Job 32 in Sunwar
1 मिनु मेको मुर सांमी अय्युब कली लोव़ पचा प्रोन्मे बाक्त। मारदे हना अय्युबम आंम कली “गो ठीक पाइब नङ” देंस ङा देंस पवा बाक्त।
2 मिनु राम आ खिं ङा बूज ङा बाराकेल आ तौ एलीहु गाइक्ता बाक्त। मारदे हना अय्युबमी आंम कली परमप्रभु आ ङोंइती शुश पाप मपाइब खोदेंशो सेल्से बाक्त। उत्पत्ती २२:२१; अय्युब १३:१८; अय्युब १९:६-७; अय्युब २५:५-६
3 अय्युब आ वारच सां आन कली तशा यो गाइक्ता बाक्ब। मारदे हना मेकोपुकीमी अय्युब कली लोव़ लेत्ने मचाप्मे बाक्त। मो हना यो मेकोपुकीम अय्युब कली दोस ताइब सेल्मे बाक्त। अय्युब १५:४; अय्युब १८:२१; अय्युब २०:२९; अय्युब २२:५
4 मेकोपुकी अय्युब नु लोव़ पामेनु एलीहु चहिं सिक्सी पा बाक्शो बाक्माक्त। मारदे हना, मेको आन क्येङा आल बाक्माक्त।
5 मिनु मेको सांमी अय्युब कली लोव़ लेन्ने मचाप्शो तशा, एलीहु गाइक्ता बाक्त।
6 मिनु बूज ङा बाराकेल आ तौ एलीहुम “गो आइक्चीन बाक्नुङ। गेपुकी खाल्पा बाक्नीनी। मोपतीके इन ङोंइती आं तुइश्शो मदेंङ, दे सिक्सी पा बाक्ती।
7 गो ‘खाल्पा मुर ब्वाक्चा माल्नीम। खूशोपुकीम आन तुइक्तीके शेंदमेक्ल’ देंती। अय्युब १२:१२
8 बेक्शा लाइब मुरपुकी नु नेल्ल क्येङा ठेयब सक्ति पाइश्शो आ सोक्त बाक्ब। मिनु मेकोमी मुर आन कली रुप्तीक थुं गेब।
9 खाल्पापुकी ला जोक्ब तुइक्ब मबाक्नीम। खूशोपुकी यो मार ठीक बाक्बा, मेको मरुप्नीम।
10 मोपतीके गो आं लोव़ नेनीन। गो आं मिम्शो देंचा गेयीनी।
11 नेनीन। गो इन लोव़ नेंस ङा नेंस बाक्ती। गो इन लोव़ रिम्ना रिम्न बाक्ती। इन मिम्शा पशो जोक्तीक तुइक्तीक लोव़ नोफा दाइश्शा नेंशा बाक्ती।
12 गो इन देंशो लोव़ नेंना नेंन बाक्ती। तन्न गेपुकीम अय्युब कली शेंने मचाप्नी। मेको आ लोव़ यो लेन्ने मचाप्नी।
13 ‘गोपुकीम तुइक्तीक थुं तशो बाक्नीकी’ मदेंनी। ‘मुरपुकीम ममाइ परमप्रभुमीन मेको कली सजाइ गेवल’ मदेंनी।
14 तन्न अय्युबम आं पर्बम मारेइ मदे। गो इन लोव़ खोदेंशो पा मेको कली लोव़ मलेत्तु।
15 एकोपुकी श्येत्थ दुम्शो बाक्नीमी। मिनु एकोपुकीमी मारेइ लोव़ लेन्ने मचाप्नीम।
16 एकोपुकी मब्वाक्तेक्म हना यो, गो रिम्शा बाक्नुङा ङा? मारदे हना एकोपुकी राप्शा बाक्नीम, लोव़ चहिं मलेत्नीम।
17 मुल गो लोव़ लेत्नुङ। आं मिम्शो लोव़ पाइनुङ।
18 मारदे हना गो शुश लोव़ पचा माल्शो बाक्नुङ। आं आगा ङा सोक्तीमी आं कली लोव़ पपाइक्ब।
19 गो लोव़ पचा मताता हना, नक शांबुम ब्रीशो कुशुल के थैलो खोदेंशो पा बुक्ने चाप्नुङ।
20 आं थुं नाइक्पाइक्चा कली गो ब्वाक्चान माल्नुङ। गो लोव़ लेत्चा माल्नुङ।
21 गो सुइ आन कुल कोव़शा लोव़ मपाइनुङ। गो सुइ नु मिलो शिलो मपाइनुङ।
22 मारदे हना गो मिलो शिलो पस मजोक्नुङ। मो पाता हना आं कली सेल्बम आं कली रीब पा खतम पोक्ब।