम मेको आन कली आन हेंथे पशो मोइक्ताक्व। अय्युब १:४-५
5 गे नेल्ल क्येङा सक्ति पाइश्शो परमप्रभु कली माल्तीनी नु मेको कली पुंइतीनी हना,
6 गे ग्रांग्रा मदिचा ङा नु गेना हना यो रिम्शो पाइब बाक्तीनी हना, मेको थमा पा इन पोन बोक्ब। मिनु मेकोम इन खिं लेंशा, ङोंइती ङा खोदेंशो पा गेब। भजन संग्रह ३५:२३
7 मिनु इन ङोंइती ङा बाक्शो क्येङा, इन नोले ङा बाक्शो शोंप शुश दुम्ब। अय्युब ४२:१०
8 ङोंइती ङा पाला ङा मुर आन कली हिल्लो पने। मिनु मेको आन किकी पिपी आन मिम्शा पशो, मिम्तीन।
9 मारदे हना गोपुकी सिनाक्त ला जरमेशो बाक्नीकी। मिनु गो मारेइ मतुइक्ब बाक्नीकी। रागीम आंइ नाक्ती वांकु खोदेंशो ला बाक्ब।
10 मेको किकी पिपीम इन कली मशेंनीमी? इन कली लोव़ मपाइनीमी? इन कली आन रुप्शो लोव़ मशेंनीमी?
11 ब्वाक्कु मबाक्तीकेम कागज सेल्तीक बोट मवानीम। ब्वाक्कु मबाक्तीकेम बुदी मीलु लाइश्शो मदुम्नीम।
12 मेको कोल्ना कोल्न बाक्मानु, रिक्ची मजाक्थु, घांस क्येङा यो रीब पा सोल सुल बेक्नीमी।
13 परमप्रभु कली प्रेंबपुकी यो मोदेंशोन दुम्नीम। परमप्रभु कली मटीब मुर आन आस यो मोपा जाम्शा लाइब। अय्युब ११:२०; हितोपदेस १०:२८
14 मेको आन आंमा कली थमा सुइक्तीक थम आइक्च श्येले खोदेंशो बाक्ब। मेको आन आस माख्रा आ जाल खोदेंशो बाक्ब।
15 मेको आ जालम रक एश्शा बाक्त हना, मेको कली मतिक्ब। मेको कली ग्याइक्ताक्व हना यो, मेको ब्रेप्ब।
16 परमप्रभु यावे आ अरेशो मटीबपुकी नां तशो घांस सुवा खोदेंशो पा वानीम। मिनु मेको आन शाक्श तेइ तेइ ब्रशा लाइनीम।
17 मेको आन शाक्शम फुल्लु आन कली रुक्नीम। मिनु मेको फुल्लु आन दातेम बाक्नीम।
18 मेको आन बाक्तीक रे खतम दुम्मानु, आन बाक्तीकेम मेको आन कली ‘गो इन कली गेनायो मतशो नङ’ देंब।
19 मेको आन ग्येरशा ब्रोंइतीक नाक्ती मोदेंशो बाक्नीम। मिनु अर्को तेइ तेइ खप रे वाशा ग्रूनीम।
20 नेनीन, परमप्रभुमी दोस मताइब मुर कली मतिल्ब। मेकोम मरिम्शो गेय पाइब मुर आन कली वारच मपाइब।
21 मो हना यो, मेकोमी इन कली रिप्पाइक्ब। ग्येरशा ठेयब सेंदाम लोव़ पपाइक्ब।
22 मिनु परमप्रभुमी इन कली काइ मदाक्ब आन मुने दोक्पाइक्ब। मिनु परमप्रभु यावे आ अरेशो मटीब आन ताम्बु जाम्शा लाइनीम” दे बिल्दादमी अय्युब कली देंमाक्त।