Jeremiah 36 in Sunwar
1 यहूदा ङा पिप योसीयाह आ तौ येहो-याकीममी सासन पवा आ ४ बर्सम परमप्रभु यावेम येरमीया कली लोव़ पाप्तु। येरमीया २५:१
2 मार लोव़ पाप्तु देंशा हना “गो योसीयाहम सासन पवा रे मुल सम्म इ कली इस्राएल, यहूदा नु रागी नेल्ल ङा मुर आन पर्बम देंशो लोव़ नेल्ल कागजम ब्रेक्तो। येरमीया २५:३
3 मो दुम्मेनु, गो मेको आन कली गेचशो ठेयब श्येत दुम्तीके आ पर्बम यहूदा ङा मुरपुकीम तुइश्शा, आन मरिम्शो पतीके रे लेत्नीमी कों? मिनु गो मेको आन मरिम्शो पशो नु आन पाप पशो क्याम्शा गेनुङमी” देंत। येरमीया २६:३
4 मिनु येरमीयामी नेरीयाह आ तौ बारुक कली ब्रेप्पाइक्तु। मिनु बारुकम येरमीयामी ब्रेक्पाइश्शो परमप्रभु यावेम देंशो लोव़ नेल्ल कागजम ब्रेक्ताक्व। येरमीया ३२:१२; येरमीया ४५:१
5 मिनु येरमीयामी बारुक कली “गो परमप्रभु यावे आ खिं लने मचाप्नुङ।
6 मोपतीके गे तेकोइ माइजा बाक्तीक नाक्त परमप्रभु यावे आ खिं लशा, आं इ कली ब्रेक्पाइश्शो कागजम बाक्शो लोव़ मुरपुकीम नेंचा ङा पा पढेशा नेंपाइक्मी। यहूदा ङा सहर रे जाक्शो मुर नेल्लेम नेंचा ङा पा पढेशा नेंपाइक्मी।
7 मो दुम्मेनु मेकोपुकीमी आन पुंइशो लोव़ परमप्रभु यावे आ नेक्था चाक्नीमी, कों? मिनु मेको नेल्लेम आन मरिम्शो लां प्रोंइनीमी, कों? मारदे हना परमप्रभु यावेम आ मुर आन पर्बम गाइश्शा चुरशा देंशो लोव़ ठेयब बाक्ब” देंत।
8 मिनु नेरीयाह आ तौ बारुकम परमप्रभु यावे आ लोव़ पाइब येरमीया आ देंशो नेल्ल पाप्तु। मेकोमी मेको परमप्रभु यावे आ लोव़ ब्रेक्शो कागज परमप्रभु यावे आ खिंम पढेशा नेंपाइक्तीमी।
9 यहूदा ङा पिप योसीयाह आ तौ येहो-याकीम आ सासन पशो ५ बर्स ९ महिनाम यरूसलेममी बाक्शो मुर नेल्ल नु यहूदा ङा सहर रे जाक्शो मुर आन कली यरूसलेमम परमप्रभु यावे आ ङोंइती नेल्ल आन कली नेंपाइश्शा माइजा बाक्तीक लोव़ पाम्तेक्म।
10 मिनु बारुकमी येरमीया आ ब्रेक्पाइश्शो लोव़ परमप्रभु यावे आ खिंम मुर नेल्लेमी नेंचा ङा पा पढेप्तु। मेकोमी मेको लोव़ ब्रेक्ब शाफान आ तौ गेमारयाह आ बाक्तीके परमप्रभु यावे आ खिं ङा नक लाप्चो आ नेक्था ङा कोठाम बाक्शा, पढेप्तु। २राजा २२:३
11 मिनु गेमारयाह आ तौ शाफान आ चच मीकायामी मेको कागजम ब्रेक्शो परमप्रभु यावे आ लोव़ नेल्ल नेंतु।
12 मिनु मेको तोइश्शा, पिप आ खिंम ब्रेक्ब आ बाक्तीके ओव़दीत्त। मेकेर ठेयब मुर नेल्ल बाक्तेक्म। मेकेर सु सु बाक्तेक्म देंशा हना, ब्रेक्ब एली-शामा, शेमायाह आ तौ देलायाह, आकबोर आ तौ एल्नाथान, शाफान आ तौ गेमारयाह नु हनान्याह आ तौ सिदकीयाह बाक्तेक्म। येरमीया २६:२२
13 मिनु मीकायामी बारुकम मुर नेल्लेम नेंचा ङा पा पढेशो लोव़ नेल्ल नेंतु। मिनु मेको लोव़ नेल्ल मेको आन कली शेंताक्मी।
14 मिनु ठेयब मुर नेल्ल गारशा, नेथन्याह आ तौ शेलेम्याह आ चच कूशी आ युइ येहूदी कली “लशा, नेरीयाह आ तौ बारुक कली मुर आन कली पढेशा नेंपाइश्शो कागज कुरशा एक जाक्को मतो” दे सोइक्ताक्मे। मोपतीके गेदाल्याह आ तौ बारुक मेको कुरशा, आन बाक्तीके जाक्त। २राजा २२:११
15 मिनु मेकोपुकीमी मेको कली “निश्शा, मेको आंइ कली पढेशा नेंपाइक्की” देंतेक्म। मोपतीके बारुकम मेको आन कली, मेको पढेशा नेंपाइक्तीमी।
