Jeremiah 43 in Sunwar

1 मिनु येरमीयामी परमप्रभु यावे, आन परमप्रभु आ पशो लोव़ नेल्‍ल मेको आन कली देंने थुम्‍तु। परमप्रभु यावे, आन परमप्रभुमी येरमीया कली मेको आन कली मेको लोव़ पथ सोइश्‍शो बाक्‍त।

2 मिनु होशायाह आ तौ अजारयाह कारेआह आ तौ योहानान नु मटीब मुर नेल्‍लेम येरमीया कली “गे जोल पाइतीनी। गेपुकी इजीप्‍तम बाक्‍थ लचा मदुम्‍नीनी देंचा कली परमप्रभु यावे, आंइ परमप्रभुमी इन कली सोइश्‍शो ममाइ। येरमीया ४२:१९

3 तन्‍न कल्‍दीपुकीम आंइ कली सदमेक्‍ल कि ग्‍याइश्‍शा बेबीलोनमी लदमेक्‍ल, दे मिम्‍शा, नेरीयाह आ तौ बारुकमी इन कली आंइ पर्बम मरिम्‍शो पचा कली क्‍युक्‍शो बाक्‍ब” देंतेक्‍म। येरमीया ३६:३२

4 मोपतीके कारेआह आ तौ योहानान, लडाइ पाइब आन ठेयब मुर नेल्‍ले नु अरु मुर नेल्‍लेम यहूदामी बाक्‍चा माल्‍ब, देंशो परमप्रभु यावे आ लोव़ मटीम।

5 मेको आ पा ङा कारेआह आ तौ योहानान नु लडाइ पाइब आन ठेयब मुर नेल्‍लेम यहूदामी बाक्‍शो मुर नेल्‍ल आन कली, जात जात ङा मुर आन दातेम ब्रशा लेंशा यहूदामी बाक्‍थ जाक्‍शो मुर नेल्‍ल आन कली खुप्‍शा लाइक्‍तेक्‍म।

6 मेकोपुकीम पिप कली कोव़ब आन कप्‍तान नेबुजरादानमी शाफान आ चच अहीकाम आ तौ गेदाल्‍याह आ गुइम गेशो, मीश मुरपुकी, वोंइश मुरपुकी, आल ब्रेप्‍चपुकी, पिप आ तमीपुकी, येरमीया नु नेरीयाह आ तौ बारुक कली यो लाइक्‍तेक्‍म।

7 मोपा परमप्रभु यावे आ अरेशो मटिथु, मेकोपुकी इजीप्‍त लाम्‍तेक्‍म। मिनु ताहपनेसम जाक्‍दीत्‍तेक्‍म। येरमीया ४२:१४-१७; २राजा २५:२६

8 मिनु परमप्रभु यावेम ताहपनेसम येरमीया कली लोव़ पाप्‍तु।

9 मार लोव़ पाप्‍तु देंशा हना “इ गुइमी ठेयब ठेयब फुल्‍लु क्‍युक्‍को। मिनु यहूदीपुकीम कोव़ना कोव़न बाक्‍मानु, ताहपनेसम बाक्‍शो फाराओ, आ दरवार ङा आगा ओव़तीक लांमी ख्रुइश्‍शा थिम्‍शा वोतो।

10 मिनु मेको आन कली मुर नेल्‍ल आन परमप्रभु यावे, इस्राएली आन परमप्रभुमी ‘गो आं गेय पाइब बेबीलोन ङा पिप नेबुकदरेसर कली ब्रेत्‍नुङ। मिनु आं ख्रुइश्‍शा वोइश्‍शो एको फुल्‍लु तार गो मेको आ नित्‍तीके सेल्‍नुङ। मेकोमी मेको तार आ बाक्‍तीक ताम्‍बु कीब। येरमीया २५:९

11 मेको जाक्‍शा इजीप्‍त कली लडाइ तोइब। मिनु बेक्‍तीक रोइम बेक्‍चा ब्रेक्‍शो, बेक्‍तीक रोइ पा बेक्‍नीम। ग्‍याइश्‍शा लाइक्‍चा पुंइसीचा ब्रेक्‍शो, ग्‍याइश्‍शा लाइक्‍चा पुंइसीनीम। मिनु तरवारम साइक्‍चा पुंइसीचा ब्रेक्‍शो, तरवार साइक्‍चा पुंइसीनीम। येरमीया १५:२

12 मेकोमी इजीप्‍त ङा मूर्ति आन खिंम मी सुइक्‍ब। मेकोमी मेको आन खिं आन कली क्रोइक्‍ब। मिनु मेको देवी देवता आन कली लाइक्‍ब। मिनु गोठलापुकीम दोपा आन वा रे नेक्‍स गुप्‍नीमी, मोपा मेकोमी इजीप्‍त रागी ङा मूर्ति आन कली गुप्‍शा ताइब। मिनु मारेइ मदुम्‍थु आ रागी लेप्‍ब। येरमीया ४६:२५

13 मेकोमी इजीप्‍त ङा हेल्‍योपोलीस सहरम बाक्‍शो नां आ मूर्ति बाक्‍शो थामपुकी प्रेप्‍ब। मिनु इजीप्‍त ङा देवी देवता आन खिंम मी सुइक्‍ब’ देंशो बाक्‍ब” देंत।