16 मिनु मेकोपुकीमी मेको पढेशो नेल्ल नेंशा हिंशा आन कुल कोव़मुम्तेक्म। मिनु मेकोपुकीमी बारुक कली “गोपुकीम एको लोव़ नेल्ल पिप कली नेंपाइक्चा माल्नीकी” देंतेक्म।
17 मिनु मेकोपुकीमी बारुक कली “गे एको लोव़ नेल्ल दोपा ब्रेक्ती? आंइ कली शेंदीकी। येरमीयामी इ कली ब्रेक्पदा?” दे हिल्लो पाम्तेक्म।
18 मिनु बारुकम “मेकोमी आं कली एको लोव़ नेल्ल ब्रेक्पाइक्ती। मिनु गो एको कागज मसीम ब्रेक्ताक्ङ” दे माइक्तीमी।
19 मिनु मेको ठेयब मुरपुकीम बारुक कली “गे नु येरमीया निम्फा लशा, ख्रुंइसीस। गे निक्शी ते बाक्सी, दे सुइम मतुइक्तमेक्ल” दे माइक्तेक्म। येरमीया २५:८-११; येरमीया ७:२०; येरमीया ९:९-१०
20 मिनु मेकोपुकीमी मेको कागज ब्रेक्ब एली-शामा आ कोठाम वोइश्शा, पिप आ बाक्तीक लशा, पिप कली मेको लोव़ नेल्ल शेंताक्मे।
21 मिनु पिपमी मेको कली “कागज चाक्को” दे येहूदी कली सोइक्ताक्व। मिनु मेकोमी ब्रेक्ब एली-शामा आ कोठा रे ग्रुंइशा चाक्तु। मिनु येहूदीम पिप नु पिप आ नेक्था बाक्ब ठेयब मुर आन कली मेको पढेशा नेंपाइक्तु।
22 मेना मेको बर्स ङा ९ महिना बाक्तीके, पिप हिंउदम बाक्तीके, खिंम बाक्शो बाक्त। मेको आ ङोंइती मी ब्रशो बाक्त।
23 मिनु येहूदीम सां नु ४ हरप पढेने थुमानु, पिपम कागज ख्रोइक्तीकेम ख्रोइश्शा, मीम हुम्ताक्व। मेको तोल्शो कागज नेल्ल मनुम्म सम्म पिपम मो पना पन बाक्त।
24 पिप नु मेको आ गेय पाइबपुकी मेको लोव़ नेंशा महिंम। मेकोपुकीमी आन वा यो मखाक्गेम।
25 एल्नाथान, देलायाह नु गेमारयाहम पिप कली “मेको कागज मचोने” दे पुन्मेनु यो, पिपमी मेको आन लोव़ मनेन।
26 मेको आ पा ङा पिपमी आ तौ येराहमेल, अज्रीएल आ तौ सेरायाह नु अब्देल आ तौ शेलेम्याह आन कली मेको ब्रेक्ब बारुक नु परमप्रभु यावे आ लोव़ पाइब येरमीया कली फ्रेंशा चाक्चा नस, दे हुकुम गेम्तीमी। तन्न परमप्रभु यावेम मेको आस कली ख्रुइक्ने थुम्शो बाक्त।
27 मिनु येरमीयामी ब्रेक्पाइश्शो बारुकम ब्रेक्शो मेको तोल्शो कागज पिपम चोने थुमा नोले, परमप्रभु यावेमी येरमीया कली
28 “अर्को कागज काम यहूदा ङा पिप येहो-याकीममी चोशो ङोंइती ङा कागजम बाक्शो लोव़ नेल्ल लेंशा ब्रेक्तो” देंत।
29 मिनु गे यहूदा ङा पिप येहो-याकीम आ पर्बम परमप्रभु यावेम “गे मेको तोल्शो कागज चोप्तीवी। मिनु गे बारुक कली गे मारदे बेबीलोन ङा पिप थमा पा जाक्शा, एको रागी श्येत्थ पोक्ब। मिनु मेकोमी मुर नु बस्तु भाव नेल्ल आन कली साइक्ब, दे कागजम ब्रेक्ती?” देंते।
30 मोपतीके परमप्रभु यावेमी यहूदा ङा पिप येहो-याकीम आ पर्बम “मुल रे दाऊद आ नित्तीकेम मेको आ चच युइ तेकोइ मनित्नीम। मेको पिप आ बेक्शो रां नाक्त नांम नु नाक्दो फुरशेम जिप्पाइक्चा ङा पा तांइसीब। येरमीया २२:३०; येरमीया २२:१९
31 गो मेको कली, मेको आ आल आन कली नु आ गेय पाइब आन कली आन मरिम्शो पशो आ पर्बम सजाइ गेनुङमी। गो मेको आन कली, यरूसलेममी बाक्ब आन कली नु यहूदामी बाक्ब नेल्ल आन कली आं देंशो ठेयब श्येत नेल्ल गेनुङ। मारदे हना मेकोपुकीमी आं देंशो लोव़ मनेनेम” देंत।
32 मिनु येरमीयामी अर्को कागज का चाक्शा नेरीयाह आ तौ ब्रेक्ब बारुक कली गेप्तु। मिनु मेकोमी येरमीयाम देंशो खोदेंशो पा यहूदा ङा पिप येहो-याकीममी मीम चोशो कागज ङा लोव़ नेल्ल मेको कागजम ब्रेक्ताक्व। मिनु येरमीयामी अरु शुश लोव़ यो मेकेर तेम्ताक्व।